A ṭhalomi vancungmi an um. Annih cu khoika in dah an rat? Pathian nih vancungmi pawl kha zalong tein thimnak nawl he a ser hna ti kha i cinken. Hmasa bik mipa le minu, Adam le Evi ser an si hnu tlawmpal ah a tlingmi thlarau pakhat nih zalong tein thimnak nawl a ngeihmi kha ningcang loin a hman i vawleicung ah ralchanhnak a chuahter. Adam le Evi kha Pathian ralchanh dingin a tukforh hnanak ah hlawhtlinnak a hmu. (Genesis 3:1-7; Biathlam 12:9) Mah thlarau minung i a min cu ahodah a si i Pathian a ralchanh hlanah vancung i a reng cu zeidah a si ti kha Baibal nih a chim lo. Asinain ralchanhnak a chuahter hnuah Baibal nih “Ralchanhtu” tiah sullam a ngeimi Satan ti in le “Thangchiattu” tiah sullam a ngeimi Khuachia tiah a auhmi cu aa tlak tuk.—Matthai 4:8-11.

Ngaihchiat awk ngai a simi cu Pathian a ralchanhtu cu amah lawng a si lo. Noah chan ah vancungmi tampi nih vancung i Pathian chungkhar ‘chungah um kha an duh lo.’ Cucaah minung pum kha an i lak i vawleicungah an rak ṭum. Cun ziaza rawhralnak lam kha an zul. Cuticun ser an sinak a ruang kha an ralchanh.—Judas 6; Genesis 6:1-4; 1 Peter 3:19, 20.

Mah a ṭhalomi vancungmi hna nih zeidah an ton? Pathian nih vawlei kha tilian in a thenh tikah minung pum kha an kaltak i vancung ah an kir ṭhan. Asinain Pathian nih a hmasa an dirhmun ah umnak nawl a pe ti hna lo. Mah canah Tartarus tiah auhmi “muihnak” thong ah a hren hna. (Judas 6; 2 Peter 2:4) Mah khuachia pawl cu “ceunak vancungmi bantuk aa siter” khomi “an bawipa Belzebul,” Satan Khuachia kut tangah an um.—Matthai 12:24; 2 Korin 11:14.

Pathian Messiah Pennak, vancung cozah cu 1914 ah dirh a si tiah Baibal nih a kan cawnpiak. * A biapi tukmi mah thil a can hnuah Satan le a khuachia pawl cu vancung in vawleicung ah ṭhawl an si. Vawleicung ah ṭhatlonak le ziaza rawhralnak hna a karhmi cu khuachia pawl an thinhunnak le thil an hrawhnak a langhtermi a si.—Biathlam 12:9-12.

Asinain ziaza rawhralnak le zaangennak hna a karh chinmi nih Satan uknak a dong cang lai ti kha a langhter. A rauhhlan ah a ṭhalomi thlarau minung pawl cu dantat an si cang lai. Pathian Pennak nih kum 1,000 chung vawlei paradis a uk hnuah mah thlarau ṭhalo pawl nih minung hlen awkah caan tawite chung hmanung bik caanṭha an hmu lai. Mah hnuah annih cu zungzal in hrawh an si lai.—Matthai 25:41; Biathlam 20:1-3, 7-10.