Leiser Ral Ton Tikah
LEISER RAL in a luatmi na si ahcun midang nih launak, lung tuaitamnak, lungretheihnak le mangchia manh ti bantuk an tonmi kha ṭha tein na hngalhthiam ko lai. Leiser ral in a luatmi tampi cu an lung a dongh tuk caah i zuam ṭhan duhnak lungthin hmanh an ngei ti lo.
Nang zong leiser ral ruangah na ngeihmi thilri vialte a sung dihmi na si ahcun lungretheihnak kha ka ing kho ti lo tiah na ruah ve men lai. Nun man ka ngei ti lo ti hmanhin na hun ruah men lai. Asinain Baibal nih nun man cu a phu i a ṭha deuhmi hmailei ruahchannak na ngei kho tiah a ti.
Baibal Biatak nih Ruahchannak a Kan Ngeihter
Phungchimtu 7:8 nih “thil donghnak hi a hramthawknak nakin a ṭha deuh” tiah a ti. Leiser ral na ton tikah na nunnak cu ruahchannak a um lomi a lo men lai. Asinain lungsau tein na nunnak kha a thar in na domh ṭhan tikah thil sining cu a ṭha ṭhan kho.
Baibal nih “ṭahnak a um ti lai lo i bawmhnak hal zong a herh ti lai lo” tiah a chimchung. (Isaiah 65:19) Mah cu Pathian Pennak tangah vawlei kha paradis ah ser a si tikah a tling lai. (Salm 37:11, 29) Zeitikhmanh ah leiser ral a um ti lai lo. Lianngan Bik Pathian nih “hlanlio thil cu a philh in philh an si cang lai” tiah bia aa kam. Cucaah leiser ral ruangah kan inmi pumsalei le lungthinlei fahnak hna cu zungzal in philh a si cang lai.—Isaiah 65:17.
Mah hi ruathmanh: Sertu nih Pathian Pennak tangah a daimi nunnak a simi ‘hmailei ruahchannak’ kha a kan timhpiak. (Jeremiah 29:11, NW) Mah biatak hngalhnak nih nun man cu a phu ko timi ruahnak aan ngeihter maw? A hmasa capar ah langhtermi Sally nih hitin a ti: “Hmailei ah Pathian Pennak nih a kan tuahpiak hngami a ṭha tukmi thil kong kha atu le atu na ruah ahcun mah nih hlanlio ah na tonmi thil ṭhalo kha ruah lo awk le atu ah na tonmi thil kha inkhawh awkah aan bawmh lai.”
Pathian Pennak nih minung caah a tuah laimi kong kha tam deuh in hlathlai. Cutin na tuah ahcun leisal ral na ton hmanhah leiser ral a um lonak hmailei caan a naih cang caah nun man cu a phu ko ti kha na zumh khawh lai. Atu zongah Baibal nih leiser ral ruangah a chuakmi harnak hna kha inkhawh awkah zulh awk a tlakmi lamhruainak aan pek. Tahchunhnak tlawmpal in zohhmanh hna u sih.
