Zeicah Huatnak A Tam Tuk?
Zeicah vawleicung ah ṭih a nungmi huatnak a tam tuk? A ruang hngalh awkah huatnak timi cu zeidah a si, mi nih huatnak an hun ngeihnak a ruang le a karh ning kha kan hngalh a hau.
Huatnak Timi Cu Zeidah A Si?
Huatnak timi cu mi pakhat asiloah phu pakhat kha duh lo, rem lo asiloah ralchanh kha a si. Mah cu chikkhat ngeihmi thinhunnak men kha a si lo.
Mi Nih Huatnak An Hun Ngeihnak A Ruang
Mi tampi cu a kong a phunphun ruangah huatnak an hun ngei. Zei sualnak hmanh an tuah lo zongah phu pakhatkhat ah a ummi dihlak kha an huat men hna lai. Mah phu ah aa telmi dihlak kha miṭhalo, ṭih a nungmi le aa thleng kho lomi in an hmuh hna caah an huat men hna lai. Annih cu a nautami, ṭih a nungmi asiloah buaibainak a chuahtermi in an hmuh men hna lai. Midang cungah huatnak a ngeimi hna cu zaangennak, dinlonak asiloah huatnak a ngeihtermi thil sining hna an rak tong men lai.
A Karh Ning
A caan ah mi nih an hmuh bal lomi hna hmanh kha an huat tawn hna. Tahchunhnak ah, mi pakhat nih a upatmi asiloah amah he aa naihmi hna i an hmuh ning kha i hngalh loin aa cawn men lai. Cucaah huatnak cu fawi tein a karh kho i phu pakhat i an hmuh ning hmanh a hung si kho.
Huatnak cu fawi tein a karh kho ti kha kan hngalhthiam ahcun mi tampi nih huatnak an ngeihnak a ruang kha kan hngalhthiam lai. Asinain vawleicung ah huatnak a tam tuknak a dang a ruang a um rih. Mah kha hngalh awkah huatnak aa thawk ning kha kan hngalh a hau. Mah kong kha Baibal nih a langhter.
Baibal Nih Huatnak Aa Thawknak Kong A Langhter
HUATNAK CU MINUNG SININ AA THAWKMI A SI LO. Vancung ah Satan Khuachia tiah auh a hung simi vancungmi nih Pathian a ralchanhnak in aa thawkmi a si. Pathian a ralchanh caah Satan cu “a hramthawk tein lainawng a rak si.” “Mi lihchim a si i lih vialte pa a si” bantukin huatnak le dohnak kha a chuahter peng. (Johan 8:44; 1 Johan 3:11, 12) Baibal nih ṭih a nungmi, a thin a hungmi le doh a hmangmi in a langhter.—Job 2:7; Biathlam 12:9, 12, 17.
MITLINGLO A SIMI MINUNG NIH HUATNAK KAN I CHUAHPI. Hmasa bik mipa Adam nih Satan i sualnak lam kha a rak zulh. A phichuak cu mi vialte nih sualnak le tlinlonak ro kan co. (Rom 5:12) Adam fater Kain nih a naupa Abel kha a huat i a rak thah. (1 Johan 3:12) Mi tampi nih dawtnak le zaangfaknak an langhter ti cu a hmaan ko. Asinain sualnak ro kan co caah mi tampi cu anmah zawn lawng an i ruat, an nah a chuak, an i porhlaw. Mah nih huatnak a chuahter.—2 Timote 3:1-5.
INKHAWHNAK A UM LOMI VAWLEI AH HUATNAK A KARH. Zaangfahnak ngeih lonak le ṭih a nungmi lungput le tuahsernak an hlorhnak thawngin kan vawlei ah huatnak in a khat. “Vawlei hi a pumpi in miṭhalo pa” Satan Khuachia “kut tangah a um” caah inkhawhnak ngeih lonak, thleidannak, volhpamhnak, nehsawhnak le hrawhralhnak hna a karh.—1 Johan 5:19.
Asinain Baibal nih huatnak aa thawknak a ruang lawng a langhter lo. Tawnghtham ning kong zong a langhter.
Mah Kong Hna Zong Hi Na Duh Khawh Men
BAIBAL BIAHALNAK A PHI
Sualnak Hrampi timi cu Zeidah a Si?
Adam le Evi nih Pathian nawl an buar tikah an tefa vialte kha cikor chambaunak bantukin sualnak an roh hna.
