“Thla nan cam tikah, Pathian bia lomi nih sullam a ngei set lomi bia tampi an hman bantukin va hmang ve hlah u.”—Matthai 6:7.

Jehovah nih thlacamnak nolh lengmang le baihat in chim asiloah thlacamnak cauk ningin rel kha a duh lo. Mah canah lungtak tein kan cammi kha a duh. Na hawi pakhat nih nifatin na sinah a chim pengmi bia kha atu le atu a chim peng ahcun zeitindah na um lai. Hawikom ṭha nih cun hlangfang tein le lungtak tein bia an chim. Vancung kan Pa sinah kanmah bia tein thla kan cam tikah mah nih kan hawikom pakhat in kan hmuh ti kha a langhter.

“Cun nan hal tikah nan hmuh kho lo, zeicahtiah nan i tinhmi kha a ṭha lo.”—Jeim 4:3.

Tuahter asiloah ngeihter a kan duh lomi thil kong he aa tlaiin thla kan cam ahcun kan thlacamnak cu Pathian nih a kan let lai lo ti kha kan hngalh. Tahchunhnak ah, phe aa kahmi nih a van a ṭhat nakhnga le tangka a miat nakhnga bawmhnak a hal ahcun Jehovah nih a thlacamnak kha a let lai maw? Pathian nih vanṭhatnak ti bantuk kha zumh lo awk le hakkauh lo awkah fiang tein a kan cawnpiak. (Isaiah 65:11; Luka 12:15) Jehovah nih mah bantuk thlacamnak cu a let hrimhrim lai lo. Pathian nih kan thlacamnak a kan leh nakhnga kan thlacamnak cu Baibal chimmi he aa tlakmi a si a hau.

 “Phungbia kha ngai duh loin a mertakmi cu a thlacamnak hmanh kha fihnung a si.”—Phungthlukbia 28:9.

Baibal chan lioah Pathian nih a dingmi a nawlbia a zul lomi hna i an thlacamnak kha a rak let hna lo. (Isaiah 1:15, 16) Pathian cu aa thleng bal lo. (Malakhi 3:6) Pathian nih kan thlacamnak kha ngai seh ti kan duh ahcun a nawlbia kha zul in mah ningin kan nun a hau. A hlanah palhnak a tuahmi kan si ah tah zeitin? Jehovah nih zeitik hmanhah kan thlacamnak a ngai lai lo tinak a si maw? A si lo. Kan rak tuahmi palhnak kong he aa tlaiin kan i ngaihchih i a lung a lawmhtermi thil kha kan si khawh chungin kan tuah ahcun Pathian nih a kan ngaihthiam lai.—Lamkaltu 3:19.