Vawlei Thar Ah Zeitindah Na Nun Khawh?
A hmasa capar ah Pathian nih a ṭhalomi minung phu le buaibainak vialte kha a rauhhlan ah a hrawh cang lai timi kong kha a langhter. Cutin a cang lai tiah kan zumh khawh. Zeicah? Pathian Bia, Baibal ah hitin bia a kan kamh caah a si:
“Vawlei . . . hi an lo cuahmah cang.”—1 JOHAN 2:17.
A cunglei Baibal caang zongah bia a kan kamh caah a luat dingmi pawl an um lai ti kha kan zumh khawh:
“Pathian duhnak a tuahmi cu zungzal in an nung.”
Cucaah luat kan duh ahcun Pathian duhnak kan tuah a hau. Pathian duhnak hngalh awkah amah kha kan hngalh hmasa a hau.
Pathian “Hngalhnak” Nih A Donghnak Ah A Kan Luatter
Jesuh nih hitin a ti: “Pathian taktak a simi nangmah hngalh le nangmah nih na thlahmi Jesuh Khrih hngalh hi zungzal nunnak cu a si.” (Johan 17:3) A donghnak ah, kan luat i zungzal nunnak kan hmuh nakhnga Pathian kong kha ‘kan hngalh’ a hau. A sullam cu Pathian a um ti zumh le a kong tlawmpal lawng hngalh in a za lo tinak a si. Amah he hawikom kan si a hau. A fekmi hawikomhnak ngeih kan duh ahcun kan hawile he a caan kan hmanṭi a hau. Pathian he kan i hawikomhnak zongah cutin a si ve. Pathian he a fekmi hawikomhnak ngeih awk le ṭhanchoter awkah a kan bawm khomi, Baibal in kan cawn khawhmi, a biapimi biatak kong cheukhat kha i ruah hna u sih.
Nifatin Pathian Bia, Baibal Kha Rel
Pathian bawmhnak caah thla na camnak thawngin le a duhnak na tuahnak thawngin vawlei donghnak in na luat kho
Ni fatin kan nun khawh nakhnga hmaan tein rawl kan ei. Asinain Jesuh nih hitin a ti: “Minung hi rawl lawnglawng in a nung kho lo, sihmanhsehlaw Pathian nih a chimmi bia paoh cu a nunnak a si lai.”—Matthai 4:4.
Tuchan ah, Jehovah bia kha Baibal ah kan hmuh khawh. Mah a sunglawi tukmi cauk kha na hlathlai ahcun Pathian nih hlanah zeidah a tuah, atu ah zeidah a tuah i hmailei ah zeidah a tuah lai timi kong kha na hngalh lai.
Bawmhnak Caah Pathian Sinah Thlacam
Pathian nawl kha ngaih kan duh ko nain Pathian nih a palh tiah a timi thil kha ngol awkah kan i harh ahcun zeidah kan tuah khawh? Mah bantuk caan ah Pahtian kong kha ṭha tein kan hngalh ahcun mah cu kan caah bawmtu taktak a si kho.
A ziaza a rak rawkralmi Sakura timi nu kong hi ruathmanh. Baibal a hlathlai tikah “nupa sualnak kha hrial ko u” timi Pathian nawlpekmi kha a hun hngalh. (1 Korin 6:18) Sakura nih mah a ṭha lomi ziaza kha a ngol khawh nakhnga le thazaang a ngeih khawh nakhnga Pathian sinah thla a cam. Asinain lemsoinak kha cu a doh peng rih. Hitin a ti: “Ka lungchung ah a ṭha lomi ruahnak a hun chuah tikah mah cu keimah lawngin ka do kho lai lo ti kha ka hngalh caah Pathian sinah lungtak tein thla ka cam. Mah thlacamnak hmual nih Jehovah he a ka naihter.” Sakura bantukin mi nuai tampi zong nih Pathian kha an hun hngalh. Pathian nih an nunnak thlen awk le a lung a lawmhtermi lam in nun awkah an herhmi thazaang kha a pek hna.—Filipi 4:13.
Pathian kong na hngalh deuh tikah Pathian nih a sunglawi tukmi a hawi pakhat in “aan hngalh” lai. (Galati 4:9; Salm 25:14) Cun Pathian vawlei thar zongah na nung kho lai. Asinain mah vawlei thar cu zeidah a lawh lai? A hnu capar nih mah kong kha a fianter lai.
^ cat. 15 Jehovah timi cu Baibal ah langhtermi Pathian min a si.