Aa naih bikmi pehtlaihnak a ngeimi minung cu faphir an si. An karlak ah a hleikhunmi pehtlaihnak pakhat a um. Faphir cheukhat cu an chim duhmi kha fianter hau loin a dikthliar in an i hngalthiam tiah Faphir Kong Hlathlainak i director a si i amah theng zong faphir asimi Nancy Segal nih a ti. Faphir a simi nu pakhat nih “pakhat le pakhat kan kong vialte kan i hngal dih” tiah a ti.

Mah cu zeicah khuaruahhar a si? Pawngkam thil le nulepa zohkhenhning, a hleiin cikor rianṭuanning aa lawh caah an ziaza aa lawhmi a si tiah hlathlaitu hna nih an langhter.

RUATHMANH: Khuaruahhar a simi cikor a Sertu nih pakhat cio i kan pum sersiamning kha ṭha tein a hngalhthiam ti cu a fiang ko. Salm caṭialtu David nih hitin a ti: “Ka nu pawchung i a ka semtertu cu nangmah na si. Ka pum hi nang caah cun khuaruahhar awk a si lo. . . . Ka chuah hlanin na rak ka hmuh diam cang. Ka ca i na sermi ni hna cu na cauk chungah an rak i khumh diam cang.” (Salm 139:13, 15, 16) Pathian lawnglawng nih kan cikor aa sersiamning kha a hngalh. Cun kan nunning a thlentermi kan hmuhtonnak vialte zong kha a hngalhthiam. Pathian nih kan sining vialte kha a dikthliar in a hngalh dih ti kha mah nih a kan zumhter.

David nih hitin thla a cam: “BAWIPA, na ka kawl dih hirhiar i na ka hngalh dih cikcek. Ka tuahmi vialte cu na hngalh dih, lamhlatpi khin ka ruahnak vialte cu na hngalh dih ko hna. Ka chim hlanin ka chim ding vialte kha na hngalh dih.” (Salm 139:1, 2, 4) Cucaah Jehovah nih kan intuarnak vialte le kan i ‘tinhmi le kan ruahnak vialte’ zong a hngalh dih. (1 Chanrelnak 28:9; 1 Samuel 16:6, 7) Mah Baibal caang hna nih Pathian kong zeidah a langhter?

Pathian sin thla kan cam tikah kan ruahnak le kan intuarnak vialte kan phuan dih lo hmanhah a kan Sertu nih zeidah kan tuah ti lawng si loin zeicah kan tuah ti zong a hngalhthiam. Mah lengah ri kan ngeihmi ruangah kan duh tlukin ṭhatnak kan tuah khawh lo hmanhah zei ṭhatnak dah tuah kan duh ti kha Pathian nih a hngalhthiam. Pathian nih kan lungthin chungah dawtnak a chiah caah dawtnak in khua kan ruahmi le kan duhmi kha hmuh a duh.—1 Johan 4:7-10.

 Hnemhnak a kan pemi Baibal caang hna

• “Bawipa nih a dingmi cu a mit in a ven hna i an thlacamnak kha a ngaih zungzal.”—1 PETER 3:12.

• Pathian nih hitin bia a kan kamh: “Na zulh awk hnga lam kha kaan hmuhsak lai, kaan cawnpiak lai i lungthin kaan cheuh lai.”—SALM 32:8.

Kan sining le kan intuarning Pathian nih a hngalhthiam ti hngalhnak nih kan tonmi harnak inkhawh awkah a bawm maw? Nigeria ram i Anna kong kha ruathmanh. “A har tukmi ka sining ruangah nun hi a phu maw tiah ka ruat tawn. Kei cu thluak lei zawtnak ruangah siizung ah a ummi ka fanute a zohkhenhmi nuhmei ka si. Keimah thengte zong hnuk cancer ka ngei i kaa khuaihlai, cun cancer sii ka ding i dat in kaa em. A zawmi ka fanu he caankhatte ah siizung kan umṭi caah ka caah a har tuk hringhran.”

Mah kha tei awkah Anna cu zeinihdah a bawmh? “Filipi 4: 6,7 i ‘Pathian daihnak, minung hngalhnak a lonhtu nih cun, Khrih Jesuh chungah nan lungthin le nan ruahnak cu him tein a chiah lai’ timi Baibal caang hna kha ka ruat. Mah Baibal caang ka ruah tik paohah keimah le keimah kaa hngalhmi nakin Jehovah nih a ka hngalhthiam deuh timi hngalhnak nih Jehovah he kan i naih deuh tiah ka ruah. Khrihfabu i unau pawl sinin thazaang peknak tampi ka hmu.”

“Ka zawtnak kaa thlop cuahmah lioah kan nufa in kan sining cu a ṭhangcho thluahmah. Jehovah nih a kan umpi caah kan tonmi zuamcawhnak hna kha a chiatnak leiin kan hmu lo. Jeim 5:11 ah hitin a ti: ‘Annih nih an in khawh caah, lunglawm mi kan ti hna. Job lungsaunak kha nan theih i Pathian nih a donghnak ah a pek ṭhannak kong kha nan theih. Bawipa cu zaangfahnak le zawnruahnak in a khatmi a si.’” Jehovah nih Job sining kha ṭha tein a hngalhthiam bantukin kan tonmi zei bantuk thil sining paoh a hngalhthiam ti kha kan zumh khawh.