Mangṭam, khuasak tintuk harnak, raltuknak, zawtnak le leiser ral ti bantuk sifah harnak cu Pathian ruangah a si lo ahcun aho ruangah dah a si? Baibal ah minung nih sifah harnak kan tonnak a ruang pathum kha a langhter:

1. Mah Zawn Lawng Ruahnak, Hakkauhnak le Huatnak. “Minung uknak nih harnak a chuahter.” (Phungchimtu 8:9, NW) A tlinglomi, mah zawn lawng aa ruatmi le a puarhrangmi minung ruangah mi cu sifah harnak an tong tawn.

2. A Caan le Hmuh Chung Khawh Lomi Thil. Mi nih sifah harnak kan tonnak a dang a ruang pakhat cu “kan i ruahchan lomi caan ah kan i ruah lomi thil a um” tawn caah a si. (Phungchimtu 9:11, NW) Mah cu aa tlak lomi caan ah aa tlak lomi hmun i kan um caah accident kan tonmi, kan i ralrin lomi le palhnak kan tuahmi a si kho.

3. Vawlei Uktu Ṭhalo. Minung nih sifah harnak kan tonnak a hrampi a ruang kha Baibal nih fiang tein a langhter. “Vawlei hi a pumpi in mi ṭhalopa kuttangah a um” tiah a ti. (1 Johan 5:19) Mah “mi ṭhalopa” cu Satan Khuachia kha a si. A hramthawk ah anih cu ṭhawnnak a ngeimi Pathian vancungmi a si. Asinain “biatak kha zeitikhmanh ah a ṭanh bal lo.” (Johan 8:44) A dang vancungmi zong Satan leiah an ṭang i Pathian kha an ralchanh, anmah duhnak kha an zul i khuachia an hung si. (Genesis 6:1-5) Mah caan thawkin Satan le a khuachia pawl cu vawleicung ah a ṭhalomi huham an hun ngei. A hleiin kan chan ah huham an ngei khun. Satan cu a thin a hung tuk i ‘vawleicung mi vialte kha a hlen dih hna.’ Cucaah vawleicung ah ṭhatlonak in a khat. (Biathlam 12:9, 12) Satan cu a puarhrangmi nawlngeitu a si. Mi nih sifah harnak an ton tikah aa lungsi tuk. Cucaah mi nih sifah harnak an tonmi cu Pathian ruangah a si lo, Satan ruangah a si.

RUATHMANH: Zaangfahnak a ngei lomi, miṭhalo lawng nih sualnak a ngei lomi kha harnak an tonter hna. Asinain Baibal nih “Pathian cu dawtnak a si” tiah a ti. (1 Johan 4:8) Pathian cu dawtnak a ngeimi a si caah “ṭhatlonak a tuah naisai lai lo i Lianngan Bik nih cun palhnak a tuah naisai lai lo.”—Job 34:10.

Asinain ‘Lianngan Bik Pathian nih Satan hi zei can dah uknak nawl a pek lai?’ tiah na ruah men ko lai. Kan hngalh bantukin Pathian nih ṭhatlonak kha a huat tuk i sifah harnak kan ton tikah a lung a fak. Cucaah Baibal ah hitin a kan forh: “Amah nih aan zohkhenh hna caah nan lungretheihnak vialte kha amah cungah chia dih ko u.” (1 Peter 5:7) Pathian nih a kan dawt lengah ṭhawnnak a ngeih caah sifah harnak le dinlonak vialte a kan hrawhpiak lai. Mah kong kha a hnu capar nih a fianter lai. *