HUATNAK DONGHTER KHAWH NING
1 | Duhdanhnak Ngei Hlah
Baibal Cawnpiaknak:
“Pathian nih mi vialte kha aa ruang tein a zoh hna ti kha ka hngalh. Mi zei miphun chungmi hmanh a si ah, amah a ṭihmi paoh le dinnak a tuahmi paoh cu a cohlan ko hna.”—LAMKALTU 10:34, 35.
A Sullam:
Jehovah * Pathian nih kan ram, kan miphun, kan taksa rong asiloah kan nunphung cungah i hngat in bia a kan ceih lo. Mah canah kan ruahnak le kan duhnak tu kha biapi ah a chiah. Baibal nih hitin a ti: “Mi nih cun lenglei langh ning kha an zoh, sihmanhsehlaw BAWIPA nih cun lungthin kha a zoh.”—1 Samuel 16:7.
Tuah Khawhmi:
Kannih cu minung lungthin kha kan hngal kho lo nain Pathian kha i zohchunh awk le duhdanhnak ngeih lo awkah kan i zuam kho. Mi kha an phu ningin si loin pakhat cio in hmuh awkah i zuam. An miphun asiloah an ram ruangah an cungah a chiatnaklei in hmuhnak na ngeih ahcun Pathian sinah thlacam law mah na ruahnak kha a hram in phawi khawh awkah bawmhnak hal. (Salm 139:23, 24) Duhdanhnak ngeih lo dingin Jehovah sinah lungtak tein bawmhnak na hal ahcun Jehovah nih na thlacamnak kha a ngaih lai i aan bawmh lai kha na zumh khawh.—1 Peter 3:12.
^ cat. 6 Jehovah timi cu Pathian i pumpak a min a si.—Salm 83:18, NW.
“Mirang pakhat inn ah . . . dai tein a ṭhut hmanh kan ṭhuṭi bal lo. Atu cu a hmaanmi vawleicung pumpi unaurual lakah kaa tel ve cang.”—TITUS
Mah Kong Hna Zong Hi Na Duh Khawh Men
I HLAU!
Thleidannak—Na Ngei Maw?
Thleidannak kan ngei kho ti a langhtermi hmelchunhnak cheukhat cu zeidah an si?
