Hmailei Kong Biatak
Hmailei ah zeidah a cang lai tiah na ruat bal maw? Baibal nih hmailei ah a cang hngami a biapi tukmi thil sining kong kha a langhter. Mah nih vawleicung mi vialte kha a kan hnorsuan lai.
Jesuh nih ‘Pathian Pennak a nai cang ti kan hngalh’ khawh ning kong kha a fianter. (Luka 21:31) Raltuknak nganpi, ṭih a nungmi lihnin, mangṭam le ngal-eu zawtnak hna a um lai tiah Jesuh nih a rak chimchung. Tuchan ah mah hna kha kan hmuh.—Luka 21:10-17.
Baibal nih minung uknak i “ni hmanung bik” caan ah a cang hngami thil pakhat kong kha a kan chimh. Mi pawl cu a ṭhalomi ziaza in an khat lai tiah a ti. 2 Timote 3:1-5 ah a langhtermi kha na rel khawh. Tuchan ah cu bantuk lungput le tuahsernak hna na hmuh tikah Baibal chimchungbia cu atu ah a cangmi he aa khat tuk ti kha na cohlan ko lai.
Mah cu zei sullam dah si? Vawleicung ah a ṭha deuhmi nunnak kan hmuh khawh nakhnga thlennak nganpi a tuah dingmi Pathian Pennak cu a nai cang. (Luka 21:36) Baibal ah Pathian nih vawlei le vawlei ah a nung hnga dingmi mi pawl caah thil ṭha ka tuah lai tiah bia aa kam. Tahchunhnak cheukhat hi zohhmanh.
A ṬHAMI UKNAK
“Bawinak le sunparnak le siangpahrang ṭhawnnak kha amah [Jesuh] cu pek an si i cucaah miphun zakip le holh phun zakip nih a rian kha an ṭuan. Bawi a sinak cu zungzal in a hmunmi bawi sinak, zeitikhmanh ah a dong lo ding a si i siangpahrang ṭhawnnak a ngeihmi cu zeitikhmanh i hrawh khawh lomi ṭhawnnak a si.”—DANIEL 7:14.
A sullam: Pathian nih Siangpahrang in a thimmi a Fapa uknak, a ṭha bikmi vawlei cozah tangah a nuammi nunnak na hmu kho.
NGANDAMNAK
“Kan ram i a ummi cu ka zaw tiah an zai ti lai lo.”—ISAIAH 33:24.
A sullam: Na zaw ti lai lo asiloah pum tlamtling loin na um ti lai lo, zungzal in na nung cang lai.
DAIHNAK
“Hi vawleicung pumpi ah ral cu a daihter dih ko hna.”—SALM 46:9.
A sullam: Raldohnak le mah ruangah a chuakmi sifah harnak vialte cu a dong dih lai.
VAWLEI CU MIṬHA IN AN KHAT LAI
“Luklak ah miṭhalo cu an lo ko lai . . . mi toiah aa dormi cu ram chungah hin him tein an um lai” —SALM 37:10, 11.
A sullam: Miṭhalo an um ti lai lo, Pathian nawl a ngaimi lawng an um cang lai.
VAWLEI CU PARADIS AH A CANG LAI
“Mi nih inn an i sak lai i an umnak hna lai, midang nih an hmankanh hna lai lo. Mitsur dum kha an i ser lai i a mitsur hang kha an din hna lai, midang nih an dinkanh hna lai lo.”—ISAIAH 65:21, 22.
A sullam: Vawleicung pumpi cu aa dawh tukmi ah ser a si lai. “Vawleicung” ah na duhnak tuah si ko seh tiah thla kan cammi kha a tlinter lai. —Matthai 6:10.
