Pamela nih hitin a ti: “Ka zawtnak kaa thlop lioah ka ṭih tuk. Asinan Jehovah Pathian sinah thla ka cam tikah inkhawhnak le lungdaihnak ka hun ngei. Atu tiang ka zaw ko nain thlacamnak nih a ṭhatnak lei in hmuhnak ngeih awkah a ka bawmh. Mi nih na dam deuh maw tiah an ka hal tikah ‘ka dam deuh lo nain kaa nuam ko’ tiah ka leh hna.”

Thla cam awkah kan zawtnak a zual tuk tiang kan hngah awk a si lo ti cu a fiang ko. Kan dihlak in zuamcawhnak a hme he a ngan he kan tong cio, cucaah mah kha tawnghtham khawh awkah bawmhnak kan herh. Thlacamnak nih a kan bawm kho maw?

Baibal nih hitin a ti: “Na thilrit cu BAWIPA sinah ṭhumta law amah nih aan bawmh lai; miṭha cu zeitikhmanh ah a sunghter bal lai lo.” (Salm 55:22) Mah cu zeitlukin dah thazaang petu a si. Cucaah thlacamnak nih zeitindah aan bawmh khawh? Aa tlakmi lam in Pathian sinah thla na cam ahcun zuamcawhnak na tonmi kha tawnghtham khawh awkah na herhmi kha aan pek lai.—“ Thlacamnak Nih Aan Bawmh Khawh Ning” timi rinli kulh ah zoh.