• Pathian nih a thimmi a si. “Zion ka tlang thiang cungah . . . miphun vialte hi nangmah kaan pek dih lai; vawlei hi a dihlak in nangmah ta a si lai.”—Salm 2:6, 8.

• Siangpahrang David rocotu a si. “Kan caah ngakchia pakhat a chuak! Fapa pakhat pek kan si . . . A lianhngannak cu a ṭhang chin lengmang lai; a ram cu a dai zungzal lai. Siangpahrang David tefa pakhat bantukin a ram cu a uk lai i atu thawkin caan donghnak tiang, hmaante le ding tein a uk lai.”—Isaiah 9:6, 7.

• Bethlehem ah a chuak. “Sihmanhsehlaw Bethlehem . . . , Nangmah chungin . . . uktu a chuak lai . . . A lianhngannak nih khan vawlei deng tiang a phak lai.”—Mikah 5:2, 4.

• Mi nih an ralchanh lai i an thah lai. “Ahohmanh nih a zoh hmanh kan rak zoh duh lo — zei ah a rel in kan rak rel hrimhrim lo. . . . sihmanhsehlaw hma a in cu kan sual ruangah a rak si i tuknak a huah cu kan ṭhat lo ruangah a rak si.”—Isaiah 53:3, 5.

• Thihnak in a tho lai i sunparnak pek a si lai. “Mithi khua ah khan na ka kaltak lai lo le na dawtmi cu Khor Thuk chungah na ka chiah tak lai lo caah a si. . . . ka sinah na um caah lawmhnak in ka khat i na ka bawmh caah nuamhnak ka hmu zungzal.”—Salm 16:10, 11.

Minung tuanbia lakah sining a tlinh bikmi Uktu ṭha cu Jesuh Khrih lawng a si. Vancungmi nih Jesuh nu, Mary kha hitin a ti: “Siangpahrang David bawiṭhutdan kha Pathian nih amah cu a pek i, . . . a pennak cu zeitikhmanh ah a dong lai lo.”—Luka 1:31-33.

Jesuh cu vawleicung ah uktu a si bal lo. Mah canah vancung ah Pathian Pennak Siangpahrang in minung pawl kha a uk hna lai. Zeinihdah a ṭha bikmi Uktu a siter? Vawleicung a um lioah Jesuh nih a tuahmi kong kha ruathmanh.

•   Jesuh nih mi pawl kha an zawn a ruah hna. Jesuh nih pa le nu, mino le upa kha a bawmh hna i an hnulei sining asiloah an rum, an sihfah kha biapi ah a chia lo. (Matthai 9:36; Marka 10:16) Thinghmui zawtnak a ngeimi pa nih “na duh ahcun na ka thianter khawh ko” tiah a nawl lioah Jesuh nih a zaang a fak tuk i a rak damter.—Marka 1:40-42.

• Jesuh nih Pathian lunglawmhter khawh ning kha a kan cawnpiak. Hitin a ti: “Pathian le tangka cu an rian nan ṭuan kep kho lai lo.” Mi nih kan cungah tuah hna seh ti nan duh bantukin midang cung zongah va tuah ve u ti zongin a ti. Mah cu Sui Nawlbia tiah auh a si. Cun Pathian nih kan tuahmi lawng si loin kan ruahnak le kan intuarnak zong hngalh a duh ti kha Jesuh nih a kan hmuhsak. Cucaah Pathian lunglawmhter kan duh ahcun kan ruahnak le kan lungthin kha kan uk a hau. (Matthai 5:28; 6:24; 7:12) Cun nuamhnak taktak kan hmuh khawh nakhnga Pathian nih tuahter a kan duhmi kha cawng in mah ningin tuah a hau ti kha Jesuh nih a hleiin a kan cawnpiak.—Luka 11:28.

• Jesuh nih midang dawt khawh ning kong kha a kan cawnpiak. Jesuh bia le tuahsernak cu hmual a ngei tuk, cucaah a bia a ngaitu hna kha an lung a suk tuk hna. “Mizapi cu a cawnpiak hna ning ah khan an khuaruah a har ko. Phungbia a cawnpiaktu hna bantuk khan si loin hmualngei ngaiin a cawnpiak hna.” (Matthai 7:28, 29) “Nan ral kha va daw hna u” tiah a cawnpiak hna. Amah a thattu mi cheukhat ca hmanhah hitin thla a cam: “Ka Pa, ngaithiam hna. An tuahmi kha zei a si ti awk an hngal lo.”—Matthai 5:44; Luka 23:34.

Midang a bawm i zaangfahnak a langhtermi Jesuh cu vawleicung Uktu si awkah sining a tlinh bikmi a si. A si ahcun zeitikah dah a uknak cu aa thawk lai?