Cu bantukin a rauhhlan ah kan dihlak in Jesuh nih ‘harnak nganpi’ tiah a auhmi “thlichia” nih a kan hranh cang lai. (Matthai 24:21) Mah thil sining kha kan hrial kho lo. Asinain kan i kilven khawh nakhnga thil cheukhat kan tuah khawh. Mah cu zeidah a si?

Jesuh Khrih nih Tlangcung Cawnpiaknak ah mah lamhruainak hi a pek hna: “Pathian Pennak le zeidah tuah hna seh ti a kan duh timi kha biapi deuh in ruat u.” (Matthai 6:33) Cutin zeitindah kan tuah khawh?

Pathian Pennak kha hmasa bik ah kawl. A sullam cu Pathian Pennak kha zei dang thil vialte nakin a biapi bik ah kan chiah awk a si tinak a si. (Matthai 6:25, 32, 33) Zeicah cutin kan chiah awk a si? Zeicahtiah minung nih kan tonmi buaibainak kha kan tawnghtham khawh lo caah a si. Pathian Pennak lawng nih mah buaibainak kha a tawnghtham khawh.

A dinnak kha kawl. Pathian i a dingmi a nawlbia le a phunglam ningin nun awkah kan i zuam ding a si. Zeicah? Zeicahtiah a hmaan le hmaan lo kong ah kanmah tein biakhiahnak kan tuah ahcun a phichuak cu a ṭha lomi a si lai. (Phungthlukbia 16:25) Phundang in cun Pathian duh ningin kan nun ahcun Pathian lung kan lawmhter lawng si loin kanmah zong ṭhathnemhnak kan hmu lai.—Isaiah 48:17, 18.

Pathian Pennak le a dinnak kha hmasa bik ah kawl zungzal. Mi cheukhat nih tangka tampi kan ngeih ahcun kan him lai tiah an ruah lai i lam an tlau lai  tiah Jesuh nih ralrin a kan pek. Mi cheukhat nih cun nunnak kong he aa tlaiin an lungre a theih tuk caah a biapi bikmi a simi Pathian Pennak caah a caan an pe kho ti lo.—Matthai 6:19-21, 25-32.

Asinain Jesuh nih Pathian Pennak a bawmmi hna nih atu ah an herhmi kha an hmuh lai i hmailei zong ah zungzal in thluachuah an hmu lai tiah bia a kan kamh.—Matthai 6:33.

Kumzabu pakhatnak i Jesuh zultu hna nih Pathian Pennak le a dinnak kha hmasa bik ah an rak kawl ko nain an nun chungah sifah harnak a donghmi kha an rak hmu lo. Asinain huhphenh an rak si. Zeitin in dah?

Pathian i a dingmi a phunglam ningin an nunnak thawngin Pathian chimmi zei a rel lomi hna nih an chuahtermi harnak in huhphenh an rak si. Pennak cung i a fekmi an zumhnak nih buaibainak tampi an ton hmanhah inkhawhnak ngeih awkah a bawmh hna. Pathian nih “thil ti khawhnak ṭhawnnak” a pek hna caah mah buaibainak hna kha an tei khawh.—2 Korin 4:7-9.

Kumzabu pakhatnak i Khrihfa hna nih Pennak kha hmasa bik ah kawl u timi Jesuh nawlpekmi kha an rak ngaih. An pawngkam hmunhma tampi ah Pennak kong thawngṭha kha an rak chim. (Kolose 1:23) Tuchan ah tah cutin a tuahmi an um maw?

An um. Jehovah Tehte Hna nih a rauhhlan ah Pathian Pennak nih hi vawlei ṭha lo hi a donghter cang lai ti kha an hngalh. Cucaah Jesuh chimmi mah rian hi an si khawh chungin an ṭuan: “Miphun vialte hna ca i tehte si awkah Vancung Pennak kong Thawngṭha hi khuazakip ah chim a si lai, cun cu hnu lawngah cun donghnak cu a si lai.”—Matthai 24:14.

Mah thawngṭha kha zeitindah na lehrulh lai? Kumzabu pakhatnak i Masidonia ram ah a ummi Berea khuami hna kha i zohchunh dingin kan in forh. Berea khuami hna nih lamkaltu Paul sinin Pennak kong thawngṭha an theih tikah “a chimmi kha lungtho tein an ngaih” i an cohlan. Cun an theihmi kong kha a si taktak maw, si taktak lo ti hngalh awkah ‘Cathiang chungah ṭha tein an kawl’ i an cawnmi ningin an zulh.—Lamkaltu 17:11, 12.

Nang zong cutin na tuah khawh ve. Pathian Pennak le a dinnak hmasa bik ah na kawlnak thawngin atu ah himnak le huhphenhnak na hmu lai i hmailei ah zungzal daihnak le himnak zong na hmu lai.