NUN KA duh ti lo timi ruahnak na ngei bal maw? Na ngeih bal ahcun Adriana intuarnak kha na hngalhthiam ko lai. Lungretheihnak le ngaihchiatnak tampi a tong i ruahchannak a ngei lo. Adriana cu lung dongh zawtnak a ngei.

A zawmi, kum upa a nu le a pa a zohkhenhmi, Japan ram i Kaoru kong zong hi ruathmanh. Kaoru nih hitin a ti: “A caan ah rianṭuannak zongah lungretheinak ka ton caah ka lungretheihnak cu a zual chin. Ka rawl ei kaa a thaw lo i ṭha tein kaa hngilh kho lo. Ka thih ahcun ka tonmi buaibainak hi a tlau dih lai timi ruahnak ka hun ngei.”

Nigeria ram ah a ummi Ojebode nih “Ka ngaih a chia zungzal i ka ṭap, cucaah thihnak lam kha ka kawl” tiah a ti. Lunglawmh awk ngai a simi cu Ojebode, Kaoru le Adriana cu anmahle anmah an i that lo. Asinain kum fatin mi thong tampi cu anmahle anmah an i that.

Mahle mah aa thatmi tam deuh cu pa an si, an lak i mi tampi cu bawmhnak hal awkah a ningzah a pang tukmi an si. Jesuh nih a zawmi hna nih siibawi an herh tiah a ti. (Luka 5:31) Na lung a dongh tuk caah mahle mah i thah ding tiang in na ruah ahcun bawmhnak hal awkah na ningzak hlah. Lung dongh zawtnak a ngeimi tampi cu siilei thlopnak nih an intuarnak a ṭhat deuh nakhnga le inkhawhnak an ngeih nakhnga a bawmh hna. Ojebode, Kaoru le Adriana zong siithlopnak an hmu i atu cu an intuarnak kha ṭha deuh in an tawnghtham khawh cang.

Siibawi pawl nih siithlop ning a phunphun kha hmangin lung dongh zawtnak a ngeimi hna kha an thlop men hna lai. Cubantuk zawtnak a ngeimi hna nih an chungkhar le an hawile sinin hngalhthiamnak, lungsaunak, zohkhenhnak le bawmhnak zong an herh. Mikip nih ngeih khawhmi hawikom ṭha bik cu A Bia, Baibal in a ṭha tukmi bawmhnak a kan petu Jehovah Pathian a si.

Lung dongh zawtnak a ngeimi hna cu caan saupi thlop an hau men lai. Cun an ziaza zong kha an thlen a hau men lai. Lung dongh zawtnak a ngeimi na si i Ojebode nih a tuah bantukin na tuah ahcun a nuammi hmailei nunnak na hmu kho. Hitin a ti: “Isaiah 33:24 chimchungbia a tlin lai kha kaa ngaih tuk. Mah ah vawleicung mi hna nih ‘ka zaw tiah’ an chim ti lai lo tiah a ti.” Ojebode bantukin “fahnak” a um ti lai lonak “vawlei thar” he aa tlaimi Pathian biakam in thazaang i lak. (Biathlam 21:1, 4) Mah ah lungthinlei le ruahnaklei he aa pehtlaimi fahnak vialte a um ti lai lo timi biakam aa tel. Fahnak na inmi vialte cu zungzal in a lo dih lai. Zeitikhmanh ah fahnak na inmi kha na hngal ṭhan ti lai lo i “a philh in philh an si cang lai.”—Isaiah 65:17.