Pathian Nawl A Ngaimi Hna Caah Thluachuah
Profet Moses nih Pathian nawlbia kan ngaih ahcun thluachuah kan hmu lai tiah a ti. (Deuteronomi 10:13; 11:27) Dantat lai kan ṭih ruangah Pathian nawl kan ngaihmi a si lo. Pathian i a ṭha tukmi sining hna nih amah kan dawt caah a nawl ngaih dingin a kan forh i a ngaih a chiatter khomi thil kha hrialter a kan duh. “Pathian kan dawt ti cu a nawl kan zul tinak a si ko.”—1 Johan 5:3.
Asinain nawlngaihnak nih zeitindah Pathian thluachuah a kan hmuhter? A kong pahnih in i ruah hna hmanh u sih.
1. Pathian Nawlngaihnak Nih Fimnak A Kan Pek Lai
“Keimah cu BAWIPA nan Pathian, nan ca ṭhatnak cawnpiak an duhtu hna le nan zulh awk hnga lam an hmuhsaktu hna ka si.”—ISAIAH 48:17.
A kan Sertu Jehovah Pathian nih a kan hngalh i kan herhmi lamhruainak a kan pek. A ṭhami biakhiahnak tuah awkah a cawnpiaknak nih kan bawm seh ti kan duh ahcun Pathian nih tuahter a kan duhmi kong kha Baibal in kan cawn a hau i mah ningin kan tuah a hau.
2. Nawlngaihnak Nih Lunglawmhnak A Kan Pek Lai
“Pathian bia kha a thei i a ngaimi caah cun zeitlukin dik lunglawmhnak a si chinchin”—LUKA 11:28.
Tuchan ah Pathian nawl a ngaimi mi nuai tampi cu nuamhnak taktak an hmu. Tahchunhnak ah, Spain ah a ummi a thin hun a fawi tukmi le a nupi i telin midang kha puarhrangpi in a pehtlaimi pa pakhat kong kha ruathmanh. Nikhat cu profet Moses nih a ṭialmi Jakob fapa Josef nunnemnak kong kha a rel. Josef cu sal pakhat in zuar a si i ningcang loin thongthlak a rak si; asinain anih cu nemnak, daihnak le ngaihthiamnak lungthin a ngei peng. (Genesis, dal 37-45) Mah Spain pa nih hitin a ti: “Josef kong ka ruahnak nih nemnak, zaangfahnak le mahle mah i uk khawh awkah a ka forh. A phichuak cu atu ah, ka nunnak cu a nuam tuk cang.”
Baibal nih midang he zeitindah kan i pehtlaih awk a si timi kong he aa tlaiin lamhruainak tampi a kan pek. Mah kong kha a hnu capar nih tam deuh in a fianter lai.
