Caan tawite chung lawng na zaw bal maw? Na dam colh caah mah kong kha na philh cang men ko lai. Asinain ngaihchiatnak tu cu, cu bantuk phun a si lo. Dr.  Alan Wolfelt nih cauk (Healing a Spouse’s Grieving Heart) pakhat ah “Ngaihchiatnak ‘a hlo kho dihtu’ zeithil hmanh a um lo” tiah a ṭial. Asinain “caan a rauh deuh tik le midang bawmhnak thawngin na ngaihchiatnak cu a zor deuh ko lai” tiah a ṭial chap.

Tahchunhnak ah, a nupi nih a thihtak tikah pupa Abraham nih a lehrulh ning kha ruathmanh. “Abraham nih khan [Sarah] a ruak tuamhlawmnak ding cu a tuah i a hun ṭah” tiah Baibal nih a ti. (Genesis 23:2, NW) “A hun” timi biafang nih a ngaihchiatnak tei khawh awkah Abraham cu caan caankhat chung a rau ti a langhter. * A dang tahchunhnak pakhat cu a fapa Josef kha sahrang nih thi lak in a seh tiah an rak hlenmi Jakob a si. Jakob nih a fapa cu caan “saupi” chung a ṭah i a chungkhar dang nih an hnem kho lo. Kum tampi a rauhhnu hmanhah Josef thihnak nih a ngaih a chiatter peng rih ko.—Genesis 37:34, 35; 42:36; 45:28.

Tuchan zongah an dawtmi nih an thihtak hna tikah mi tampi cu, cu bantukin an ngaih a chia ve. A tanglei tahchunhnak pahnih hi zohhmanh.

• “Ka vapa Robert cu 2008, July 9 ah a thi. Accident ruangah ka vapa a thih ni zing cu nidang he aa dannak a um hlei lo. Zing rawl kan ei hnu, rianṭuannak i a kal hlanah kan tuah tawn bantukin pakhat le pakhat kan i kup, kan i hnam i ‘kaan dawt tuk’ tiah a ka ti. A thihnak cu kumruk a rau cang ko nain atu tiang ka lungthin a fak tuk rih ko. Rob nih a ka thihtak ruang i ka ngaihchiatnak cu zeitikhmanh ah a dam kho lai lo.”—Gail, kum 60.

• “Ka nupi nih a ka thihtaknak hi kum 18 leng a si cang ko nain atu tiang ka ngai tuk rih i ka ngaih a chia peng rih. Lungthin a lami kokek thil hna ka hmuh tik paohah amah kha ka lung ah a chuak i ka hmuhmi thil hi kan pahnih in hmuṭi u sih law zeitluk in dah kan i nuamh lai ti in ka ruat tawn.”—Etienne, kum 84.

Ngaihchiat lungfah in caan saupi intuar cu a phung a si ko. Pakhat le pakhat kan ngaihchiat ning aa lawh lo caah midang an ngaihchiat ning va soi ti bantuk kha kan hman awk a si lo. Cun kan ngaih a chiat tuk hmanhah kanmahle kanmah sual kan i phawt awk zong a si lo. Cu a si ah ngaihchiatnak kha zeitindah kan tei khawh lai?