Pathian nih kan pum kha amah tein a dam kho ding phun in khuaruahhar lam in a kan ser. Kan pum kan i khawn, kan i hliam sual tikah kan hma cu a hmet zong, a ngan zongah a hnawk tukmi kan pum rianṭuanning nih amah tein a damter ṭhan. (Johns Hopkins Medicine) Kan thi a chuakmi pihter awk, thahri kauhter awk, kan hma damter awk le tissue ṭhawnter awkah kan pum cu rian a ṭuan colh.

RUATHMAH: Pathian nih kan pum kha a dam kho ding phun in a ser ahcun kan lungthin hma zong a damter lai ti kha kan zumh khawh. Salm caṭialtu nih “lungkuai mi kha a damter hna” tiah a ti. “An hma kha a menpiak hna.” (Salm 147:3) Hlanlio asiloah atu i na tonmi thil ruangah lungrethei in na um ahcun Jehovah nih atu ah le hmailei ah na hma a damter lai ti kha zeitindah na zumh khawh?

Pathian nih hitin bia a kan kamh: “Na thin phang hlah, na sinah ka um ko, Keimah cu na Pathian ka si, zeihmanh ṭih hlah. Kaan ṭhawnter lai i kaan bawmh lai.” (Isaiah 41:10) Jehovah nih a kan zohkhenh timi hngalhnak nih lungdaihnak a kan hmuhter i harnak a phunphun tawnghtham awkah thazaang a kan ngeihter. Mah lungdaihnak kha lamkaltu Paul nih “Pathian daihnak, minung hngalhnak a lonhtu” tiah a auh. Cun “Khrih nih ṭhawnnak a ka pekmi thawngin zeithil hmanh hung chuak hna sehlaw ka ton khawh ko hna” tiah a ti chap.—Filipi 4:4-7, 9, 13.

Baibal nih minung hmailei ca i Jehovah biakam kong kan zumhnak kha a fehter. Tahchunhnak ah, Biathlam 21:4, 5 (a hnu capar a cherhchan) ah Pathian nih zeidah a tuah lai i cutin a tuah lai kha zeicah kan zumh khawh timi kong a kan chimh:

• Mi vialte i “an mitthli vialte kha a hnawh dih hna lai.” Midang nih hngalh dawh a si lomi kan harnak le kan lungretheihnak vialte kha Jehovah nih a hloh dih lai.

• Vancung “bawiṭhutdan i a ṭhumi,” zeizong vialte a sertu Lianngan Bik Siangpahrang nih sifah harnak khenkham awk le kan herhmi bawmhnak pek awkah a ṭhawnnak le a nawlngeihnak kha a hman lai.

• Jehovah nih a biakam cu “a hmaanmi le zumhawktlak” a si tiah aa mah a khaan. Mah cu a biakam tlinter awkah a min chalh in aa mah a khaan tinak a si.

“‘An mitthli vialte kha a hnawh dih hna lai. Thihnak a um ti lai lo, ngaihchiatnak le ṭahnak le fahnak zong a um ti lai lo. Thil hlun vialte cu an lo dih cang,’ a ti. Cun bawiṭhutdan i a ṭhumi nih cun, ‘Atu cu thil vialte kha a thar in ka ser dih cang hna,’ a ti. A ka thawh i, ‘Hi bia hi ṭial hna, zeicahtiah a hmaanmi le zumhawktlak a simi bia an si,’ a ti.”—Biathlam 21:4, 5.

Van le vawlei le Baibal nih vancung kan Pa i a sining hna kha an langhter. Sermi thil nih Pathian hawikom si awkah a kan forh. Asinain Baibal nih cun “Pathian cu naih u law aan naih ve hna lai” tiah dairek in a kan sawm. (Jeim 4:8) Lamkaltu 17:27 nih “Pathian cu aho kan sin hmanh hin aa hlat lo” tiah a ti.

A caan pek in Pathian hngalh awk naa zuam tikah ‘Pathian nih aan zohkhenh’ kha na hun hngalhthiam lai. (1 Peter 5:7) Cu bantuk Jehovah i bochannak nih zei ṭhatnak dah a chuahter?

Japan ram i Toru kong hi ruathmanh. Khrihfa a simi a nu sinah a ṭhangmi a si ko nain a puarhrang tukmi Japan Mafia i yakuza timi bu ah aa tel ve. Hitin a ti: “Pathian nih a ka huat tiah ka ruah i ka pawngkammi, a hleiin ka dawtmi pawl an thih tikah Pathian nih dan a ka tatmi a si tiah ka ruah.” A ṭhalo tukmi pawngkam ruangah “zaangfahnak a ngei lomi le intuarnak a ngei lomi” ka hung si tiah Toru nih a ti. Aa tinhnak kong he aa tlaiin hitin a chim: “Min than awkah keimah nakin a min a thang deuhmi pakhat kha thah in no liote ah thih ka duh.”

Asinain a nupi Hannah he Baibal an hlathlai tikah Toru nunning le muisam cu khuaruahhar in aa thleng. Hannah nih “ka vapa cu mithmuh bak in aa  thleng” tiah ti. Toru nih hitin a chim: “Pakhat cio kan cungah siaherhnak a ngei taktakmi Pathian a um. Pathian nih ahohmanh thihter a kan duh lo. An sualnak aa ngaichih taktakmi hna kha ngaihthiam a duh hna. Aho sin hmanhah kan chim khawh lomi le ahohmanh nih a kan theihthiampiak khawh lomi kha a sinah kan chim khawh i a kan theihthiampiak khawh. Kan tonmi buaibainak le sifah harnak hna kha a rauhhlan ah Jehovah nih a hrawh dih cang lai. Atu hmanhah kan i ruahchan lomi lam in a kan bawmh. Kan tha a der caan ah a kan zohkhenh.

Toru hmuhtonnak nih a langhter bantukin Pathian nih ṭhatlonak vialte a hrawh khawh i a rauhhlan ah a hrawh lai timi hngalhnak nih hmailei ruahchannak a kan pek lengah atu zongah a ṭha deuhmi nunnak a kan ngeihter. Sifah harnak in a khatmi vawlei hmanhah Pathian zohkhenhnak in ṭhatnak na hmu kho.