LUZIA CU A KEHLEI KE A BEI. A ngakchiat lioah pum rianṭuanning a hrawkmi polio zawtnak chawnh a rak si. Kum 16 a si ah a rian ngeitu nu nih “na nu bia na ngaih lo i na serhsat caah Pathian nih dan aan tatmi a si” tiah a ti. A lung a rak fah tukmi kha Luzia nih atu tiang aa cinken rih.

DAMARIS NIH THLUAK CANCER KA NGEI TI A HNGALH TIKAH a pa nih hitin a hal: “Zeidah na tuah i mah zawtnak hi na ngeih? Thil ṭhalo na tuah caah Pathian nih dan aan tatmi a si lai.” Mah ruangah Damaris cu a ngaih a chia tuk.

Zawtnak cu Pathian dantatnak a si tiah mi nih an ruahnak hi a saupi cang. Cauk pakhat (Manners and Customs of Bible Lands) nih Khrih chan i mi tampi zong nih “zawtnak cu a zawmi asiloah a rualchan hna i an sualnak ruangah hmuhmi dantatnak a si” tiah an zumh tiah a ti. Khrih a thih hnu, kumzabu tampi ah “mi cheukhat nih sualnak ca i dantatnak ah Pathian nih rai a tlunter tiah an zumh” tiin cauk pakhat (Medieval Medicine and the Plague) nih a ti. Cu a si ah kumzabu 14 lioah Europe ram ah rai ruangah mi nuai tampi an thihmi cu miṭhalo pawl Pathian nih dan a tatmi hna a si maw? Asiloah mah lio tein siilei hlathlaitu pawl nih bia an khiah bantukin bacteria rungrul ruangah rai a tlunmi maw a si? Sualnak ruangah dantatnak in Pathian nih a zawttermi hna a si hnga maw? tiah mi cheukhat nih an ruah men lai. *

RUATHMANH: Zawtnak le sifah harnak cu Pathian sinin a rami dantatnak a si ahcun zeicah a Fapa, Jesuh nih a zawmi pawl kha a damter hna? Cutin a damtermi hna cu Pathian dinnak a ralchanhmi a si lai lo maw? (Matthai 4:23, 24) Jesuh nih Pathian thil tuahmi kha zeitikhmanh ah a ralchanh bal lo. Jesuh nih “a duhmi kha ka tuah zungzal” i “ka Pa nih a ka fial bantukin ka tuah dih” tiah a ti.—Johan 8:29; 14:31.

Baibal nih Jehovah Pathian cu “ṭhatlonak ngei lo” a si tiah a ti. (Deuteronomi 32:4) Tahchunhnak ah, Pathian nih vanlawng aa citmi mi pakhat dantat a duh caah vanlawng rawhter in sualnak a ngei lomi mi tampi kha zeitikhmanh ah a that hna lai lo. Pathian cu a dingmi a si caah “a sual lomi cu a sualmi hna sinah” dan a tat bal hna lai lo, “cucu a si kho lo” tiah zumhfekmi Abraham nih a ti. (Genesis 18:23, 25) “Pathian nih cun ṭhatlonak a tuah naisai lai lo,” “palhnak a tuah naisai lai lo” tiah Baibal nih a ti.—Job 34:10-12.

Sifah harnak kan tonmi cu cuset khaset timi kan sualnak ruangah Pathian nih dan a kan tatmi a si lo. Jesuh le a zultu pawl nih a chuahka in a mit a cawmi pa an hmuh lioah Jesuh nih mah kong kha fiang tein a chimh hna: “A zultu hna nih khan, ‘Mitcaw in a chuahtertu hi aho sualnak dah a si? Amah sualnak maw a si a nu le a pa sualnak dah?’ tiah an hal. Jesuh nih cun, ‘A mitcawtnak hi amah sualnak ruangah siseh, a nu le a pa sualnak ruangah siseh a si lo. Pathian ṭhawnnak cu amah damnak thawng hin a langh nakhnga caah a mit a cawt hi a si.’”—Johan 9:1-3.

A hmaan lomi ruahnak an ngeih caah Jesuh nih a cunglei bia a chim tikah a zultu pawl cu an khuaruah a har ko lai. Jesuh nih a mit a cawmi mipa kha damter lawng si loin zawtnak cu Pathian sinin a rami dantatnak a si timi a hmaan lomi ruahnak  an ngeihmi kha a remh hna. (Johan 9:6, 7) Sifah harnak cu Pathian ruangah a si lo timi hngalhnak nih zawtnak a ngeimi kha hnemhnak a pek hna.

Hnemhnak a kan pemi Baibal caang hna

• “Pathian cu ṭhatlonak nih a tukforh kho lo i amah zong nih ahohmanh a tukforh bal hna lo.” (JEIM 1:13) Zawtnak, fahnak le thihnak telin mi nih kum tampi chung an tonmi “ṭhatlonak” vialte cu a rauhhlan ah hrawh a si cang lai.

• Jesuh Khrih nih “a zawmi vialte kha a damter hna.” (MATTHAI 8:16) Pathian Fapa nih a sinah a rami mizaw vialte a damtermi hna nih Pathian Pennak ah vawleicung pumpi ah a tuah dingmi thil kha a langhter.

• “An mitthli vialte kha a hnawh dih hna lai. Thihnak a um ti lai lo, ngaihchiatnak le ṭahnak le fahnak zong a um ti lai lo. Thil hlun vialte cu an lo dih cang.” —BIATHLAM 21:3-5.

Zeicah minung nih ṭhatlonak le sifah harnak a phunphun kan ton? Mi nih mah biahalnak kong an ruahnak hi kum tampi chung a si cang. Pathian cu mawhchiat awk a si lo ahcun ahodah mawhchiat awk a si? Mah kong kha a hnu capar ah kan i ruah hna lai.