Dawtmi pakhatkhat nih thihtak ruangah a ngaih a chiami na hawi pakhatkhat kha na hmuh tikah zei tuah awk hngal loin na um bal maw? A caan ah zeidah chim ding, zeidah tuah ding ti na hngalh lo caah zeihmanh chim lo le tuah loin na um kho men. Asinain na tuah khawhmi, a caah bawmtu a simi thil hna a um ko.

Caan tam deuh ah cun “ka lung a ṭha lo” tiah bia sawhsawh te chim in a pawngah kan umpi ahcun a za ko. Nunphung tampi ah a ngaih a chiami pakhat kha va kuh asiloah a kut va tlaihnak thawngin a zawn kan ruah kha langhter khawh a si. Ngaihchiatnak a tongmi chungkhar nih biaruah aan duh ahcun lungsau tein le ṭha tein ngaihpiak. A ṭha bikmi cu ngaihchiatnak a tongmi chungkhar nih an duh ahcun an caah thil pakhatkhat na tuahpiak khawh hna. Rawl chuan, an fale zohkhenh asiloah ruakvuinak he aa tlaiin timhtuahpiak ti bantuk thil pakhatkhat kha tuahpiak hna. Cu bantuk tuahsernak hna cu bia dawhdawh le bia ṭhaṭha chim nakin hmual a ngei deuh.

A hnuah a thimi i a ziaza ṭha asiloah a nuammi hmuhtonnak kong hna na chimh khawh hna. Cu bantuk kong i ruahnak nih ngaihchiatnak a tongmi chungkhar kha a nuamhter hna lai. Tahchunhnak  ah, a vapa Ean nih a thihtaknak kumruk a si cangmi Pam nih hitin a chim: “A caan ah mi nih Ean he aa tlaiin ka hngalh bal lomi a ṭhatnak hna an ka chimh tikah kaa lawm tuk.”

Hlathlaitu hna nih ngaihchiatnak a tongmi chungkhar cu a hmasa ah bawmhnak tampi an hmu ko nain an hawile cu anmahle an rian cio he an si caah tlawmpal ah an philh ṭhan tawn hna tiah an ti. Cucaah ngaihchiatnak a tongmi chungkhar kha a hnu zongah pehtlaihnak tuah lengmang hna. * Caan saupi chung ngaihchiat in an ummi zorter awkah na bawmhmi hna kha an sunsak tuk.

Tahchunhnak ah, Kaori kong hi ruathmanh. A nu a thihnak in thla 15 a rauhhnu ah a unu nih a thihtak ṭhan caah a ngaih a chia tuk. A tonmi thil hna inkhawh awkah a hawile nih an bawmh lengmang. Amah nakin kum tampi a upa deuhmi Ritsuko nih hawikom ṭha pakhat bantukin a komh. Kaori nih hitin a chim: “Hmaan tein ka chim ahcun cutin a ka pehtlaihmi kha ka duh lo. Ka nu zaka ah ahohmanh umter ka duh hna lo i ahohmanh an um kho lai ti zongin ka ruat lo. Asinain Ritsuko nih ka nu pakhat bantukin a ka pehtlaih caah kan hun i naih deuh. Zarh fatin phungchimnak ah kan kalṭi i kan i pumṭi. Ritsuko nih lakphakti dinṭi awkah a ka sawm, ei awk tete a ka put i ca le card kha atu le atu a ka kuat lengmang. Ritsuko i a ṭhami a lungput ruangah ṭhatnak tampi ka hmu.”

Kaori a nu a thihnak cu kum hleihnih a si cang, atu ah Kaori le a vapa cu Pathian rian ah caantling in an i tel. Kaori nih hitin a chim: “Ritsuko nih atu tiang ka cungah siaherhnak a langhter rih. Kan khualei i ka kir tik paohah ka va leng, amah he i hawikomh kha ka duh tuk.”

Cu bantuk bawmhnak in ṭhatnak a hmumi a dang pakhat cu Cyprus tikulh ah a ummi, Jehovah Tehte pakhat a simi Poli a si. Poli a vapa Sozos cu a zia a ṭha tuk, cun Khrihfa upa pakhat zong a si. Sozos nih ngakṭah pawl le nuhmei pawl kha an inn ah len a sawm lengmang hna i rawl ei zong a kawh tawn hna. (Jeim 1:27) Ngaihchiat awk ngai a simi cu, a thluak ah a bomi a um i kum 53 a si ah Sozos cu a thi. “Kum 33 chung ka cungah zumhawktlak tein a ummi ka vapa nih a ka thihtak” tiah Poli nih a ti.

Ruak an vui dih hnuah Poli cu kum 15 a simi a fapa hniang Daniel he Canada ah an i ṭhial. Cuka ah Jehovah Tehte Hna i Khrihfabu pakhat ah an i fonh. Poli nih hitin a chim: “Khrihfabu thar i kan hawile nih mah hlan i kan sining le kan harnak kong hna kha pakhat hmanh an hngal lo. Asinain nemnak tein an kan pehtlaih, an kan hnemh i an kan bawmh. A hleiin ka fapa nih a pa a herh tuk lio caan ah an kan bawmhmi cu a sunglawi tuk. Khrihfabu hruaitu hna nih Daniel cungah pumpak siaherhnak an langhter. An hawile pawl he an i hawikomh tik asiloah bawlung an chuih tik zongah Daniel kha an telter peng ve.” Atu ah Poli le a fapa cu ṭha tein khua an sa kho cang.

Ngaihchiatnak a tongmi hna bawmh khawhnak le hnemh khawhnak lam tampi a um ko. Mah lengah lungthawhnak a pemi, a ṭha tukmi hmailei ruahchannak zongin Baibal nih hnemhnak a kan pek.