HUATNAK DONGHTER KHAWH NING
4 | Pathian Bawmhnak In Huatnak Tei Khawhnak
Baibal Cawnpiaknak:
“Thlarau nih a chuahtermi hna cu: dawtnak, lawmhnak, daihnak, lungsaunak, zaangfahnak, ṭhatnak, zumh awk tlakmi sinak, toidornak le mahle mah i tei khawhnak te hna hi an si.”—GALATI 5:22, 23.
A Sullam:
Pathian bawmhnak thawngin huatnak kha donghter khawh a si. Thiang thlarau nih kanmah thazaang in kan ngeih khawh lomi sining hna ngeih khawh awkah a kan bawmh. Cucaah huatnak tei khawh awkah kanmah thazaang i bochan loin Pathian bawmhnak tu kan i bochan awk a si. Cutin kan tuah ahcun hitin a chimmi lamkaltu Paul bantuk kan si ve lai: “Khrih nih ṭhawnnak a ka pekmi thawngin zei thil hmanh hung chuak hna sehlaw ka ton khawh ko hna.” (Filipi 4:13) Kannih zong hitin kan chim khawh ve lai: “Bawmhnak ka hmuh dingmi cu BAWIPA sinin a ra lai.”—Salm 121:2.
Tuah Khawhmi:
“Jehovah nih a puarhrangmi in a daimi pakhat ah a ka thlen.”—WALDO
Jehovah sinah lungtak tein thiang thlarau kha hal. (Luka 11:13) Na nunnak ah thlaraulei ziaza hna langhter khawh awkah bawmhnak hal. Huatnak hloh khawh awkah a bawmmi dawtnak, daihnak, lungsaunak le mahle mah i tei khawhnak ti bantuk ziaza kong he aa tlaiin Baibal chimmi kha hlathlai. Na nunnak ah mah ziaza hna langhter khawhnak lam kha kawl. Cu bantuk ziaza a langhtermi hna he i kom. Annih nih ‘dawtnak ngeih awk le thilṭha tuah’ awkah an in bawmh khawh lai.—Hebru 10:24.
