Baibal nih ralchanhtu vancungmi pakhat, a hnuah Satan Khuachia tiah auhmi nih Pathian i a dingmi a uknak kha a zuamcawh tiah a ti. Pathian lamhruainak le uknak a um lo ahcun minung nunnak cu a nuam deuh lai tiah a ti. Ngaihchiat awk ngai a simi cu hmasa bik kan nu le kan pa Adam le Eve nih Satan hnu kha an zulh i Pathian kha an ralchanh.—Genesis 3:1-6; Biathlam 12:9.

Adam le Eve nih an Uktu Pathian kha an ralchanh caah Paradis le a tlingmi ngandamnak he zungzal nun ding timi kha an rak sung. (Genesis 3:17-19) An biakhiahnak nih a hnu i an tefa tiang harnak a pek hna. Baibal nih Adam sualnak ruangah “sualnak cu mipa pakhat thawngin vawleicung ah hin a tlung i cu a sualnak nih cun thihnak kha a ratpi” tiah a ti. (Rom 5:12) Sualnak nih ngaihchiat awk ngai a simi mah thil zong hi a chuahter: “Minung uknak nih harnak a chuahter.” (Phungchimtu 8:9, NW) Phundang in cun, minung nih anmah le anmah an i uk tikah buaibainak cu a tam chinchin.

Baibal ah minung uktu a hmasa bik cu Nimrod a si tiah a ti. Nimrod nih Jehovah uknak kha a ralchanh. Nimrod chan thawkin nawlngeitu pawl nih an nawlngeihnak kha ningcang loin an hman. A luancia kum 3,000 hrawngah Siangpahrang Solomon nih hitin a ti: “Hremmi hna cu an ṭap lengmang, sihmanhsehlaw ahohmanh nih an bawm hna lo. Anmah a hremtu hna kha thil ti khawhnak a ngeimi cu an si caah ahohmanh nih an bawm duh hna lo.”—Phungchimtu 4:1.

Tuchan minung uknak zong cutin a si ve. 2009, United Nation chuahmi cauk pakhat nih “tuchan kan vawlei ah a ṭha lomi thil hna a cannak a ruang bik” cu a ṭha lomi uknak ruangah a si tiah a ti.

Vawlei nih a ṭha deuhmi uktu le cozah a herh. Cutin tuah dingin Sertu nih bia aa kam.

Pathian nih Pennak pakhat asiloah cozah pakhat a dirh lai i mah nih minung uknak kha a airolh lai, cun “cu pennak tu cu zungzal in a hmun lai.” (Daniel 2:44) Mah cu mi nuai tampi nih thla an cammi Pennak kha a si. (Matthai 6:9, 10) Asinain mah cozah cu Pathian nih a uk dingmi a si lo. Mah canah minung pakhat kha Uktu in rian a pek. Pathian nih ahodah a thim?