A ṬHA TUKMI RUAHCHANNAK A SI. A kan Sertu nih hi vawleicung ah zungzal nunnak kaan pek hna lai tiah bia a kan kamh. Asinain mi tampi nih cun an zum lo. ‘Minung cu a thi dingmi kan si. Thihnak le nunnak cu a um phung a si ko’ tiah mi cheukhat nih an ti. Cheukhat nih cun zungzal in nun khawh a si ko nain hi vawleicung ah cun a si lai lo tiah an ruah. Kan thih i vancung kan phanh hnu lawngah zungzal in kan nung kho lai tiah an ti. Nangtah zeitindah na ruah?

Mah biahalnak na leh hlanah a tanglei biahalnak pathum he aa tlaiin Baibal nih zeitindah a phi a pek ti kha zohhmanh: Minung ser kan si ning nih zei can tiang dah kan nun khawh ti kha zeitindah a langhter? Vawlei le minung caah Pathian i a hramthawk aa tinhnak cu zeidah a si? Minung nih zeitindah thihnak an ton?

Pathian nih a sermi vawleicung i thilnung vialte lakah minung hi aa thleidang bikmi kan si. Zeicah? Minung lawng hi Pathian ‘mui keng’ in le amah he “i lo” in ser an si tiah Baibal nih a ti. (Genesis 1:26, 27) Mah cu zei sullam dah a si? Dawtnak, dinnak ti bantuk Pathian sining hna minung nih an ngei tinak a si.

Cun khuaruah khawhnak, tuaktan khawhnak le a ṭha, ṭhalo kong ah thleidan khawhnak kan ngei i Pathian biak duhnak lungput zong kan ngei. Cucaah van le vawlei i lianngannak, khuaruahhar a simi kokek thil, music le bia zai hna kha kan sunsak khawh. Aa thleidang bikmi cu Sertu biak kan duhmi hi a si. Mah sining hna nih minung kha a dang thilnung hna he a kan thleidanter.

Mah kong hi ruathmanh: Pathian nih minung kha chikkhat lawng nung dingin a kan ser ahcun ri a ngei lomi, a ṭha tukmi mah sining hna he a kan ser chih lai maw? Mah aa thleidangmi sining hna a kan peknak a ruang cu vawleicung ah zungzal kan nun khawh nakhnga caah a si.

Vawleicung ah minung zungzal nun ding timi cu Pathian tinhnak a si lo tiah mi cheukhat nih an ti. Vawlei cu chikkhat umnak ca lawng a si, vancung ah Pathian he zungzal umṭi dingin ahodah aa tlak timi hneksaknak hmun a si tiah an ti. Cutin a si ahcun vawleicung i ṭhatlonak vialte cungah Pathian cu rian a ngei tinak a si lo maw? Mah cu Pathian sining hna he aa ralkah a si lo maw? Pathian kong he aa tlaiin Baibal nih hitin a ti: “A lam vialte cu  biading an si. Zumhawktlak le ṭhatlonak ngeilo Pathian a si, Amah cu a ding i a dik.”—Deuteronomi 32:4.

Vawlei ca i a hrampi Pathian tinhnak he aa tlaiin Baibal nih fiang tein hitin a ti: “Vancung khi cu BAWIPA ta an si, sihmanhsehlaw vawlei hi cu mi kha a pek hna.” (Salm 115:16) Pathian nih vawlei cu minung zungzal umnak caah dawh tein a ser. Sullam a ngei i zungzal in um khawhnak caah a herhmi vialte kha a kan pek.—Genesis 2:8, 9.

“Vancung khi cu BAWIPA ta an si, sihmanhsehlaw vawlei hi cu mi kha a pek hna.”—Salm 115:16

Minung ca i Pathian tinhnak he aa tlai zongin Baibal ah fiang tein hitin a chim. Hmasa bik minu le mipa kha “nan tefa cu vawleicung khuazakip ah khat hna seh, cun annih nih vawlei cu uk hna seh. . . . An dihlak cung i nawlngeihnak kaan pek hna,” tiah Pathian nih nawl a pek hna. (Genesis 1:28) Vawlei Paradis kha ṭha tein zohkhenh le vawleicung pumpi i karhter ding cu an caah tinvo sung taktak a si. Adam le Evi, cun an tefa pawl cu vancung ah si loin vawleicung ah zungzal nun ding ruahchannak an ngei.

Zeicah kan thih? Satan Khuachia tiah auhmi ralchanhtu thlarau minung pakhat nih Eden dum he aa tlaimi Pathian tinhnak kha hramhram in a hrawh tiah Baibal nih a ti. Zeitindah?

Satan nih Adam le Evi kha amah lei ah ṭang in Pathian ralchanh awkah a lem hna. Pathian nih minung ṭhatnak a pemi pakhatkhat kha a thuhkanh hna, phundang cun a hmaan, hmaan lo kong ah biakhiahnak nawl a pe hna lo tiah Satan nih sual a puh. Cucaah Adam le Evi nih Satan lei ṭang in Pathian kha an kaltak. A phichuak cu zeidah a si? Pathian nih a chim bantukin thihnak an tong. Vawlei Paradis ah zungzal nunnak ruahchannak kha an rak sung.—Genesis 2:17; 3:1-6; 5:5.

Adam le Evi ralchanhnak ruangah a chuahmi ṭhatlonak cu atu tiang minung cungah huham a ngei. Baibal nih hitin a ti: “Sualnak cu mipa pakhat [Adam] thawngin vawleicung ah hin a tlung i cu a sualnak nih cun thihnak kha a ratpi. Cun mi vialte cu an sual dih caah thihnak nih cun mi vialte cu a ciah dih hna.” (Rom 5:12) A hlankan in khaukhih cia a si ruang le hngalhthiam awkah a harmi Pathian ‘tinhnak’ ruangah si loin hmasa bik kan nu le kan pa sinin sualnak le thihnak ro kan co caah kan thihmi a si.

Eden dum i ralchanhnak ruangah vawlei le minung ca i Pathian tinhnak cu a rawk lo. Pathian nih a tlingmi a dawtnak le a dinnak ruangah minung kha sualnak le thihnak in luat khawhnak lam a kan serpiak. Lamkaltu Paul nih hitin a ti: “Sualnak man cu thihnak a si, sihmanhsehlaw Pathian laksawng cu zungzal nunnak a si i cu nunnak cu kan Bawipa Jesuh Khrih he aa pehtlaimi nunnak a si.” (Rom 6:23) Pathian nih dawtnak in “a Fapa ngeihchunte [Jesuh Khrih] kha a pek, cucaah amah a zummi paoh cu an thi lai lo, zungzal nunnak an ngei lai.” (Johan 3:16) Jesuh zong nih raithawinak caah amahle amah aa pekchanhnak thawngin Adam ruangah kan sunghmi thil vialte kha a kan tlanhpiak ṭhan. a

A rauhhlan ah Pathian nih bia a kan kamhmi vawlei paradis cu a tling taktak cang lai. “Hell ah a kalmi lam cu a kau i a fawi i mi tampi nih an zulh caah kutka bi chungah khan lut tuah u. Nunnak a phanmi lam cu a har i a kutka cu a bi i mi tlawmte lawnglawng nih an hmuh” timi Jesuh bia kha na zulh ahcun a ṭha tukmi hmailei ruahchannak na ngei kho. (Matthai 7:13, 14) Na hmailei ruahchannak cu nangmah kut chungah a um. Zeidah na tuah lai?