Dawtmi Pakhatkhat nih Thihtak tikah
NANG ZONG na dawtmi pakhatkhat nih aan thihtak ahcun ngaihchiatnak, lilennak le bawmtu ka ngei ti lo timi ruahnak na ngei ve men lai. Thinhunnak, sualnak ka ngei timi ruahnak le ṭihnak hna zong na ngei men lai. Nun man hi a phu maw ti hmanhin na ruah men lai.
Caan saupi na ngaih a chiat hmanhah mah cu a palh lo. Mah nih zeitluk in dah na dawt ti kha a langhter. Asinain na ngaihchiatnak a zorter khomi lam pakhatkhat a um maw?
Tawnghtham Khawh Ning Lam Cheukhat
Na ngaihchiatnak cu a dong ti lomi a lawh hmanhah a tanglei ruahnak cheuhnak na zulhnak thawngin hnemhnak na hmu kho:
Ngaihchiatnak Langhternak caah a Caan Pe
Kan ngaihchiat ning asiloah zei can tiang dah kan ngaih a chiat ti cu aa lo cio lo. Na ṭahmi nih na ngaihchiatnak kha zorter awkah aan bawmh khawh. A hmasa ah langhtermi Vanessa nih hitin a ti: “Ka lungfahnak a dam deuh nakhnga ka ṭap tawn.” Ruahlopi in a naunu nih a thih takmi Sofia nih hitin a ti: “Ka tonmi kong ka ruah tikah ka lung a fak tuk. Mah cu hma ṭawlpiak bantuk a si. Mah fahnak cu in awkah a har tuk asinain mah nih hma kha a damter khawh.”
Na Ruahnak le Na Intuarnak kha Phuang
A caan ah nangmah lawngin um na duhmi cu a phung a si ko. Asinain ngaihchiatnak cu thilrit phorh i zuam bantuk a si. A pa nih a thih takmi kum hlei sarih a simi Jared nih hitin a ti: “Ka intuarnak kong kha midang ka chimh hna. Ṭha tein cun ka chim dih hna lo. Asinain cutin ka intuarnak kong ka chimh hna caah kaa nuam tuk.” A hmasa capar ah langhtermi Janice nih a dang ṭhatnak a hmuhmi kha hitin a chimchap: “Midang he bia kan i ruah tikah hnemhnak taktak ka hmu. Midang nih ka intuarnak kha an hngalhthiam tiah ka ruah i ka li a leng ti lo.”
Bawmhnak kha Cohlang
Siibawinu pakhat nih hitin a ti: “Dawtmi pakhatkhat thihtaknak a tongmi hna nih an hawile le an rualchan hna sinin bawmhnak an cohlan ahcun an ngaihchiatnak kha inkhawh awkah a fawi deuh lai.” Na hawile nih bawmh an in duh ko nain zeitindah kan bawmh lai ti kha an hngal men lai lo. Cucaah bawmh na herhmi kha hngalhter hna.—Phungthlukbia 17:17.
Pathian Kha Naih
Tina nih hitin a ti: “Ka vapa ruahlopi in cancer zawtnak in a thih tikah ka harnak, ka lungretheihnak le ka intuarnak kong kha Pathian sinah ka chim dih. Ka intuarnak kha bawmh awkah nifate Pathian sinah thla ka cam. Ka cammi lengin Pathian nih lam tampi in a ka bawmh.” A nu nih a thihtak lioah kum 22 a simi Tarsha nih hitin a ti: “Nifate Baibal relnak nih hnemhnak a ka pek. Mah nih thazaang a ka ngeihter hngami kong kha ruah awkah a ka forh.”
Thawhṭhannak Kong kha Na Mitthlam ah Cuanter
Tina nih hitin a ti chap: “A hmasa ahcun keimah nih ka vapa kha ka herh i ka fapale nih an pa kha an herh caah thawhṭhannak ruahchannak nih hnemhnak a ka pe lo. Asinain atu cu kumli a si cang i mah ruahchannak cu ka caah a biapi tukmi a si cang. Mah cu ka nunnak cheubang hmanh a si cang. Ka hmuh ṭhan lai tiah ka mitthlam ah ka cuanter i mah nih lawmhnak le daihnak a ka ngeihter.”
Na ngaihchiatnak cu a ṭhat colh lo hmanhah duhsah tein a tlau kho. Mah kha Vanessa hmuhtonnak in hngalh khawh a si. Hitin a ti: “Na intuarnak cu a ṭha kho ti lai lo tiah na ruah ko lai nain duhsah duhsah in na ngaihchiatnak cu a tlau ko lai.”
Na dawtmi, a thimi kha na philh khawh lo hmanhah nun man cu a phu rih ko ti kha philhhlah. Pathian bawmhnak thawngin hawikom ṭha le sullam a ngeimi nunnak na ngei kho. A rauhhlan ah Pathian nih a thimi vialte kha a thawhter ṭhan hna lai. Na dawtmi a thimi hna he tonter ṭhan aan duh. Cun na ngaihchiatnak kha zungzal in a damter cang lai.