A Hmaan Le Hmaan Lo Kong Ah: A Kan Bawm Khomi Lamhruainak
Baibal lamhruainak nih a bawmh hna ning le zumh khawh a sining kong mi nuai tampi nih an hun hngalh ning lam pali kong kha hlathlai.
1. Ṭhitumnak
Ṭhitumnak le a nuammi chungkhar sinak kong he aa tlaiin mi cu ruahnak a phunphun an ngei.
BAIBAL CHIMMI: “Vale nih nan nupile cu nan pum nan i dawt bantuk in nan dawt hna lai i nupile nih nan vale cu nan hmaizah hna lai.”—Efesa 5:33.
A SULLAM: Ṭhitumnak cu Pathian nih hram a thawkmi a si caah nuva hna nih an i nuamh nakhnga zeidah an herh ti kha a hngalh. (Marka 10:6-9) Nuva hna nih anmah nakin an innchunghawi kha biapi deuh ah an chiah ahcun an i nuam veve lai. A nupi a dawmi va nih cun a zohkhenh ning le a pehtlaih ning in a nupi a dawt kha a langhter. Cun a va a upatmi nupi nih cun a biachim le a tuahsernak in a va a upat kha a langhter.
A KAN BAWM KHOMI BAIBAL LAMHRUAINAK: Vietnam ah a ummi Quang le Thi nih a nuammi chungkhar kan si kho bal lai lo tiah an ruah. Quang cu zaangfahnak a ngei lo. Hitin a ti: “Thi a intuarnak kha zei ah ka rel lo i a ning ka zahter caan a um tawn.” Cucaah Thi nih i ṭhen a duh. Hitin a ti: “Ka vapa kha ka zum kho ti lo i ka upat kho ti lo.”
A hnuah Quang le Thi nih Baibal nih zeidah a kan cawnpiak ti le an chungkhar ah Efesa 5:33 kha zeitindah kan zulh khawh ti kha an hun hngalh. Quang nih hitin a ti: “Mah Baibal caang nih zaangfahnak ngeih awk, Thi kha a ka dawt timi ruahnak ngeihter awk, thilrilei, pumsalei le lungthinlei in zohkhenh awkah a herhmi thil kha hngalh awkah a ka bawmh. Cutin ka tuah caah Thi dawtnak le upatnak kha ka hmuh ṭhan.” Thi nih hitin a ti, “Efesa 5:33 ah a chim bantuk in ka vapa cung ah upatnak ka langhter tikah ka vapa nih a ka dawt, a ka kilven i lungdaihnak a ka ngeihter.”
Ṭhitumnak kong tam deuh in hngalh awkah jw.org ah taarmi “Chungkhar Hlawhtlinnak Tawhfung 12” ti biatlang a ngeimi 2018, I Hlau, No. 2 kha rel.
2. Midang Pehtlaih Ning
Mi nih midang kha an miphun, an ram, an muisam, an biaknak le nupa an sinak cung ah i hngat in an pehtlaih tawn hna.
BAIBAL CHIMMI: “Mi vialte kha upat hna u.”—1 Peter 2:17.
A SULLAM: Baibal nih kanmah he miphun, ram le nupa sinak aa khat lomi hna kha huat hna awkah a kan cawnpiak lo. Mah canah miphun, ram asiloah mi sifak, mirum ti loin mi vialte kha upat hna awkah tha a kan pek. (Lamkaltu 10:34) Midang i an zumhnak le an tuahsernak kha kan hna a tlak lo hmanh ah zaangfahnak le upatnak he kan pehtlaih khawh hna.—Matthai 7:12.
A KAN BAWM KHOMI BAIBAL LAMHRUAINAK: Daniel cu Asia rammi hna cu an ram caah ṭih nungmi an si timi hmuhnak ngeih awkah cawnpiak a si. Cucaah Asia miphun pawl kha a huat hna i zapi hmaiah an ning a zahter tawn hna. Daniel nih hitin a ti: “Cutin ka tuahmi cu miphun dawtnak lungthin ka ngeih caah a si tiah ka ruah. Cucaah cutin ka ruahmi le ka tuahmi cu a palh tiah ka ruat lo.”
A hnuah Daniel nih Baibal cawnpiakmi kha a hun hngalh. Hitin a ti: “Ka ruahnak kha ka thlen dih a hau. Mi kha Pathian nih a hmuh hna bantuk in ka hmuh hna a hau cang. Khoika in a rami kan si hmanh ah kan dihlak in kan i khat dih.” Daniel nih atu ahcun mi a hmuh hna tikah zeitindah a ruah cang hna timi kong he aa tlaiin hitin a ti: “Khoika in a rami dah an si timi kong kha ka ruat tuk ti lo. Atu ahcun miphun vialte kha ka dawt cang hna i vawleicung pumpi ah hawikom ṭha ka ngei cang hna.”
Tam deuh in hngalh awkah jw.org ah taarmi “Thleidannak A Tlauter Khotu A Um Maw?” ti biatlang a ngeimi 2021, I Hlau, No. 3 kha rel.
