A hmasa capar ah a langhter cang bantukin mi nih van chiat ṭhat, fimcawnnak, thilri chawva le miṭha sinak ti bantuk thil hna i bochannak thawngin a ṭha deuhmi hmailei hmuh awkah an i zuam. Asinain cu bantuk thil hna i bochan cu na phanh bal lonak hmun kal awkah a hmaan lomi khuaram hmanthlak hman he aa lo. Mah cu hmailei caah zumh khawh a simi lamhruainak a um lo tinak a si maw? A si lo.

Biakhiahnak kan tuah tikah kanmah nakin a upa deuhmi le a fim deuhmi hna sinah ruahnak kan hal tawn hna. Cu bantuk lam in kannih zong kanmah nakin a upa deuh i a fim deuhmi mi pakhat sinin zumh khawh a simi lamhruainak kha kan hmuh khawh. Mah ruahnak cheuhnak kha a luancia kum 3,500 hrawngah rak ṭialmi cauk in kan rel khawh. Mah cauk cu Baibal tiah kan auh.

Baibal kha zeicah na zumh khawh? Baibal cu a upa bikmi le van le vawleicung ah a fim bikmi sinin a rami cauk a si caah a si. Anih cu “hramthawknak zong um lo donghnak zong um lo” i “zungzal a nungmi” in langhter a si. (Daniel 7:9; Salm 90:2) Amah nih ‘van kha a ser hna, amah cu Pathian a si. Vawlei kha a ser i a siam.’ (Isaiah 45:18) A min cu Jehovah a si tiah a kan chimh.—Salm 83:18.

Baibal nih nunphung asiloah miphun pakhat cu a dang miphun nakin a ṭha deuh tiah a ti lo. Zeicahtiah mah cu minung vialte a Sertu sinin a rami a si caah a si. Baibal ruahnak cheuhnak cu man a ngei zungzal i mikip caah a ṭhahnem. Baibal cu holhphun tampi in hmuh khawh a si cang i a dang cauk nakin tam deuh phawtzamhmi cauk zong a si. * Cucaah mikip nih an rel khawh i mah an relmi nih lam a hruai khawh hna. Mah nih Baibal chimmi kha a cohlan:

“Atu cu Pathian nih mi vialte kha aa ruang tein a zoh hna ti kha ka hngalh. Mi zei miphun chungmi hmanh a si ah amah a ṭihmi paoh le dinnak a tuahmi paoh cu a cohlan ko hna.”—LAMKALTU 10:34, 35.

An fale a daw i a bawmmi nulepa bantukin Jehovah Pathian cu a Bia, Baibal in a kan bawmtu dawtnak a ngeimi Pa a si. (2 Timote 3:16) Amah cu a kan sertu le zeinihdah a kan nuamhter lai ti a hngaltu Pathian a si caah a Bia, Baibal kha na zumh khawh.

Cu bantuk hmailei hmuh awkah zeidah na tuah a hau? Mah kong kha a hnu capar ah a fianter lai.