Pathian cu duhdanhnak a ngei lomi a si i mi vialte nih thluachuah hmu hna seh ti a duh.

Pathian nih profet Abraham kha “vawleicung miphun vialte cu nangmah thawngin thluachuah an hmu lai” tiah bia a kamh.—Genesis 12:3, NW.

Mah in zeidah kan cawn khawh? Pathian nih a kan dawt tuk i amah nawl a ngaimi pa, nu le ngakchia ti bantuk chungkhar dihlak nih thluachuah hmu hna seh ti a duh.

Pathian cu zaangfaknak a ngeimi a si i amah hngalh awkah aa zuammi hna kha thluachuah a pek hna.

Lianngan Bik Pathian nih Moses kha khuaruahhar thil tuah khawhnak ṭhawnnak a pek. Asinain Moses nih hitin thla a cam: “Ka cung i na lung a tlin a si ahcun, naa tinhmi kha ka hngalh khawh nakhnga le na lung kaan tlinter khawh nakhnga, naa tinhmi cu ka chim tuah.” (Exodus 33:13) Pathian cu Moses nih a halmi cungah aa lawm i a phunglam le a sining hngalhthiam awkah hngalhnak tam deuh a rak pek. Tahchunhnak ah, Moses nih Sertu cu “zaangfahnak le vel ngeihnak in a khatmi Pathian” a si ti kha a rak cawn.—Exodus 34:6, 7.

Mah in zeidah kan cawn khawh? Pathian nih amah hngalh deuh awkah fakpi in aa zuammi nu, pa le ngakchia kan dihlak in thluachuah hmu hna seh ti a kan duh. Baibal ah amah biak khawh ning kong kha a kan hmuhsak, cun anih cu a mithmai ṭha le thluachuah pek a kan duhtu Pathian zong a si.

Jesuh kong le a tuahmi le a cawnpiakmi kong kha kan cawn ahcun zungzal thluachuah kan hmu kho lai.

Baibal ah Jesuh nunnak kong le a cawnpiaknak kong tampi aa tel. Pathian nih Jesuh kha mitcaw, hnachet le kebei damter khawhnak ti bantuk, khuaruahhar thil tuah khawhnak ṭhawnnak tampi a pek. Jesuh nih mithi hmanh a rak thawhter hna. Mah nih minung caah Jesuh nih hmailei ah a tuah dingmi thil kha a langhter. Kan dihlak in mah thluachuah hmuh khawh ning kong kha Jesuh nih hitin a fianter: “Cun Pathian taktak a simi nangmah hngalh le nangmah nih na thlahmi Jesuh Khrih hngalh hi zungzal nunnak cu a si.”—Johan 17:3.

Jesuh cu zaangfahnak le nemnak a ngeimi a si. A tuurun ah a ummi pa, nu, mino le ngakchia nih mah sawnnak hi an lehrulh: “Ka seihnam kha i bei u, kei cu nunnem le toidornak lungthin a ngeimi ka si caah ka nawl hi i cawn ve u; cun dinhnak kha nan hmuh ko lai.” (Matthai 11:29) Nu pawl a nautatmi a chan lio i mi pawl he i lo loin Jesuh nih nu pawl kha zaangfahnak le upatnak he a pehtlaih hna.

Mah in zeidah kan cawn khawh? Jesuh nih mi cungah dawtnak taktak a langhter i pakhat le pakhat zeitindah i pehtlaih ding a si timi kong he aa tlaiin zohchunhawk ṭha a chiah.

Baibal nih “Pathian cu pakhat lawnglawng a um” i Jesuh Khrih cu aa toidormi Pathiam biachimtu a si tiah a kan cawnpiak. (1 Korin 8:6) Jesuh nih Pathian cu cungnung bik a si i anih cu Pathian nih vawlei ah a thlahmi a si ti kha fiang tein a langhter.—Johan 11:41, 42; 14:28. *