HMAILEI CAAH NAA THIM KHAWHMI A UM TAKTAK MAW? Cheukhat nih a hlankan in khaukhih cia a si timi le vanṭhat, vanchiat timi cu mah tein i thim khawh a si lo tiah an ti. An hmuitinh an phak khawh lo tikah “khaukhih ciami a si, zeiti awk dah a ṭha” tiah an ti.

Namnehnak le dinlonak hna in luatnak lam an hmuh lo tikah an lung a dong. An nunnak a ṭhat deuh nakhnga an i zuam ko nain raltuknak, zaangennak, leiser ral le zawtnak hna ruangah an i zuamnak cu pakpalawng a si. Cucaah “zei ruangah dah kan lungre kan i theihter lai? tiah an ti.

Kan nunning ruangah kan i tinhmi ningin thil a cang tawn lo ti cu a hmaan ko. (Phungchimtu 9:11) Asinain zungzal ca a simi hmailei kong ah thim awk na ngei. Baibal nih na hmailei ruahchannak cu nangmah thimnak cungah aa hngat tiah a ti. Baibal chimmi kha zohhmanh u sih.

Hlanlio Isreal mi hruaitu a simi Moses nih Biakammi Ram an luh lai ah mi pawl kha hitin a ti hna: “Thihnak le vanchiatnak kha ka chiah. Nannih hmaiah nunnak le thihnak, thluachuahnak le chiatserhnak ka chiah kha a hngaltu ah nihin ah van le vawlei kha ka kawh hna. Cucaah nunnak kha i thim tuah u, nanmah le nan tefa hna nih nan nun nakhnga BAWIPA nan Pathian kha daw u law, a aw kha ngai u law, amah lei ah i bek tuah u.”—Deuteronomi 30:15, 19, 20.

“Nannih hmaiah nunnak le thihnak, thluachuahnak le chiatserhnak ka chiah . . . Cucaah nunnak kha i thim tuah u.”—Deuteronomi 30:19

Pathian nih Israel mi kha Izipt sal sinak in a luatter hna i Biakammi Ram ah nuam tein le zalong tein nunnak caanṭha a pek hna. Asinain mah cu um sawhsawhnak men in hmuh khawh a si lo. Mah thluachuah hmuh awkah ‘nunnak kha an i thim’ a hau. Zeitindah? ‘Pathian kha an dawt, a nawl an ngaih i amah lei ah an i beknak’ thawngin a si.

Tuchan zongah cu bantukin thim awk a um. Na hmailei nunnak cu nangmah naa thimmi cungah aa hngat. Pathian dawt awk, a bia ngaih awk le amah lei ah i bek awkah naa thim ahcun vawlei paradis ah zungzal nun dingin naa thimmi a si. Asinain mah ah zei hna dah aa tel?

Dawtnak cu Pathian i a hleikhunmi a sining pakhat a si. Lamkaltu Johan nih thiang thlarau lamhruainak thawngin “Pathian cu dawtnak a si” tiah a ṭial. (1 Johan 4:8) Cucaah zei nawlbia dah a ngan bik tiah an hal lioah Jesuh nih hitin a leh hna: “Bawipa na Pathian cu na lungthin dihlak le na ruahnak dihlak le na nunnak dihlak in na dawt lai.” (Matthai 22:37) Jehovah he a ṭhami pehtlaihnak ngeih timi cu ṭihnak, khuaruat loin a nawlngaihnak kha si loin dawtnak cungah aa ngatmi a si. Pathian dawt awkah zeicah kan i thim awk a si?

Jehovah nih minung a kan dawtnak cu nulepa dawtnak he aa lo. Dawtnak a ngeimi nulepa cu mitlinglo an si ko nain an fale nih nuamhnak le hlawhtlinnak an hmuh nakhnga an cawnpiak hna, tha an pek hna, an bawmh hna i an chimhhrinh hna. Nulepa nih zeidah an i ruahchan? An fale sinin dawtnak an i ruahchan. Cun nulepa nih kanmah ṭhatnak caah an kan cawnpiakmi a si ti kha hngalhter an duh hna. Cu bantukin vancung kan Pa zong nih a kan tuahpiakmi thil vialte caah kan sinin dawtnak le sunsaknak hmuh lai kha aa ruahchan ve awk a si ko lo maw?

