“Maw Pathian, nang cu kan thlacamnak a kan lettu na si.”—Salm 65:1.

Mi cheukhat cu pakhatkhat nih kan thlacamnak a kan ngaihpiak tiah an zum lo nain mah nih kan lung a nuamhter deuh tiah an ruah caah thla an cam. Asinain kan lung a kan nuamhter deuh ca men lawngah thla kan cammi a si lo. Baibal nih hitin a kan ti: “A autu vialte hna cu an pawng khin [Jehovah nih, NW] * a um hnawh hna, lungtak in a autu vialte hna cu . . . an aunak kha a theih i a khamh hna.”—Salm 145:18, 19.

Cucaah amah a biami pawl an thlacamnak cu Jehovah Pathian nih a ngaihpiak hna ti kha kan zumh khawh. Pathian nih dawtnak he hitin a ti: “Nan ka hal i ka sinah thla nan cam ahcun nan bia kaan ngaihpiak hna lai.”—Jeremiah 29:12.

“Thla cam zungzal u.”—Rom 12:12.

Baibal nih “thla cam” zungzal awk le “zeitik caan paohah thlacam” dingin a kan forh. Cucaah Jehovah nih a sinah thlacam hna seh ti a kan duh ti cu a fiang ko.—Matthai 26:41; Efesa 6:18.

Pathian nih zeicah a sinah thlacam hna seh ti a kan duh? Mah kong hi ruathmanh: Pa pakhat cu a fapa nih bawmhnak a hal caah aa lawm tuk. A pa nih a fapa herhmi asiloah intuarnak kha a hngalhcia lai ti cu a fiang ko, asinain mah bawmhnak a halmi bia a theih tikah a fapa nih zeitlukin dah a zumh ti le a dawt ti kha a hngalh. Cu bantukin Jehovah Pathian sinah thla kan cam tikah amah kha kan zumh i naih kan duh ti kha kan langhtermi a si.—Phungthlukbia 15:8; Jeim 4:8.

“Amah nih aan zohkhenh hna caah nan lungretheihnak vialte kha amah cungah chia dih ko u.”—1 Peter 5:7.

Pathian nih a kan dawt i a kan zohkhenh caah a sinah thlacam hna seh ti a kan duh. Kan buaibainak le kan lungretheihnak kha a hngalh dih i bawmh a kan duh.

Siangpahrang David nih a nunchung vialte bawmhnak hmuh awkah Jehovah Pathian sinah thla a cam i a ruahnak le a intuarnak vialte kha a chimh dih. (Salm 23:1-6) Pathian nih David kong he aa tlaiin zeitindah a ruah? Pathian nih David kha a dawt i a thlacamnak vialte kha a ngaihpiak. (Lamkaltu 13:22) Mah bantukin Pathian nih a kan zohkhenh caah kan thlacamnak kha a kan ngaihpiak ve.

Mah cu Salm Baibal ṭialtu hna lak i pakhat nih a chimmi a si. Pathian nih ka thlacamnak a ka ngaihpiak lai ti kha a zumh i mah cu a cungah hmual a ngei tuk. Pathian he kan i naih deuh tiah a ruah i ngaihchiatnak le lungretheihnak a ton tikah inkhawhnak thazaang a rak ngei.—Salm 116:1-9.

Pathian nih kan thlacamnak a kan ngaihpiak tiah kan zumh ahcun a sinah atu le atu thla kan cam ko lai. Chaklei Spain ah a ummi Pedro kong hi zohhmanh hna u sih. Mawṭaw accident in kum 19 a simi a fapa cu a thi. A ngaih a chiat tuk caah Pedro nih a intuarnak vialte kha Pathian sinah a chimh dih i hnemhnak le bawmhnak hmuh awkah atu le atu thla a cam. Mah tikah zeidah a cang? “Jehovah nih ka nupi le Khrihfa unau pawl hmangin thazaang le bawmhnak a ka peknak thawngin ka thlacamnak kha a ka leh” tiah Pedro nih a ti.

Thlacamnak nih a fapa cu a nunter ṭhan kho lo nain mah nih Pedro le a chungkhar kha a rak bawmh tuk hna. A nupi María Carmen nih hitin a ti: “Thla ka cammi nih ka ngaihchiatnak kha inkhawh awkah a ka bawmh. Thla ka cam tikah lungdaihnak ka hmuh caah Jehovah Pathian nih a ka hngalhthiam ti kha ka hngalh.”

Baibal le pumpak hmuhtonnak hna nih Pathian nih kan thlacamnak a kan ngaihpiak ti kha fiang tein an langhter. Asinain Pathian nih thlacamnak vialte kha a ngai dih lo ti cu a fiang ko. Pathian nih zeicah mi cheukhat thlacamnak kha a ngaih i mi cheukhat thlacamnak kha a ngaih lo?