Jesuh nih a chimchung bantukin Pathian Pennak kong kha vawleicung pumpi ah chim a si. (Matthai 24:14) Daniel Baibal ah mah pennak cu Pathian Pennak a si tiah a ti. Dal 2nak ah hlanlio Babilon chan in atu chan tiang uktu a simi minung cozah asiloah pennak kong chimchungbia aa tel. Hmailei ah a cang dingmi kong he aa tlaiin caang 44 ah hitin a ti:

“Vancung Pathian nih pennak pakhat a ser lai i cu pennak cu zeitikhmanh ah a rawk lai lo; cu pennak cu midang sinah aa ṭhial lai lo; hi pennak vialte hi a hrawh dih hna lai i a donghter dih hna lai, sihmanhsehlaw cu pennak tu cu zungzal in a hmun lai.”

Mah chimchungbia le a dang Baibal chimchungbia hna nih Pathian Pennak nih minung uknak vialte a hrawh dih lai i vawleicung ah daihnak a umter lai ti kha a langhter. Pathian Pennak ah zei bantuk nunnak dah kan hmuh lai? A rauhhlan ah a tling dingmi biakam hna cu mah hna hi an si.

• RALDOHNAK A UM TI LAI LO

  Salm 46:9: “[Pathian nih] hi vawleicung pumpi ah ral cu a daihter dih ko hna, likuk cu a khiah hna i fei cu a hrawh dih hna phaw hna cu mei in a khangh dih hna.”

  Mi thahnak hriamnam sernak caah an hmanmi tangka le thiamnak hna kha minung ṭhathnemhnak caah hmang hna sehlaw vawlei sining cu zeitindah a um lai ti kha na mitthlam ah cuanter hmanh. Mah biakam hi Pathian Pennak ah cun a tling taktak cang lai.

• ZAWTNAK A UM TI LAI LO

  Isaiah 33:24: “Kan ram i a ummi cu ka zaw tiah an zai ti lai lo.’”

  Lung zawtnak, cancer, malaria asiloah a dang zawtnak hna a um ti lai lomi vawlei kong kha ruathmanh. Siizung kal le sii din hna a hau ti lai lo. Vawlei ah a tlingmi ngandamnak a um cang lai.

• MANGṬAM A UM TI LAI LO

  Salm 72:16: “Ram chungah rawl tampi in um ko seh; Lebanon tlang i a ummi rawl kung ṭha bantuk nih tlang vialte cu tuam dih hna seh.”

  Vawlei nih rawl a za in a chuahter lai i mikip nih an ei lai. Mangṭam le vitamin bau ti bantuk a um ti lai lo.

• FAHNAK, NGAIHCHIATNAK LE THIHNAK A UM TI LAI LO

  Biathlam 21:4: “[Pathian nih] an mitthli vialte kha a hnawh dih hna lai. Thihnak a um ti lai lo, ngaihchiatnak le ṭahnak le fahnak zong a um ti lai lo. Thil hlun vialte cu an lo dih cang a ti.”

   Vawlei paradis ah cun ahopaoh nih a tlingmi nunnak an ngei dih cang lai. Mah cu Sertu, dawtnak a ngeimi Jehovah Pathian i a biakam a si.

Cu bantuk thil sining cu a si kho taktak lai maw? Baibal nih bia a kan kamhmi nunnak cu a ṭha tukmi a si ko nain zungzal kan nung lai timi zumh awk tu cu a kong a phunphun ruangah hngalhthiam awkah an i harh. Mah cu khuaruahhar a si lo. Cu bantukin a nung balmi an um lo caah a si.

Minung nih sualnak le thihnak sal tangah sifahnak le harnak hna kha caan saupi an in caah mah bantuk nunnak cu a sawhsawh asiloah a phung a si tiah an ruah. Asinain a kan sertu Jehovah Pathian nih minung caah a tinhmi nunnak he cun aa thleidang tuk.

Pathian biakam vialte cu a tling hrimhrim lai ti kha hitin hmualngei tein a langhter: “Cu bantuk cu ka kaa in a chuakmi bia cu a si ve lai, ka sinah a lawngin a ra kir ṭhan lai lo, tuah seh tiah ka fialmi kha a tlolh lai lo i ka thlahhnawh chanmi thil ah khan a tlam a tling lai.”—Isaiah 55:11.

Baibal ah Jehovah cu “lih a chim kho lomi Pathian” a si tiah a ti. (Titas 1:2-4) A ṭha tukmi hmailei thil kha bia a kan kamh caah kanmah lei zongin hitin kan ruah ve awk a si: Biakammi vawlei paradis ah zungzal in nun ding timi cu a si kho taktak lai maw? Pathian biakam in ṭhathnemhnak kan hmuh khawh nakhnga zeidah kan tuah awk a si? Mah biahalnak i a phi kha hmuh awkah a changtu cahmai kha rel.