France ram nichuah chaklei, Mulhouse khua i zaangennak a tam tuk tiah a min a thangmi rianṭuantu pawl an umnak sang ah ka chuak. Aa si i aa vel lengmangmi chungkhar pawl lakah ka ṭhang. Kan innchungkhar zongah nu pawl cu nautat an si i pa nih ruahnak an hal bal hna lo. Nu pawl an umnak ding cu coka ah a si i an vale le an fale lawng hi an zohkhenh hna awk a si tiah cawnpiak ka si.

Ka ngakchiat lio i kan nunning cu a har tuk. Ka pa cu zu a ding tuk i kumhra ka si ah a thi. Kumnga a rauhhnu ah ka upa pakhat cu amahle amah aa that. Chungkhar pakhat cu an i si i an i that, mah kha ka hmuh hna tikah ka lau tuk hringhran. Ka chungkhar pawl nih a herh tikah namte le meithal zeitindah hman ding, zeitindah ṭhuat ding ti kha an ka cawnpiak. Ka pum cungah tattoo in a khat i zu zong ka hun ding.

Kum 16 ka si tikah nifate beer thawl 10 in 15 kar ka ding zungzal i tlawmpal ah ritnak sii hna ka hun hmang. Mah ruangah thir pelpawi hna ka zuar i a hnuah cun ka hung fir. Kum 17 ka si ah cun thong hna ka tla cang. Fir ruang le zaangennak ruangah voi 18 thong ka tla.

Kum 20 hrawng ka si ah cun ka sining cu a chia chinchin. Nikhat ah ritnak sii aa telmi kuak 20 hrawng ka zuk i bing le upadi nih a awnh lomi a dangdang hna zong ka hmang. A tam tuk in ka hman caah atu le atu ka thi deng lengmang. Ritnak sii hna ka hun zuar ve caah namte le meithal kaa ken peng. Voikhat cu mipa pakhat kha meithal in ka kah nain vanṭhat ah meithal kuan cu a taisawm lu in aa khirh ṭhan. Kum 24 ka si ah ka nu a thi. Mah hnu cun ka thinhun a fawi chinchin. Lam i aa chawkmi nih an ka hmuh tikah an ka ṭih tuk i lam dang in an ka hrial tawn. Mi he kaa ṭhuat lengmang ruangah zarhte le zarhpi paoh ti awk tlukin thonginn asiloah ka hma ṭhit dingah siizung ah ka um tawn.

Kum 28 ka si ah nupi ka ṭhi. Nan hngalh bantukin ka nupi kha upatnak he ka pehtlaih bal lo. Ka volhpamh i ka velh tawn. Nu le va in hmunkhat ah bia i ruah in zeithil hmanh kan tuahṭi bal lo. Ka firmi lungvar tampi ka pek ahcun a za ko tiah ka ruah. A hnuah kan i ruah lomi thil pakhat a hung cang. Mah cu ka nupi nih Jehovah Tehte Hna he Baibal a cawnmi hi a si. A voikhatnak a cawn hnuah kuak a zu ti lo, ka firmi tangka kha a cohlang duh ti lo i a lungvar hna zong a ka pek ṭhan. Mah tikah ka thin a hung tuk. Baibal a cawnmi  kha ka ralchanh i a hmai kha kuak khu in ka chem. Kan innpawng pawl hmaiah ka nihsawh, ka serhsat.

Zankhat cu keimahle keimah i hngal loin zu ka ri i kan inn kha mei ka khangh. Ka nupi nih meizik lakah keimah le kumnga a simi kan fanute kha a kan khamh. Ka lung a hung fim tikah ka sual tuk timi ruahnak ka hun ngei. Pathian nih zeitikhmanh ah a ka ngaithiam lai lo tiah ka ruah. Biaknaklei hruaitu pakhat nih miṭhalo cu hell ah an kal lai tiah a timi kha ka hnathlam ah ka theih ṭhan. Lungthinlei a ka thloptu siibawipa hmanh nih “Na nunning cu zeiti hmanhin remh khawh a si ti lai lo” tiah a ka ti.