3. Tangka
Mi tampi nih an i nuamh nakhnga le a ṭha deuhmi hmailei nunnak an ngeih nakhnga thilri chawva ngeih awkah fakpi in an i zuam.
BAIBAL CHIMMI: “Zeicahtiah fimnak nih cun tangka tluk in lung hnangamnak a pek khawh i hngalhnak nih ṭhatnak a pek khawhmi cu hihi a si: hngalhnak a ngeimi nih cun fimnak a hmuh i fimnak nih cun him tein a umter.”—Phungchimtu 7:12.
A SULLAM: Tangka cu kan herh ko nain tangka nih nuamhnak asiloah hmailei kan nunnak caah aamah a khaang kho lo. (Phungthlukbia 18:11; 23:4, 5) Nuamnak taktak le a himmi hmailei timi cu Baibal ah hmuhmi Pathian lamhruainak zulhnak cung ah aa hngatmi a si.—1 Timote 6:17-19.
A KAN BAWM KHOMI BAIBAL LAMHRUAINAK: Indonesia ah a ummi Cardo nih thilri chawva ngeihnak kha biapi ah a chiah. Hitin a ti: “Mi tam deuh nih an duhmi thil hna kha ka ngei. Khual ka tlawng kho, a man a fakmi thil, mawṭaw le inn hna zong kaa cawk khawh.” Asinain a tangka cu caan saupi a hmun lo. Hitin a ti: “Hlen ka si i rian kaa zuam ruang ah ka hmuhmi tangka vialte cu mitṭhep kar ah an tlau dih. Ka nunnak kha thilri chawva kawlnak caah ka rak hman. Asinain a donghnak ahcun lilennak, man ka ngei lo timi ruahnak le lungretheihnak tu a ka pek.”
Cardo nih tangka he aa tlaimi Baibal lamhruainak kha a hun zulh. Thilri chawva ngeih awkah aa zuam ti lo i nunning sawhsawh tein nun awk tu ah aa zuam. Hitin a ti: “Pathian he a ṭhami pehtlaihnak ka ngeih caah atu lawng ah a rum taktakmi in kaa ruat. Zan fatin ṭha tein kaa hngilh kho i kaa nuam tuk cang.”
Tangka he aa tlaiin Baibal hmuhning kong hngalh awkah jw.org ah taarmi 2021, Vennak Innsang, No. 3 “Fimcawnnak Le Tangka Nih A Himmi Hmailei Hmuh Awkah Aamah A Khaang Kho Maw?” timi capar kha rel.
4. Nupa Sinak
Nupa sinak he aa tlaiin mi tampi cu ruahnak a phunphun an ngei.
BAIBAL CHIMMI: “Pathian nih nannih cu a thiangmi le nu le pa sualnak aa summi si hna seh ti kha aan duh hna. Nan dihlak in nan pum uk kha nan thiam awk a si, nan pum cu nan thianter awk le nan upat awk a si, Pathian a hngal lomi Lawkihmi bantuk in hornak ah khan a duhduh in nan umter awk a si lo.”—1 Thesalon 4:3-5.
A SULLAM: Baibal nih nupa si duhnak lungput kong he aa tlaiin ri a kan khiahpiak. “Nu le pa sualnak” timi biafang ah zuanzamnak, hlawhhlang sinak, ṭhitumnak tuah hlanah ihṭinak, ngeihkhat he ihṭinak le saram he sualnak tuahnak hna aa tel. (1 Korin 6:9, 10) Nupa sinak cu Pathian sinin hmuhmi laksawng a si i aa ṭhitummi nu le pa ca lawng ah Pathian nih a timhtuahmi a si.—Ptb. 5:18, 19.
A KAN BAWM KHOMI BAIBAL LAMHRUAINAK: Australia ah a ummi Kylie timi nu nih hitin a ti: “Nungak ka si lioah nupa sinak ka tuah ahcun dawtmi ka si lai i ka him lai tiah ka rak ruah. Asinain a taktak ti ahcun cutin a rak si lo. Ka him lo timi ruahnak ka ngei i ngaihchiat awk a simi thil tu ka ton.”
A hnuah Kylie nih nupa sinak he aa tlaiin Baibal cawnpiaknak kha a hun hngalh i mah ning in a zulh. Hitin a ti: “Pathian phunglam nih lungfahnak le ngaihchiatnak in a kan huhphenh khawh ti kha ka hun hngalh. Atu ahcun Jehovah nih tuahter a kan duhmi lam ning in ka tuah caah ka him i dawtmi ka si timi ruahnak ka ngei cang. Baibal lamhruainak zulhnak nih lungfah awk a simi thil tampi in a ka khamh.”
Tam deuh in hngalh awkah jw.org ah taarmi “Ṭhitumnak Tuah Loin Hmunkhat ah Umṭinak He Aa Tlaiin Baibal Nih Zeidah A Chim?” timi capar kha rel.
A kan Sertu nih zeidah a hmaan i zeidah a hmaan lo ti kha hngalh awkah a kan bawmh. A lamhruainak ning in zulh cu a fawi zungzal lo nain cutin tuah awkah i zuam cu a phumi a si. Mah nih a hmunmi nuamhnak a kan pek lai ti kha kan zumh khawh.
