HUATNAK DONGHTER KHAWH NING
3 | Huatnak Kha Hlo
Baibal Cawnpiaknak:
“Chunglei in Pathian nih nan lungthin kha a dihumnak in, in thleng hna seh. Cu tikah a ṭhami thil le Pathian nih a lawmhmi thil le a tlingmi thil kha nan hngalh khawh lai, cucu Pathian duhmi an si.”—ROM 12:2.
A Sullam:
Kan ruahnak cu Pathian caah a biapi. (Jeremiah 17:10) Huatnak bia chimnak le tuahsernak hrial lawngin a za lo. Huatnak cu kan ruahnak le kan intuarnak in a rami a si. Cucaah huatnak a chuahtermi zei bantuk ruahnak hmanh kha kan hloh colh awk a si. Mah lawngah kan i “thleng” kho lai i huatnak kha kan donghter khawh lai.
Tuah Khawhmi:
Midang na hmuh hna ning, a hleiin miphun dang asiloah ram dang mi na hmuh hna ning kha i ralring. Hitin i hal: ‘Zeitindah ka hmuh hna? Kan hmuh hna ning cu keimah pumpak in ka hngalhmi kong cungah aa hngat maw? Asiloah duhdanhnak ka ngeihmi cungah dah aa hngat?’ Huatnak le zaangennak kong a langhtermi social media, baisikup asiloah nuamhsaihnak hna kha hrial.
Baibal nih kan ruahnak le kan lungthin ah a ummi huatnak kha tei awkah a kan bawmh khawh
Kan ruahnak le kan intuarnak kha a hmaan ning tein i dothlat awkah a zungzal in cun a fawi lo. Asinain Pathian Bia nih ‘minung lungthin duhnak le ruahnak kha hngalh’ awkah a kan bawmh khawh. (Hebru 4:12) Cucaah Baibal kha hlathlai peng. Na ruahnak kha Baibal cawnpiaknak he tahchunh law Pathian lung a lawmhtermi lam in khuaruah awkah na si khawh chungin i zuam. Baibal nih kan ruahnak le kan lungthin chungah “ralhruang fekfek” bantukin hram aa sihmi huatnak kha tei awkah a kan bawmh khawh.—2 Korin 10:4, 5.