Kan inn mei a kangh hnuah ka nupi a nu le a pa inn ah kan i ṭhial. Ka nupi sinah Jehovah Tehte Hna nih an rak len tikah “Ka sualnak vialte hi Pathian nih a ka ngaithiam kho lai maw?” tiah ka hal hna. Mah tikah 1 Korin 6:9-11 kha an ka relpiak. Mah cacaang ah Pathian nih a duh lomi tuahsernak hna a langhter hnuah hitin a ti chap: “A cheu cu, cu bantuk cu nan rak si.” Mah bia nih i thlen khawh a si ko ti kha a ka zumhter. Cun Jehovah Tehte Hna nih 1 Johan 4:8 kha an ka relpiak i Pathian nih a ka dawt kha an ka chimh. Mah tikah ka lung a tho i zarhkhat ah voihnih in Baibal cawnpiak awkah ka nawl hna. Pumhnak zongah ka hun i pum. Cun Jehovah sinah thla ka cam zungzal.

Thlakhat chungah ritnak sii hman ti lo awk le zu din ti lo awkah bia ka khiak. Mah ruangah fakpi in ka tuar. Ka mang a chia, ka lu a fak, ka tha nih a ka tom i a dangdang zongin fakpi in ka tuar. Asinain cu bantuk caan ah Jehovah nih ka kut a ka tlaih i tha a ka pek ti zongin ka zumh. Lamkaltu Paul bantukin ka intuar ve. Pathian bawmhnak he aa tlaiin Paul nih hitin a ṭial: “Khrih nih ṭhawnnak a ka pekmi thawngin zei thil hmanh hung chuak hna sehlaw ka ton khawh ko hna.” (Filipi 4:13) A hnuah kuak ka zukmi kha ka ngol khawh.—2 Korin 7:1.

Baibal nih ka nunnak i thlen awkah a ka bawmh lengah kan innchungkhar sining zong a ṭhatter deuh. Ka nupi cung i ka lungput zong aa thlen cang. Upatnak tein ka pehtlaih i “zaangfahnak tein” timi bia le “kaa lawm” timi bia hna ka hun hman. Cun kan fanu ca zongah dawtnak a ngeimi pa si dingah kaa zuam. Kumkhat chung Baibal ka hlathlai hnuah ka nupi kha i zohchunh in Jehovah sinah ka pum kaa pe i tipil ka ing.

Atu tiang ka nunmi hi Baibal lamhruainak thawngin a si. Cutin si hlah sehlaw ritnak sii tam tuk hman ruang asiloah mi he i ṭhuat ruangah a thi cang hnga tiah Jehovah Tehte a si lomi ka chungkharmi hmanh nih an chim tawn.

Va pakhat le pa pakhat in ka ngeihmi rian he aa tlaimi Baibal cawnpiaknak hna ka zulh ruangah kan innchungkhar sining cu aa thleng tuk. (Efesa 5:25; 6:4) Atu cu chungkhar pakhat in hmunkhat ah rian kan ṭuanṭi cang hna. Ka nupi kha coka lawngah rian ṭuanter ti loin caantling in Pathian rian a ṭuanmi kha lunglawm tein ka bawmh cang. Amah zong nih Khrihfa upa rian a ṭuanmi keimah kha lunglawm tein a ka bawmh ve.

Jehovah Pathian dawtnak le zaangfahnak hna kha keimah theng nih ka hmuh. Cucaah ruahchan awk a ṭha ti lomi in mi nih an hmuhmi hna sinah Pathian sining kong chim kha ka duh tuk. A thiangmi le sullam a ngeimi nunnak ngeih a duhmi ahopaoh Baibal nih a bawmh khawh hna ti kha ka hun hngalh. Baibal lamhruainak thawngin mikip kha ka dawt hna, ka upat hna lengah keimahle keimah zong ka hun i upat cang.