Voikhat ah Jesuh cu Israel ramri, Rom kut tangah a ummi Siria ram i a um lioah Greek minu nih bawmhnak a rak hal. Mah lioah Jesuh nih Judah miphun a si lomi kha “uico fate” he a tahchunh hna. Moses nawlbia ah uico cu a thiang lomi saram in hmuh an si. (Levitikas 11:27) Jesuh nih mah Greek minu le a dang Judah miphun a si lomi hna kha serhsat in a chimmi a si maw?

A si hrimhrim lo. Mah lio caan ah a bik in a bawmh dingmi cu Judah mi an si kha a zultu pawl sinah a langhtermi a si. Cucaah Greek minu sinah mah tahchunhnak hi hmangin a chimmi a si: “Ngakchia rawl cu i lak riangmang i uico fate pek cu a hmaan lo.” (Matthai 15:21-25, 26, NW; Marka 7:26) Greek mi le Rom mi caah uico cu duh a nung tukmi innzuat saṭil an si. Cun an innchung ah an umter hna i ngakchia he lente an i celhṭi tawn. Cucaah “uico fate” timi bia nih duh a nung tukmi muisam kha a langhter. Greek minu nih Jesuh bia kha hitin a leh: “Cucu a si taktak ko, bawipa, sihmanhsehlaw bawi cabuai cungin a tlami rawl ṭilṭawt cu uico fatete nih an ei ve tawn ko hen pei.” Jesuh nih a zumhnak kha a thangṭhat i a fanu cu a damter.—Matthai 15:27, 28, NW.

Italy lei a kalmi Paul aa citnak tilawng cu thlihrannak he aa ralkah caah khuallam peh awkah a har. Cucaah an khuallam peh rih lo dingin lamkaltu Paul nih ruahnak a cheuh hna. (Lamkaltu 27:9-12) Zeicah cutin ruahnak a cheuh hna?

Hlanlio tilawng rianṭuantu pawl nih khuasik caan ah Mediterranean rili i tilawng in khualtlawn cu ṭih a nung tuk ti kha an hngalh. November thlalai in March thlalai tiang hi ṭih a nun bik caan a si. Asinain Paul khual a tlawn lio caan cu September asiloah October thla ah a si. Rom caṭialtu Vegetius (AD kumzabu pali) nih cauk pakhat (Epitome of Military Science) ah hitin a chim: “Tilawng in khualtlawn awkah aa tlak caan a um bantukin aa tlak theng lo caan le ṭih a nun tuk caan zong a um.” May 27 in September 14 tiang tilawng in khualtlawnnak cu a him. Asinain September 15 in November 11 tiang le March 11 in May 26 kar i khualtlawn cu ṭih a nung tuk tiah Vegetius nih a ti. Tilawng in khual a tlawng lengmangmi Paul nih mah kong kha ṭha tein a hngalh lai ti cu a fiang. Tilawng ngeitu le a mawngtu nih mah kong kha an hngalh ko lai nain Paul ruahnak cheuhnak kha zei ah an rel lo. A donghnak ah an tilawng cu aa let.—Lamkaltu 27:13-44.