Pathian duhnak a tlin nakhnga vancungmi nih Pathian cungah zumhfek tein a ummi kha a caan ah an huhphenh hna ti kha Baibal nih a langhter. (Salm 34:7) Tahchunhnak ah:

• Jehovah nih ṭhatlonak in a khatmi Sodom le Gomorrah khua a hrawh tikah vancungmi nih miding Lot le a chungkhar kha tlik awkah an bawmh hna.—Genesis 19:1, 15-26.

• Hlanlio Babilon khua ah Hebru mino pathum cu a alh thluahmahmi meiphu chung an paih hna tikah Pathian nih ‘a salle khamh awkah a vancungmi kha a run thlah.’—Daniel 3:19-28.

• Miding mi Daniel cu chiandeih khor ah zan khuadei an thlak lioah “Pathian nih chiandeih hna cu an kaa phih awkah a vancungmi kha a run thlah hna” caah ka luat tiah Daniel nih a ti.—Daniel 6:16, 22.

A caan ah Pathian vancungmi hna nih Jehovah tinhnak tlinternak caah a hmasa Khrihfabu lakah a herh ningin rian an rak ṭuan. Tahchunhnak ah:

• Vancungmi pakhat nih thong a tlami lamkaltu pawl kha thonginn kutka a awnpiak hna i biakinn ah phung va chim dingin lamhruainak a pek hna.—Lamkaltu 5:17-21.

• Jerusalem ah Pathian a va bia i Gaza leiah a kirmi Ethiopia mipa sin phungchim awkah vancungmi nih thawngṭha chimtu Filip kha lamhruainak a pek.—Lamkaltu 8:26-33.

• Judah miphun a si lomi hna Khrihfa si ve dingin Pathian nih a awnh tikah vancungmi cu Rom ralbawi Kornelias sinah a lang i lamkaltu Peter kha a inn ah sawm dingin lamhruainak a pek.—Lamkaltu 10:3-5.

• Lamkaltu Peter thong a tlak lioah vancungmi pakhat cu a sinah a run lang i thonginn in a chuahter.—Lamkaltu 12:1-11.

Tuchan ah Pathian nih Baibal ah langhtermi bantukin a miphun pawl bawmh awkah vancungmi kha khuaruahhar lam in a hman hna timi langhternak a um ti lo. Asinain atu kan chan he aa tlaiin Jesuh nih hitin a chim: “Miphun vialte hna ca i tehte si awkah Vancung Pennak kong Thawngṭha hi khuazakip ah chim a si lai, cun cu hnu lawngah cun donghnak cu a si lai!” (Matthai 24:14) Vancungmi tlangtlaknak tangah Khrih zultu pawl nih phungchim rian an ṭuan ti hi na hngal maw?

Vawleicung i mi pawl nih Jehovah Pathian kong le minung ca i aa tinhnak kong an hngalh khawh nakhnga vancungmi nih lungtho tein an bawmh hna tiah Biathlam cauk nih a ti. Lamkaltu Johan nih hitin a ṭial: “Vawleicung mi vialte, phun kip, ram kip, holh kip le mi kip sin i thanh awk a simi zungzal thawngṭha aa phorh i van lai i a zuangmi vancungmi pakhat kha ka hmuh. Aw thangpi in, ‘Pathian kha ṭih u law a lianhngannak kha thangṭhat u. Zeicahtiah amah nih minung vialte bia a ceih hna lai caan kha a phan cang. Van le vawlei le rili le tiput a sertu kha bia u,’ a ti.” (Biathlam 14:6, 7) Tuchan i hmuhtonnak tampi nih vawleicung pumpi i Pennak kong chimnak rian cu vancungmi nih an bawmh ti kha a langhter. Cun sualnak a tuahmi pakhat cu aa ngaichih i Jehovah sin a kir tikah “Pathian vancungmi hna cu an i lawm.”—Luka 15:10.

Phungchim rian a dih tikah zei thil dah a um lai? Vancungmi a simi “vancung ralkapbu” nih siangpahrang vialte Siangpahrang Jesuh Khrih kha an bawmh lai i “Lianngan Bik Pathian ni lianngan ni” Armageddon ah ral an do lai. (Biathlam 16:14-16; 19:14-16) A ṭhawngmi vancungmi hna cu “Bawipa Jesuh kong thawngṭha a ngai duh lomi hna dantat” an si tikah mi a thattu in rian an ṭuan lai.—2 Thesalon 1:7, 8.

Cucaah vancungmi cu na cungah lungthawhnak an ngei ti kha zum. Pathian duhnak tuah a duhmi hna ṭhatnak kha an duh. Jehovah nih vawleicung i zumhfekmi a salle thapek awk le huhphenh awkah atu le atu a hman hna.—Hebru 1:14.

Pakhat kip cio nih a biapi tukmi thimnak kan tuah a hau. Vawleicung pumpi ah thanh a simi thawngṭha bia kha kan ngai lai i kan zul lai maw? Na pawngkam ah a ummi Jehovah Tehte Hna nih a ṭhawngmi Pathian vancungmi bawmhnak in ṭhatnak na hmuh nakhnga bawmh an in duh.