“Ka Pa nih ka min in nan halmi paoh cu aan pek hna lai.”—Johan 16:23.

Jehovah nih siasal, mi thiang, vancungmi asiloah a thi cangmi hringsortu hna min si loin Jesuh Khrih min in thlacam hna seh ti a kan duh ti kha mah Jesuh bia nih fiang tein a langhter. Pathian sinah Jesuh min in thla kan cam tikah Jesuh i a biapimi a rian kan hngalh kha kan langhtermi a si. Jesuh nih “keimah sinin ti dah lo cun ahohmanh Pa sin an phan kho lo” tiah a ti.—Johan 14:6.

“Nan harnak vialte kha chim dih u.”—Salm 62:8.

Jehovah sin thla kan cam tikah dawtnak a ngeimi pa sinah bia kan chim bantukin kan chim awk a si. Cauk in rel asiloah baihat in chim ti bantuk si loin lungthin tak tein le upatnak tein kan cam awk a si.

“Amah duh ningin kan hal ahcun, kan halmi paoh kha a kan pek hrimhrim lai.”—1 Johan 5:14.

Jehovah Pathian nih kan caah a kan tuahpiakmi kong le a caah tuah hna seh ti a kan duhmi kong kha Baibal in a kan chimh. Pathian nih kan thlacamnak a cohlan nakhnga “amah duh ningin” kan cam a hau. Cutin kan cam khawh nakhnga a kong ṭha tein hngalh awkah Baibal kha kan hlathlai a hau. Cutin kan tuah ahcun kan thlacamnak nih a lung a lawmhter lai.

Na Herhmi caah Thla Cam. Nifatin kan herhmi rawl, hnipuan le umnak caah Pathian sinah thla kan cam khawh. Cun a hmaanmi biakhiahnak kan tuah khawh nakhnga fimnak ca le kan tonmi hneksaknak inkhawh awkah thazaang kan ngeih nakhnga ca zongah kan cam khawh. Mah lengah zumhnak, ngaihthiamnak le Pathian bawmhnak ca zongah kan cam khawh.—Luka 11:3, 4, 13; Jeim 1:5, 7.

Midang caah Thla Cam. An fale a dawmi nulepa hna cu an fale nih pakhat le pakhat an i dawtmi an hmuh hna tikah an i lawm tuk. Jehovah zong vawleicung ah a ummi a fale nih pakhat le pakhat an i zohkhenhmi a hmuh tikah aa lawm ve. Cucaah kan innchunghawi, kan chungkhar le kan hawile caah thlacam cu aa tlakmi a si. Zultu Jeim nih “pakhat le pakhat thla i campiak u” tiah a ti.—Jeim 5:16.

Naa Lawmhnak Kong Kha Chim. Pathian cu a kan Sertu a si i a kong he aa tlaiin Baibal nih hitin a ti: “Van in ruah aan pek hna i a caan hmaante ah thlaiti aan pek hna; rawl kha aan pek hna i lunglawmhnak in aan khahter hna.” (Lamkaltu 14:17) Pathian nih kan caah a kan tuahpiakmi thil vialte kha kan ruah ahcun mah nih kan i lawmhnak kong kha a sinah chim dingin a kan forh lai. Cun a nawl kan ngaihnak thawng zongin Pathian cungah kan i lawmhnak kha kan langhter khawh.—Kolose 3:15.

A caan ah lungtak tein thla kan cam nain leh colh kan si lo tikah kan lung a dong men lai. Mah cu Pathian nih a kan zohkhenh lo tinak a si maw? A si lo. Thla kan cam peng a herh ti a langhtermi a tanglei hmuhtonnak kong hi ruathmanh.

A hmasa capar ah langhtermi Steve nih “hmaan tein thla ka cam peng lo ahcun a ka nuamhter ṭhan hngami ruahchannak vialte cu an tlau dih lai” tiah a ti. Zeinihdah thlennak a tuahter? Baibal a hun cawn tikah thlacam le thlacam zungzal a herhnak kong kha a hun hngalh. Steve nih hitin a ti: “Ka hawile sinin ka hmuhmi bawmhnak ruangah Pathian sinah lawmhnak bia ka chim. A hlan nakin atu ah kaa nuam deuh.”

Pathian nih ka thlacamnak ngaihpiak dingin kaa tlak lo tiah ruahnak a ngeimi Jenny kong he aa tlaiin tah zeitin? Hitin a ti: “Man ka ngei lo timi ruahnak ka ngeih tikah ka intuarnak a ruang kha hngalhthiam awkah Pathian sinah bawmhnak ka hal.” Zeitindah bawmhnak a rak hmuh? Hitin a ti: “Pathian sin thlacamnak nih amah nih a ka hmuh ningin keimah le keimah i hmuh awkah a ka bawmh. Cun keimah le keimah sual kaa phawt hmanhah Pathian nih cutin a ka hmu lo ti hngalh awk zongah a ka bawmh. Mah lengah lungdongh loin i zuam zungzal awk zongah a ka bawmh.” A phichuak cu zeidah a si? Hitin a ti: “Thlacamnak nih Pathian cu a um taktakmi, a ka dawtu, a ka zohkhenhtu Pathian, ka Pa, zungzal in a ka bawmtu ka hawi a si ti le a duhmi tuah kaa zuam chung paoh cu a ka bawmh lai ti kha a ka hngalhter.”

Isabel kong zong hi zohhmanh hna u sih. Nau a poi lioah a siibawi nih na fa cu pum tlamtling lo a si lai tiah a ti. Mah tikah a ngaih a chia tuk. Mi cheukhat nih nauhrawh ding hmanhin ruahnak an cheuh. “Lungretheihnak in ka thi te lai ti hmanhin ka ruah.” Zeidah a rak tuah? “Atu le atu Pathian sinah bawmhnak ka hal” tiah a ti. A caan a phanh tikah a fapa Gerard cu a hrin i anih cu pum tlamtling lo a si. Isabel nih Pathian nih ka thlacamnak a ka leh tiah a ruat maw? A ruah. Zeiti lam in dah? Hitin a ti: “Atu ah ka fapa cu kum 14 a si i a pum tlam a tling lo nain aa nuamhmi kha ka hmuh. Cucaah Pathian nih ka thlacamnak a ṭha bik in a ka leh ti kha ka hngalh i anih cu Pathian nih a ka pekmi a sunglawi tukmi laksawng a si.”

Cu bantuk intuarnak nih salm caṭialtu pa bia kha a kan ruahter: “BAWIPA, mi nauta cu an thlacamnak kha na ngaihpiak hna i lungṭhawnnak na pek hna.” (Salm 10:17) Mah cu Pathian sinah thla kan cam peng awk a sinak a ruang ṭha a si.

Baibal ah Jesuh thlacamnak kong tampi kan hmuh. Mi nih an hngalh bikmi cu a zultu pawl a cawnpiakmi hna thlacamnak kha a si. Mah in zeidah kan cawn khawh?