ARFI ZOH IN TUAKNAK: Mi cheukhat nih mi pakhat cu a chuah lio i arfi a langh ning nih a hmailei kong kha bia a khiah tiah an zumh. Hmailei kong chim awkah kutṭial zohnak cauk hna kha an rel i mah nih biakhiahnak tuah awkah a bawmh hna.

PHE IN TUAKNAK: Mi cheukhat nih an inn kha phundang deuh in kan sak ahcun hlawhtlinnak kan hmu lai tiah an zumh. Hong Kong ah a ummi Lo Wing, * nih hitin a ti: “Phe in tuak a thiam tukmi pa nih na dawr khaan i a langh deuhnak hmun ah thlalang fim na chiah ahcun mah nih tangka tam deuh hmuh awkah aan bawmh lai tiah a ka ti.”

HRINGSORTU BIAKNAK: Mi cheukhat nih cun huhphenh an si nakhnga le thluachuah an hmuh nakhnga a thi cangmi hringsortu hna asiloah khuazing a phunphun kha kan biak hna a hau tiah an zumh rih. Vietnam ah a ummi Van nih hitin a ti: “A ka hringsortu pawl ka biak hna ahcun keimah le ka fale caah atu ah a ṭhami le a himmi hmailei kan hmu lai tiah ka zumh.”

MIKIR ZUMHNAK: Mi tampi nih mi pakhat cu a thih tikah hrin ṭhan a si ṭhan lengmang tiah an zumh. Cun atu ah an tonmi thil ṭha le thil ṭhalo cu a hmasa an nun lio i an tuahmi thil ruangah a si ti zongin an zumh.

Asinain mi tampi nih cun cu bantuk zumhnak cu zumhnak hrut a si tiah an ruah. Mi tampi nih cun cu bantuk thil hna kha an zum taktak lo nain arfi zoh in tuaknak, Ouija^® board, tarot card le kutṭial zoh ti bantuk hna kha an tuah rih. Annih nih cu bantuk thil hna tuahnak nih hmailei kong hngalh awkah a kan bawmh khawh tiah an ruah.

Cu bantuk zumhnak a ngei i thil a tuahmi hna cu a ṭhami nunnak le a himmi hmailei an ngei lai maw?

Vietnam ah a ummi Hào hmuhtonnak kong hi ruathmanh. Lamhruainak a hmuh nakhnga arfi zoh in a tuak, phe in a tuak i hringsortu pawl kha a biak hna. Asinain hlawhtlinnak a hmu maw? Hào nih hitin a ti: “Tangka tampi ka sung, leiba ka ngei, ka chungkhar he buaibainak kan ngei i ka lungre a rak thei tuk.”

Taiwan ah a ummi Qiuming zong arfi zoh in tuaknak, mikir kong, van chiat ṭhat kong, phe in tuaknak le hringsortu biaknak hna kha a zummi a si ve. Mah kong kha ṭha tein a hlathlai hnuah hitin a ti: “Cu bantuk cawnpiaknak le phunglam hna cu pakhat le pakhat aa ralkah i lung a tuaitertu an si ti kha ka hun hngalh. Arfi zoh in tuaknak hna cu a hmaan tawn lo ti kha ka hmuh. Mikir pakhat in a hmasa na nunning kong kha na hngalh lo ahcun zeitindah naa thlen lai i mikir in hrin ṭhan na si tikah a ṭha deuhmi nunnak cu na hmuh lai?”

Hào, Qiuming le a dang mi tampi nih kan hmailei cu van chiat/ṭhat, arfi, a thi cangmi hringsortu hna le mikir in hrin ṭhannak nih bia a khiak lo ti kha an hngalh. Mah cu kan hmailei kong kha kan uk kho lo tinak a si maw?

Mi tampi nih a ṭha deuhmi hmailei nunnak ca aamah khaan cu a sangmi fimcawnnak le thilri chawva tampi ngeih kha a si tiah an ruah. Cu bantuk thimnak a tuahmi hna nih zei a phichuak dah an hmuh?