A HMASA capar ah harnak nih zeitindah nunnak cu ruahchannak a um lomi a lawhter timi kong kha a langhter. Pumpak buaibainak na ngeih tikah nun man hi a phu maw asiloah aho tal nih ka cungah siaherhnak an ngei hnga maw tiah na ruah men lai. Pathian cu na lungretheihnak cungah siaherhnak a ngei ti kha zum. A caah na sunglawi.

Salm caṭialtu pa nih Pathian aa bochannak kong kha Salm 86 ah hitin a langhter: “Ka thlacamnak kha na ka leh tawn caah harnak caan ah nangmah kha kaan auh lengmang.” (Salm 86:7) ‘Pathian nih “harnak caan ah” ka thlacamnak zeitindah a ka leh?’ ti kha hngalh na duh men lai.

Pathian nih na tonmi buaibainak kha a tawngtham colh lai lo nain tawnghtham awkah lungdaihnak aan pek khawh ti kha a Bia, Baibal nih aan zumhter. “Zei thil kong hmanhah lungrethei in um hlah u. Thla nan camnak ah Bawipa cu nan herhmi kha hal u law nan hal tikah lunglawm tein hal zungzal u. Cun Pathian daihnak, minung hngalhnak a lonhtu nih cun, . . . nan lungthin le nan ruahnak cu him tein a chiah lai.” (Filipi 4:6, 7) Pathian nih a kan zohkhenh taktak ti a kan zumhter khomi a tanglei Baibal caang hna kha ruat.

“An lak i [pithlung] pakhat hmanh khi Pathian nih a philhmi hna an um lo. . . . Pithlung tampi nakin pei nan sun deuh cu.”—Luka 12:6, 7.

RUATHMANH: Mi tampi caah va hmete a simi pithlung cu man a ngei lomi a lo ko nain Pathian nih cun ṭha tein a zohkhenh hna. Pathian nih va hmete a simi pithlung hmanh kha a hngalh hna, thilnung kip cu a caah an sunglawi. Minung cu Pathian caah pithlung nakin kan sunglawi deuh. Minung cu vawleicung i Pathian thil sermi lakah a biapi bikmi kan si. Cun amah ‘mui keng’ in a kan ser caah a sining hna kha kan ngei kho i kan langhter khawh.—Genesis 1:26, 27.

“BAWIPA, na ka kawl dih hirhiar i na ka hngalh dih cikcek. . . . Ka ruahnak vialte cu na hngalh dih. . . . Ka hneksak law ka ruahnak hi hmu ko.”—Salm 139:1, 2, 23.

RUATHMANH: Pathian nih ṭha tein aan hngalh. Na ruahnak le na intuarnak kha a hngalh dih. Midang nih na lungretheihnak kong kha an hngalhthiam lo hmanhah Pathian nih cun aan zohkhenh i bawmh aan duh. Cucaah nun man cu a phu ko.

“Maw BAWIPA, ka thlacamnak cu ka ngaihpiak law nangmah bawmhnak hal ah ka aunak cu ka theihpiak ko.  . . Ka aunak cu ka ngaihpiak law khulrang in ka let tuah.  . . Kaltak cia a mi kha an thlacamnak a ngaihpiak hna lai.” —Salm 102:1, 2, 17.

RUATHMANH: Jehovah nih sifah harnak ruangah a ṭapmi hna i an mitthli kha a hmuh. (Salm 56:8) Mah ah na mitthli zong aa tel. A caah na sunlawi caah Pathian nih na mitthli le na ṭahmi kha aa cinken.

“Keimah cu na Pathian ka si, zeihmanh ṭih hlah. Kaan ṭhawnter lai i kaan bawmh lai. . . . Keimah cu BAWIPA nan Pathian ka si. . . . ‘Nan thinphang hlah u, kaan bawmh hna lai,’ tiah keimah nih ka ti.”—Isaiah 41:10, 13.

RUATHMANH: Pathian cu nangmah bawmh awkah timhcia a si. Na tluk hmanhah aan thawh lai.

“Pathian nih vawlei hi a dawt hringhran caah a Fapa ngeihchunte kha a pek, cucaah amah a zummi paoh cu an thi lai lo, zungzal nunnak an ngei lai.”—Johan 3:16.

RUATHMANH: Pathian nih aan dawt tuk caah a Fapa, Jesuh raithawinak kha na caah lungtho tein aan pek. Mah raithawinak nih a nuammi nunnak le zungzal nunnak ruahchanhnak aan pek. *