A PHAW CAPAR | Zeicah Jesuh Cu Fahnak In Buin A Thih?
Mah Hi A Cang Taktakmi A Si Maw?
AD 33, ṭhal thawkka ah Nazareth khuami Jesuh cu thah a rak si. Pathian thang a chiatter tiah sual an puh, fakpi in an hrem i tung cungah thir in an khehchih. Fahnak in buin a rak thi. Asinain Pathian nih a nunter ṭhan i ni 40 hnuah Jesuh cu van ah a kai ṭhan.
Mah aa thleidangmi kong kha Biakam Thar tiah auhmi Khrihfa Greek Baibal i Thawngṭha cauk pali ah hmuh khawh a si. Mah thil sining hna cu a cang taktakmi an si maw? Mah biahalnak cu hal awk a tlakmi le a biapimi a si. Mah thil sining hna cu a cang taktakmi a si lo ahcun Khrihfa zumhnak cu pakpalawng a si lai i Paradis i zungzal nunnak ruahchannak zong saduh thah men a si lai. (1 Korin 15:14) Asinain a cang taktakmi a si ahcun minung ca hmailei ruahchannak cu a ṭha tukmi a si lai i nangmah theng zong ṭhatnak na hmu kho lai. Cu a si ah Thawngṭha cauk chung i a kong hna cu a taktak maw an si asiloah phuahchommi tuanbia dah?
A CANG TAKTAKMI THIL NIH A LANGHTERMI
Phuahchommi tuanbia he i lo loin Thawngṭha cauk nih a hmaan ning tein le a dikthliar in a langhter. Tahchunhnak ah, a um taktakmi hmun hna i an min pawl cu Baibal ah kan hmuh i cuka lak i hmun tampi cu tuchan zongah va tlawn khawh an si. Cun Thawngṭha cauk ah an kong ṭialmi hna cu an rak nung taktak ti kha tuanbialei mifim hna nih an cohlan.—Luka 3:1, 2, 23.
Kumzabu pakhatnak le pahnihnak i caṭialtu hna nih Jesuh kong kha an rak ṭial. * Thawngṭha cauk ah aa ṭialmi Jesuh a thihning cu mah caan lio i Rom mi hna mithahning he aa khat. Mah lengah thil sining hna kha hlangfang tein le phehthuh lo tein an langhter. Jesuh zultu cheukhat i an tlinlonak kong zong aa tel. (Matthai 26:56; Luka 22:24-26; Johan 18:10, 11) Mah a kong vialte nih Thawngṭha cauk a ṭialtu hna cu an dingfel i Jesuh kong kha hmaan tein an ṭial ti a langhter.
JESUH THAWHṬHANNAK KONG TAH ZEITIN?
Jesuh cu a rak nung i a thi timi cu mi tampi nih an cohlan ko nain a nung ṭhan timi kha cu mi cheukhat nih an zum lo. Lamkaltu pawl hmanh nih Jesuh a tho ṭhan timi kong an theihka ah cun an zum lo. (Luka 24:11) Asinain lamkaltu pawl le a dang zultu pawl nih a tho ṭhanmi Jesuh kha hmun dangdang le caan dangdang ah an hmuh tikah an lunghrinnak cu a tlau ṭhan. Voikhat cu minung 500 leng hmaiah Jesuh cu a lang.—1 Korin 15:6.
Jesuh zultu pawl nih tlaihkhih le thah kan tong kho ti an hngalh ko nain Jesuh a thoṭhan cang timi kong kha mi vialte sinah ralṭha tein an thanh. Jesuh a rak thattu hna sin hmanhah an thanh. (Lamkaltu 4:1-3, 10, 19, 20; 5:27-32) Jesuh a thoṭhan taktak ti kha an i fian lo ahcun zultu tampi cu ralṭhatnak an ngei kho lai maw? Jesuh a thoṭhan timi biatak cu mah thil sining hnu in atu chan tiang vawleicung ah Khrihfa an karhnak a ruang a si.
Jesuh a thihnak le a thawhṭhannak kong a langhtermi Thawngṭha cauk ah tuanbialei in zumhawktlak a sinak a kong hna a um. Ṭha tein na rel ahcun mah thil sining hna cu a cang taktakmi an si ti kha na zumh lai. Mah thil sining hna a cannak a ruang kha na hngalhthiam ahcun na zumhnak a fekchin lai. Mah kong kha a hnu capar nih a fianter lai.
^ cat. 7 AD 55 ah a chuahmi caṭialtu Tacitus nih hitin a ṭial: “[Khrihfa] timi min aa thawknak cu Khrih [Christus] in a si i Khrih cu Tiberius nih a uk lioah mangki bawi Pontius Pilat nih a rak thahmi a si.” Suetonius (kumzabu pakhatnak); Judah tuanbialei mifim Josephus (kumzabu pakhatnak) le Bithynia mangki bawi Pliny Ngakchia deuh (kumzabu pahnihnak a thawklei) hna zong nih Jesuh kong kha an rak cherhchan.
