Asinain mi tampi cu an duhmi hmailei phun an ngei kho timi kong he aa tlaiin lunghrinhnak an ngei. Ruahlopi in COVID-19 pulrai ti bantuk thil hna ruangah an nunnak kha fakpi in a hnorsuan, sifah harnak an tong i mi tampi cu a thih hmanh an thi. Cucaah an hmailei nunnak cu a him ti lo tiah an ruah.

An hmuhmi a fiang lomi thil sining ruangah mi tampi nih a ṭha deuhmi hmailei ah lam a hruai kho hna hnga dingmi thil hna kha lungtho tein an kawl. Mi cheukhat nih cun hmuh khawh lomi ṭhawnnak asiloah van chiat ṭhat hna kha an zumh. Mi tampi nih an duhmi thil hmuh awkah mah thil hna nih aamah a khaan khawh tiah an ruah caah fimcawnnak le thilri chawva hna kha an kawl. Mi cheukhat nih cun miṭha pakhat sinak nih a ṭhami nunnak ngeih awkah tuah a herhmi thil paoh a kan tuahter dih tiah an ruah.

Mah thim dingmi thil hna nih na duhmi hmailei nunnak kha aan ngeihter lai maw? Mah kong hngalh awkah mah biahalnak hna hi na ruah a hau:

• Na hmailei kong cu zeinihdah bia a khiah taktak?

• Fimcawnnak le tangka nih a ṭha deuhmi nunnak hmuh awkah aamah a khaang kho maw?

• Miṭha pakhat sinak nih a himmi hmailei hmuh awkah aamah a khaang kho maw?

• A himmi hmailei nunnak caah zumh khawh a simi lamhruainak kha khoika ah dah na hmuh khawh?

Mah Vennak Innsang capar nih a phi hmuh awkah aan bawmh khawh.