Pumpak pakhat cio nih a kan vengtu vancungmi kan ngei tiah Baibal nih a kan cawnpiak lo. Voikhat cu Jesuh nih hitin a ti: “Hi ngakchia tete [Khrih zultu] hi pakhat hmanh zawmhtaih hna hlah u. Annih a vengtu hna an vancungmi kha vancung khua ah ka Pa hmaika ah an um zungzal ko.” (Matthai 18:10) Mah cu pakhat cio nih a kan vengtu vancungmi kan ngei tiah Jesuh nih a chim duhmi a si lo. Mah canah a zultu pakhat kip cio cungah vancungmi nih lungthawhnak an ngei ti kha a chimduhmi a si. Cucaah Pathian a biatu nih cun vancungmi nih an kan huhphenh ko lai ti in ṭih a nungmi thil kha nunnak thap in kan tuah lo.

Mah cu vancungmi nih minung an kan bawm lo tinak a si maw? A si lo. (Salm 91:11) Cheukhat nih vancungmi hmangin Pathian nih huhphenhnak le bawmhnak a kan pek ti kha an zumh. Capar a thawknak ah langhtermi Kenneth zong cu bantuk zumhnak a ngei ve. Mah zumhnak kha a zungzal in cun kan i tlaih kho lo nain Kenneth ruahnak cu a hmaan kho men ko. Jehovah Tehte Hna nih phungchim rian ah vancungmi bawmhnak kha atu le atu an hmuh lengmang. Asinain vancungmi cu hmuh khawh an si lo caah thil sining kip ah pakhat cio kha bawmh awkah Pathian nih zeitluk in dah a hman hna ti cu kan chim kho lo. Zeiti a si hmanhah a kan bawmhnak cungah Pathian lawmh cu a palh lo.—Kolose 3:15; Jeim 1:17, 18.