Thlacamnak Kong He Aa Tlaiin Mi Nih An Chimmi
“Thla ka cam tikah Pathian cu ka pawngah a um, ka kut a ka tlaih i sunghnak ka ton tikah lam a ka hruai tiah ka ruah.”—MARÍA.
“Ka nupi cu kum 13 chung cancer zawtnak in a zawt hnuah a thi. Nifatin Pathian sinah thla ka cammi le ka harnak kong ka chimh tikah ṭha tein a ka ngaihpiakmi kong kha ka philh lo. Mah nih lungdaihnak a ka pek.”—RAÚL.
“Thlacamnak cu Pathian sinin kan hmuhmi a ṭha tukmi laksawng pakhat a si.”—ARNE.
María, Raúl, Arne le mi tampi caah thlacamnak cu a ṭha tukmi laksawng a si. Thlacamnak thawngin Pathian sinah bia kan chim kho, kan i lawm kho i a sinah bawmhnak kan hal kho tiah an ruah. Pathian sinah thlacamnak kong he aa tlaiin mah Baibal chimmi kong hi lungthin dihlak in an zumh: “Amah duh ningin kan hal ahcun, kan halmi paoh kha a kan pek hrimhrim lai ti kan zumh caah Pathian cu ṭihnak zeihmanh um loin kan fuh ngam.”—1 Johan 5:14.
Mi tampi nih thlacamnak kong he aa tlaiin mah Baibal chimmi bia kha an zum lo. Steve nih thlacamnak kong he aa tlaiin a intuarnak kong kha hitin a chim: “Kum 17 ka si lioah ka hawile pathum cu accident in an thi. Pakhat cu mawṭaw accident in a thi i a dang pahnih cu rili ah an pam.” Mah tikah Steve nih zeidah a tuah? “Pathian sinah mah thil hna hi zeicah a can tiah thla ka cam, asinain ka thlacamnak cu leh ka si lo. Cucaah keimah le keimah kha ‘zeicah thla ka cam?’ tiah kaa hal.” Mi tampi nih an thlacamnak leh a si lo tikah cutin an ruah tawn, cucaah zeicah thla kan cam peng awk a si tiah an ruah.
Mi cheukhat nih thlacamnak cu kan caah bawmtu a si lo tiah an ruahnak a dang a ruang a um rih. Mi cheukhat nih kan herhmi le buaibainak kan ngeihmi vialte kha Pathian nih a hngalh dih ko, cucaah mah kong kha Pathian sinah chim a hau lo tiah an ti.
Mi cheukhat nih cun hlan i an tuahmi palhnak ruangah kan thlacamnak cu Pathian nih a ngai duh lai lo tiah an zumh. Jenny nih hitin a ti: “Ka buaibainak ngan bik cu man ka ngei lo timi ruahnak ka ngeihmi hi a si. Ka tuah ciami palhnak ruangah kaa ngaichih ko nain Pathian nih ka thlacamnak ngaihpiak dingin kaa tlak lo tiah keimah le keimah kha kaa ti.”
Thlacamnak kong he aa tlaiin nangtah zeitindah na ruah? Thlacamnak kong he aa tlaiin mah bantuk ruahnak asiloah lunghrinnak na ngeih ahcun Baibal ah a ummi lungsi hnangamnak a pemi a phi in hnemhnak na hmu kho. Thlacamnak kong he aa tlaiin Baibal chimmi kong kha kan zumh khawh. * Mah nih mah bantuk biahalnak hna hi leh awkah aan bawmh khawh:
-
Pathian nih kan thlacamnak hi a ngai taktak maw?
-
Thlacamnak cheukhat cu zeicah leh a si lo?
-
Na thlacamnak ngaihpiak na si nakhnga zeitindah na cam khawh?
-
Thlacamnak nih zeitindah aan bawmh khawh?
^ cat. 9 Baibal ah Jesuh Khrih i telin Pathian salle tampi i an thlacamnak kong aa tel. Biakam Hlun tiah auhmi Hebru Baibal ah thlacamnak kong kha voi 150 leng aa tel.
Mah Kong Hna Zong Hi Na Duh Khawh Men
MINO PAWL BIAHALNAK
Zeicah Thla Ka Cam Awk A Si?
Thlacamnak cu lungthin a daihtertu asiloah thil sining a ṭhatter deuhtu a si.
