HUATNAK DONGHTER KHAWH NING
2 | Phuhlam Hmang Hlah U
Baibal Cawnpiaknak:
“Mi nih nan cungah ṭhatlonak an tuah ahcun ṭhatlonak in va lehrul hna hlah u. . . . Mi vialte he i rem awk kha nan i zuam khawh chungin i zuam u. Phuhlam hmang hlah u, . . . Cathiang nih pei, ‘“Phuhlam cu keimah rian a si, keimah nih ka lehrulh hna lai,” tiah Bawipa nih a ti,’ tiah a ti kha.”—ROM 12:17-19.
A Sullam:
Pakhatkhat nih harnak a kan pek tikah kan thin a hunmi cu a phung a si ko nain mah pa harnak pek ṭhan awkah kan i zuammi kha Pathian nih a duh lo. Mah canah ṭhatlonak vialte kha a rauhhlan ah a remh cang lai caah amah kha hngah dingin a kan forh.—Salm 37:7, 10.
Tuah Khawhmi:
Mitlinglo a simi minung nih phu an hlam tikah mah nih huatnak kha a alhter peng. Cucaah pakhatkhat nih na thin an in hunter asiloah harnak an in pek tikah phuhlam hmang hlah. Na intuarnak kha i uk awk le daihnak in lehrulh awkah i zuam. Thil sining cheukhat ah kan tonmi thil kha biapi tuk ah chiah lo cu a ṭha bikmi a si men lai. (Phungthlukbia 19:11) Asinain thil sining cheukhat ahcun report tuah ah a ṭha deuh men lai. Tahchunhnak ah, na cungah mi nih thilṭhalo an tuah tikah palik asiloah a dang nawlngeitu sinah report tuah dingin bia na khiah men lai.
Phuhlam lengmangnak cu mahle mah i uk khawh lo a si
Buaibainak tawnghtham awkah daihnak lam um dawh a si lo ah tah zeitin? Asiloah daihnak lam in tawnghtham awkah na tuah khawhmi zei paoh na tuah cang a si ah tah zeitin? Phuhlam hlah. Mah nih thil sining kha a chiatter chinmi a lo men lai. Mah canah huatnak kha donghter. Pathian duhmi lam kha i bochan in buaibainak tawnghtham awkah na cawn khawh. “Amah kha i bochan law amah nih aan bawmh lai.”—Salm 37:3-5.
Mah Kong Hna Zong Hi Na Duh Khawh Men
BAIBAL NIH AN NUNNING A THLEN
Dawtnak Nih Huatnak Kha A Tei Kho Maw?
Thleidannak tei cu a har kho men. Judah mi pakhat le Palestine mi pakhat nih cutin tuah awkah zeitindah hlawhtlinnak an hmuh ti kha hlathlai.
BAIBAL BIAHALNAK A PHI
Teirul Chamnak Kong He Aa Tlaiin Baibal Nih Zeidah A Chim?
Baibal ruahnak cheuhnak nih teirul cham duhnak lungput a ngeimi, mi tampi kha tei khawh awkah a bawmh hna.
