Pathian nih minung kha amah he pehtlaihnak tuah khawh awk le kan intuarnak kha thlacamnak in phuan khawh awkah a ṭha tukmi laksawng a kan pek. Profet David nih hitin thla a cam: “Zion ah kan in thangṭhat lai i na sinah bia kan i kammi kha kan in pek lai.” (Salm 65:2) Asinain Pathian nih kan thlacamnak a kan theihpiak nakhnga le thluachuah a kan pek nakhnga zeitindah kan cam khawh?

Pumpak na thlacamnak ah na intuarnak taktak kha phuang law na harnak vialte kha Pathian sinah chim dih. (Salm 62:8) Lianngan Bik nih lungthin tak tein thla kan cammi kha a duh.

Pathian cu min tampi a ngei ko nain pumpak min cu pakhat lawng a ngei. “Keimah lawnglawng hi BAWIPA [Jehovah, NW] na Pathian cu ka si.” (Isaiah 42:8) Baibal ah Jehovah min kha voi 7,000 hrawng langhter a si. Profet tampi zong nih Pathian i pumpak a min kha an rak hman. Abraham nih hitin a ti: “Bawipa [Jehovah, NW] ka cungah na thin hung sawh hlah. Ka chim rih ko lai.” (Genesis 18:30) Cucaah kannih zong thla kan cam tikah Pathian min Jehovah kha kan hman ve awk a si.

Pathian nih zei holh in kan chim hmanhah kan intuarnak le kan ruahnak kha a hngalhthiam dih. Baibal nih hitin a ti: “Pathian nih mi vialte kha aa ruang tein a zoh hna ti kha ka hngalh. Mi zei miphun chungmi hmanh a si ah, amah a ṭihmi paoh le dinnak a tuahmi paoh cu a cohlan ko hna.”—Lamkaltu 10:34, 35.

Asinain Pathian thluachuah kan hmuh khawh nakhnga thlacamnak lawngin a za lo. A hnu capar ah zeidah kan tuah a hau timi kong kan i ruah hna lai.