Curaçao ram ah a ummi Kenneth le Filomena cu Zarhpi Ni zanlei ah Baibal an cawnpiakmi nuva hna sinah an va leng.

Kenneth nih hitin a chim: “Kan va phak tikah innka cu aa khar i mawṭaw zong a um lo. Asinain a nupi nu kha phone chawnh awkah ka lung a chuak.”

Mah nu nih phone cu a rak tlaih i a vapa cu rianṭuannak ah a kal tiah a ti hna. Asinain Kenneth le Filomena cu an inn hmaiah an phan ti a hngalh caah innka a rak awn i innchung ah luh a sawm hna.

Mah tikah a ṭahmi kha an hmuh. Kenneth nih Baibal cawn dingin thla a hun cam tikah mah nu cu a ṭap ṭhan. Cucaah Kenneth le Filomena nih nemnak tein zeidah a cang tiah an hal.

Mah nu nih tunai te ah khan amahle amah thah aa tim i a vapa sin cakuat a ṭial lioah Kenneth phone a ratnak kong kha a chimh hna. Lungdongh zawtnak a ngeihmi kha a chimh hna tikah Baibal chungin hnemhnak a pemi bia hna kha an chimh. Mah thazaang a pemi bia nih nunnak pakhat kha a khamh khawh.

“A ngaih a chiami mah minu bawmhnak caanṭha le a hleiin a sinah phone chawnh dingin vancungmi asiloah thiang thlarau nih a kan forh caah Jehovah cungah kan i lawm tuk” tiah Kenneth nih a chim. *

Vancungmi asiloah thiang thlarau, a rian ṭuan ṭhawnnak hmangin Pathian nih a karlak ah rian a ṭuan tiah Kenneth le Filomena nih an zumhmi cu a hmaan maw? Asiloah Kenneth nih mah caante ah phone a chawnhmi cu aa tong sual sawhsawhmi dah a si?

Fiang tein cun kan chim kho lo. Asinain Pathian nih vancungmi hmangin mi pawl kha thlaraulei ah a bawmh hna ti cu kan hngalh. Tahchunhnak ah, thlaraulei lamhruainak a kawlmi Ethiopia bawi va bawmh awkah Pathian nih thawngṭha chimtu Filip sinah vancungmi kha a thlah i lam a hruai tiah Baibal nih a ti.—Lamkaltu 8:26-31.

Biaknak tampi nih ṭhawnnak a ngeimi thlarau minung hna kha zumh awkah mi an cawnpiak hna, thlarau minung cheukhat cu Pathian duhnak a tuahmi asiloah minung a zohkhenhmi in an langhter hna. Cucaah mi tampi nih thlarau minung an um i mi cungah ṭhatnak an tuah tiah an zumh. Asinain cheukhat nih cun vancungmi kha an zum hna lo.

Vancungmi cu an um taktak maw? An um ahcun zei in dah an i thawk? Vancungmi kong he aa tlaiin Baibal nih zeidah a chim? Na nunnak ah ṭhatnak an in pe kho maw? Langhtertu thil hna kha hlathlai hna u sih.