A hrampi Baibal ah “ngaih” timi biafang cu “nawlngaih” timi sullam zong a ngei. Ngakchia pakhat kha, “Na nu le na pa bia ngai” tiah kan ti tikah an nawl ngai hna tiah kan ti duhmi a si ko lo maw? Cucaah Pathian bia ngai ti tikah Pathian bia cawn le ngaih kha a chim duhmi a si. Pathian bia cu kan hna in theih khawh a si lo caah Baibal kha rel in kan zulhnak thawngin a bia kan ngaih khawh.—1 Johan 5:3.

Pathian bia ngaih a biapitnak kong kha Jesuh nih hitin a langhter: “Minung hi rawl lawngin a nung kho lo, sihmanhsehlaw Pathian nih a chimmi bia paoh cu a nunnak a si lai.” (Matthai 4:4) Kan caah pumsa rawl a biapit bantukin Pathian kong hngalh i zuam cu a biapi chinchin. Zeicah? Siangpahrang Solomon nih hitin a ti: “Fimnak nih cun tangka tlukin lung hnangamnak a pek khawh i hngalhnak nih ṭhatnak a pek khawhmi cu hihi a si: hngalhnak a ngeimi nih cun fimnak a hmuh i fimnak nih cun him tein a umter.” (Phungchimtu 7:12) Pathian sinin a rami fimnak le hngalhnak nih a kan huhphenh khawh. Cun hmailei zungzal nunnak hmuh khawh awkah a ṭhami thimnak tuah ding zongin a kan bawmh khawh.

A hmasa capar ah kan i ruahmi Jesuh chimmi bia kha ruathmanh: “Nunnak a phanmi lam cu a har i a kutka cu a bi i mi tlawmte lawnglawng nih an hmuh.” (Matthai 7:13, 14) Mah lam i kan kal ahcun zungzal nunnak tiang kan phanh khawh nakhnga lamhruaitu ṭha ngeih le amah he naih tein um lawngah ṭhatnak kan hmu lai. Cucaah Pathian he naih tein kan um a hau. (Salm 16:8) Zeitindah naih tein kan um khawh?

Nitin ṭuan dingmi rian le ṭuan kan duhmi rian tampi a um. Cu bantuk thil caah kan caan kan hman dih i kan lung kan vaivuanhter ahcun Pathian nih tuahter a kan duhmi thil kha kan ruat kho ti lai lo. Cucaah Baibal nih hitin ralrin a kan pek: “Zeitindah kan nuncan a si ti kha ṭha tein i zoh u. Mihrut bantukin um hlah u, mifim bantukin um u. Atu kan nikhua hi caanchia a si caah caanṭha nan hmuhmi paohpaoh kha ṭha tein hman i zuam u.” (Efesa 5:15, 16) Pathian he kan i pehtlaihnak kha biapi bik ah kan chiah ahcun Pathian he kan i naih kho lai.—Matthai 6:33.

Hnulei caan kha na thleng kho ti lo nain nangmah le na dawtmi hna caah a ṭha tukmi hmailei ruahchannak kha naa thim khawh. Vancung kan Pa, Jehovah Pathian nih a kan dawt tuk ti le zeidah tuahter a kan duh ti kha Baibal nih a langhter. Profet Mikah chimmi bia hi zohhmanh:

“Nannih hmun kip kaa kip i a ummi vialte hna, Pathian nih cun thilṭha kha zeidah a si ti cu aan chimh cang ko ṭung hna; Aan halmi hna cu, ding tein thil ti le zaangfahnak ngeih le na Pathian hmai i fim tein khuasak kha pei a si ko cu.”—Mikah 6:8.

Amah he kalṭi in zungzal thluachuah hmu u timi Jehovah sawmnak kha na cohlang lai maw? Mah cu nangmah thim dingmi a si.