A Hmaan Le Hmaan Lo Kong Ah: Naa Thim Awk A Simi
A hmaan le a hmaan lo kong he aa tlaiin zulh ding in kan i thimmi phunglam cu kan nunnak ah huham tampi a ngei kho. Mah kha Jehovah nih a hngalh. Cucaah a phunglam ning in nung hna seh ti a kan duh.
Jehovah nih a dai i a nuammi nunnak ngei hna seh ti a kan duh.
“Keimah cu BAWIPA nan Pathian nan ca ṭhatnak cawnpiak aan duhtu hna le nan zulh awk hnga lam aan hmuhsaktu hna ka si. Ka nawlbia kha rak ngai u law ti ka hei duh dah! Thluachuahnak cu nan caah zeitikhmanh i a reu bal lomi tiva bantuk in a luan in a luang zungzal ko hnga! Ti kam a deng lengmangtu tilet bantuk in teinak cu nan sinah a phan ko hnga.”—Isaiah 48:17, 18.
A kan Sertu Pathian nih zei bantuk nunnak dah a ṭha bikmi a si ti kha a hngalh. Kanmah ca ṭhatnak a si caah a lamhruainak kha zul hna seh ti a kan duh. Pathian nawlpekmi kan zumh tikah kan i thimmi cu a ṭhahnemmi a si maw, si lo timi kong ah thinphan awk a um lo. Daihnak le lawmhnak a kan hmuhter caah a hmaanmi thimnak kha kan tuah khawh zungzal lai.
Jehovah nih kan tuah khawh lomi thil kha tuah awkah a kan hal lo.
“Zeitintiah nihin ah kaan pekmi hna nawlbia hi nan caah a har tukmi le nan phak leng a si lo.”—Deuteronomi 30:11.
Pathian phunglam ning in nun awkah kan ruahnak le tuahsernak hna kha kan thlen a hau. Asinain Jehovah nih tampi a kan hal lo. A kan Sertu a si caah zeitluk tiang dah kan tuah khawh ti kha a hngalh. Jehovah kha kan hngalh deuh tikah “a nawlbia cu kan caah a har tuk lo” ti kha kan hun hngalh lai.—1 Johan 5:3.
Jehovah nih a phunglam ning in a nungmi hna kha ka bawmh hna lai tiah bia aa kam.
“Keimah cu BAWIPA nan Pathian ka si i ṭhawnnak kan pek hna; ‘Nan thinphang hlah u, kaan bawmh hna lai.’”—Isaiah 41:13.
Pathian nih a kan bawmh lai caah nunter a kan duhmi lam ning in kan nung kho. Cun thazaang le ruahchannak a kan pemi Baibal hmang zong in a kan bawmh khawh.
Baibal phunglam ning in an nun caah vawleicung pumpi ah a ummi mi nuai tampi cu a ṭha deuhmi nunnak an ngei. Baibal ah zei bantuk a ṭhami ruahnak cheuhnak hna dah aa tel ti kha hlathlai. jw.org ah man loin hmuh khawhmi Baibal hrambunh in chuahmi Nunnak Kha Zungzal In I Nuamhpi! timi brochure kha hmang in hlathlainak na tuah khawh. Mah brochure ah cawn dingmi mah kong hna hi an i tel:
-
Baibal Nih Na Nunnak Kha A Ṭhatter Kho Deuh Maw?
-
Baibal Nih Ruahchannak Aan Pek
-
Baibal Kha Na Zum Kho Maw?
Baibal na hlathlai tikah Baibal cu chan nih a kaltakmi a si lo i ‘zungzal in a hmunmi a si’ ti kha na hngalh lai. (Salm 111:8) Baibal ah aa telmi a hmaan le a hmaan lo kong he aa tlaimi phunglam zulh cu kan caah a ṭha bikmi a si. Asinain mah ning in zulh awkah Pathian nih a kan hnek lo. (Deuteronomi 30:19, 20; Joshua 24:15) Mah cu mi kip nih kan tuah dingmi thimnak a si.
