Zawnruahnak timi cu “mi pakhat i a intuarnak le a hmuhtonnak hna kha amah hmun ah i umter in i hrawm” kha a si. Lungthinlei ngandamnak kong ṭha tein a theimi Dr. Rick Hanson nih “zawnruahnak cu kan i chuahpimi zia a si” tiah a ti.

RUATHMANH: A dang cikor ah a um lomi zawnruahnak cu minung nih zeicah kan ngeih? Pathian nih amah he i loin a kan ser caah a si tiah Baibal nih a ti. (Genesis 1:26) Pathian nih amah he i loin a kan ser caah a sining pawl kha ri pakhat tiang cu kan i zohchunh khawh. Cucaah zawnruahnak nih midang bawmh awkah a kan forh tikah Sertu Jehovah Pathian i zawnruahnak kan langhtermi a si.—Phungthlukbia 14:31.

Pathian cu kan cungah zawnruahnak a ngei i harnak kan tonmi kha hmuh a duh lo. Izipt ram ah sal an si hnuah, thetse ram ah kum 40 chung harnak a tongmi hlanlio Israel mi he aa tlaiin Baibal nih hitin a ti: “Harnak an ton chung vialte Pathian cu a lung a fak.” (Isaiah 63:9, NW) An tonmi harnak kha Pathian nih a hngalh sawhsawhmi lawng a si lo ti kha i cinken. Amah theng fahnak a tuar i “an nganfahnak cu ka hngalh dih cikcek” tiah a ti. (Exodus 3:7) Pathian nih “nanmah aan tawngtu hna cu” “ka mit falai a ka tongmi” an si tiah a ti. (Zekhariah 2:8, NW) Midang ruangah fahnak kan in tikah a lung a fak ve.

Kanmahle kanmah sual kan i phaw i Jehovah zawnruahnak hmuh awkah kaa tlak lo tiah kan ruah hmanhah “Pathian cu kan lung nakin a ngan deuh i zeizong vialte kha a hngalh dih” ti kha Baibal nih a kan zumhter. (1 Johan 3:19, 20) Kanmahle kanmah kan i hngalhmi nakin Pathian nih ṭha deuh in a kan hngalh. Kan sining, kan ruahnak le kan intuarnak vialte kha ṭha tein a hngalh i kan cungah zawnruahnak a ngei.

 Hnemhnak a kan pemi Baibal caang hna

• “Thla nan cam tikah kaan leh hna lai. Nan ka chawnh tikah kaan chawnh ve hna lai.”—ISAIAH 58:9.

• “Nan ca i ka tinhmi cu keimah lawnglawng nih ka hngalh, tiah BAWIPA nih a ti. Cucu vanchiatnak si loin thluachuahnak a si lai i nan hnu i a rung um ding tefa tampi kong a si lai, nan ka hal i ka sinah thla nan cam ahcun nan bia kaan ngaihpiak hna lai. “—JEREMIAH 29:11, 12.

• “Ka mitthli cu na thawl chungah na rawn hna, na cauk chungah na ṭial hna a si lo mei?”—SALM 56:8.

Pathian nih kan zawn a kan ruah timi hngalhnak nih kan tonmi harnak tawnghtham awkah a kan bawm kho maw? Maria kong hi ruathmanh.

“Kum 18 a simi ka fapate nih kumhnih chung cancer zawtnak a tuar i a thih tikah nunnak cu a har tuk i a ding lo tiah ka ruah. Ka fapa kha damter loin Jehovah nih a zoh sawhsawh caah a cungah ka thin a hung.

“Kum ruk a rauh hnuah Khrihfabu i dawtnak le zawnruahnak a ngeimi ka hawi pakhat nih ka intuarnak kha a ka ngaihpiak. Jehovah nih a ka daw lo tiah ka ruahnak kong kha ka chimh. Ka bia tan loin ṭha tein a ka ngaihpiak hnuah 1 Johan 3:19, 20, i “Pathian cu kan lung nakin a ngan deuh i zeizong vialte kha a hngalh dih” timi Baibal caang kha a ka relpiak. Mah nih ka lung a ka suk tuk. Kan harnak kha Jehovah nih a hngalhthiam tiah a ti.

“Cutin a ka ti ko nain ka thinhunnak cu a dam rih hlei lo. A hnuah Salm 94:19 kha ka rel, hitin a ti: “Khuaruahhar vansang au in ka um tikah na ka hnemh i ka lung na ka lawmhter.” Mah Baibal caang cu keimah caah ṭialmi a si tiah ka ruah. Jehovah nih a ngaih i a theihthiam timi hngalhnak nih duhsah duhsah in Jehovah he bia kaa ruah tikah lungdaihnak ka hmu.”

Pathian nih a kan theihthiam i zawnruahnak a langhter timi hngalh cu zeitluk hnangam awk dah a si. Asinain zeicah mah tlukin sifah harnak a tam? Ṭhatlonak kan tuah caah Pathian nih dan a kan tatmi a si maw? Pathian nih sifah harnak donghter awkah zeidah a tuah lai? Mah kong kha a hnu capar hna ah langhter a si lai.