Mi tampi nih fimnak ṭha tein a cawngmi le a rummi hna nih a himmi hmailei kha an hmuh lai tiah an ruah. Sianghleiruun fimcawnnak nih mi pakhat kha a ṭha deuhmi rianṭuantu, a ṭha deuhmi chungkharmi le rammi si awkah a bawmh khawh tiah an zumh. Cun a ṭhami fimcawnnak nih rian ṭha a kan hmuhter lai, tangka tampi a kan hmuhter lai i a kan nuamhter lai ti zongin an ruah.

China ah a ummi Zhang Chen nih a chimmi kong hi ruathmanh. Hitin a ti: “Sifahnak in luat awkah sianghleiruun degree ka lak a hau i a sangmi rian nih a nuammi le lungsi hnangamnak a pemi nunnak a ka hmuhter lai tiah ka zumh.”

A ṭha deuhmi nunnak hmuh awkah mi tampi nih ramdang a si hmanhah a min thangmi sianghleiruun ah kai an duh. Mah cu COVID-19 ruangah khualtlawnnak a har hlan tiang a laar tuk. A luancia kum 10 hrawngah hlathlainak a tuahmi phu pakhat nih “ramdang ah sianginn a kaimi hna lak i a cheu leng cu Asia ram in a rami an si” tiah an ti.

An fale cu ramdang ah sianghleiruun an kai khawh nakhnga an nulepa cu fakpi in rian an ṭuan tawn. Taiwan ah a ummi Qixiang nih hitin a ti: “Ka nu le ka pa cu mirum an si lo nain an fale pali ningin United States ah college an kan kaiter.” Mah fimcawnnak caah a chungkhar cu mi tampi bantukin leiba tampi an ngei ve.

Fimcawnnak nih lam cheukhat in kan nunnak kha a ṭhanchoter khawh ko nain a phi a chuak cu siangngakchia nih an i ruahchanmi ningin a si zungzal lo. Tahchunhnak ah, sianginn kai man pek awkah tangka tampi an cawi i kum tampi chung fakpi in rian an ṭuan hnu hmanhah mi tampi nih an duhmi rian kha an hmu kho lo. Singapore i Business Times ah Rachel Mui nih hitin a ti: “Sianghleiruun degree a lami mi tampi cu rian an hmu kho lo.” Taiwan ah a um i a sangmi fimcawnnak a dihmi Jianjie nih hitin a ti: “Mi tampi nih thim awk an ngeih lo caah an degree he aa tlak lomi rian kha an cohlan.”

An lakmi degree he aa tlakmi rian a hmumi hna zong an nunnak cu an i ruahchanmi ningin a si kho lo. Thailand ah a ummi Niran cu United Kingdom ah sianghleiruun a kai hnuah a kaimi degree he aa tlakmi rian kha a hmuh. Hitin a ti: “Kaa ruahchanmi bantukin ka lakmi degree nih lahkhah tampi a ka hmuhter. Asinain cutin lahkhah tampi ka hmuh khawh nakhnga suimilam tampi chung fakpi in rianṭuan a hau. A donghnak ah cun company nih keimah i telin a dang rianṭuantu tampi kha rian in an kan phuah. Cucaah zei bantuk rian hmanh nih a himmi hmailei caah aamah a khaan kho lo ti kha ka hun hngalh.”

A rummi asiloah an nunnak ah hlawhtlinnak a hmumi hna hmanh chungkhar buaibainak, ngandamlonak le tangka kong he aa tlaiin an lungre a thei. Japan ah a ummi Katsutoshi nih hitin a ti: “Tangka tampi ka ngei ko nain midang nahchuahnak le puarhrangpi in pehtlaihnak ka ton caah kaa nuam lo.” Vietnam ah a ummi nu Lam nih hitin a ti: “Tangka nih a himmi nunnak a kan hmuhter lai tiah an ruah caah mi tampi cu tangka tampi ngeih awkah an i zuam. Asinain an lungre a thei chin i a zaw hmanh an zaw.”

Franklin bantukin mi tampi nih an nunnak ah a sangmi fimcawnnak le rumnak nakin a biapi deuhmi thil a um ti kha an hngalh. Cucaah an nunnak ah thliri chawva biapi ah chiah canah mi cheukhat nih miṭha si awk le midang cungah thil ṭha tuah awkah fakpi in an i zuamnak thawngin a ṭha deuhmi hmailei hmuh awkah an i zuam. Mah cu a himmi hmailei caah aamah khaangtu a si lai maw? Mah a phi kha a hnu capar ah a fianter lai.