Mexico ram i aa dawh tukmi Tamaulipas peng, Ciudad Mante khua ah ka chuak. Cuka ah a ummi tam deuh cu an siang i an nun a nem. Asinain miṭhalo phu ruangah cuka hmun cu ṭih a nung ngai.

Kei cu fapa pali lakah a pahnihnak ka si. Ka nu le ka pa nih Catholic Church ah tipil an ka inter i a hnuah Khrihfabu i hlasatu phu ah kaa tel ve. Pathian duhmi ningin nun kha ka duh, zeicahtiah hellmei ah zungzal in hrem lai kha ka ṭih tuk.

Kumnga ka si lioah ka pa nih a kan kaltak. Mah nih ka ngaih a ka chiatter tuk i ka lungthin chungah a chambau peng. Mah tlukin kan dawt ko buin zei ruangah dah a kan kaltak hnga ti kha ka hngalthiam lo. Ka nu cu a fale pali cawmnak caah a leng ah rian a ṭuan.

Thil sining kha caanṭha ah i lak in keimah nakin a cataang a sang deuhmi pawl he sianginn kai loin kan hrokhrol tawn. Anmah nih mi volhpamh, kuakzuk, fir le i ṭhuat ti bantuk kha an ka cawnpiak. Midang cungah nawlngeih ka duh caah boxing, paih le hriamnam phunkip hmanning ti bantuk kha ka cawng. Cuticun a puarhrang tukmi mino ka hung si. Meithal in i kahnak hna ah kaa tel tawn i voi tampi cu thi he, hnai he thi dengmang in lam cungah ka ril tawn. Cu bantuk thil ka tonmi kha ka nu nih a hmuh i siizung ah a ka tlikpi colh tikah zeitluk in dah a ngaih a chiat lai khi ruathmanh u.

Kum 16 ka si lioah ka ngakchiat lio i ka hawikom a simi Jorge nih inn ah a rak ka leng. Jorge nih kei cu Jehovah Tehte ka si i a biapi tukmi thawngṭha chimh kaan duh hna tiah a kan ti. Baibal hmangin a zumhnak kong kha a kan chimh. Mah kong hna cu ka rel bal lo i Pathian a min le aa tinhnak kong hna kha hngalh ka duh tuk. Jorge nih Baibal cawn awkah a kan sawm i kan cohlan.

Hellmei kong he aa tlaimi Baibal cawnpiaknak taktak kha ka hngalh tikah ka hna a ngam tuk. A tak ti ahcun Baibal nih hellmei kong a kan cawnpiak lo. (Salm 146:4; Phungchimtu 9:5) Mah kong ka hngalh hnu cun Pathian cungah a hmaan lomi ṭihnak ka ngei ti lo. Mah canah a fale caah a ṭha bikmi a duhmi, dawtnak a ngeimi Pa in ka  hun hmuh.

 Baibal cawnnak ah ka ṭhangcho thluahmah i ka ziaza pawl thlen a hauh kha ka hun hngalh. Toidornak ngeih awk le puarhran lo awkah i zuam ka hau. Cutin ngeih khawh awkah 1 Korin 15:33 i ruahnak cheuhnak bia nih a ka bawmh. Mah ah “hawiṭhalo nih ziaza ṭha a hrawh” tiah a ti. Ka ziaza remh ka duh ahcun ka cungah a ṭhalomi huham a ngeimi hna he i komh ti lo a hau ti kha ka hun hngalh. Cucaah a hlanlio i ka hawikom pawl kha komh ti loin Khrihfabu chung i unau pawl he ka hun i kom. Annih cu lung i khahlonak hna kha kuttum hmangin a tawngthammi le a puarhrangmi an si lo, Baibal phunglam ningin a nungmi an si.

Ka lung a ka su tukmi a dang Baibal caang pakhat cu Rom 12:17-19 kha a si. Mah cacaang nih hitin a ti: “Mi nih nan cungah ṭhatlonak an tuah ahcun ṭhatlonak in va lehrul hna hlah u. . . . Mi vialte he i rem awk kha nan i zuam khawh chungin i zuam u. Phuhlam hmang hlah u. . . . Zeicahtiah Cathiang nih pei, ‘“Phuhlam cu keimah rian a si, keimah nih ka lehrulh hna lai,” tiah Bawipa nih a ti’ a ti kha.” Jehovah nih dinlonak hna kha aa tlakmi caan ah aa tlakmi lam in a tawnghtham lai ti kha ka hun cohlan. Cuticun a puarhrangmi ka ziaza hna kha duhsah duhsah in kaa remh khawh.

Voikhat cu inn ka ṭin lioah a cangmi thil kha kaa cinken rih ko. A hlan ah kan i ngiar balmi mino miṭhalo phu pakhat nih an ka ṭhuat, an hruaitu nih ka hnulei in a ka chuih i “rak kan let ngat” tiah a ka auh nawh. An ka serhsatnak hi ka inkhawh nakhnga Jehovah sinah thla ka cam colh. Lehrulh ka duh tuk ko hna nain ka kaltak hna. A thaizing ah an hruaitu pa he kan i tong ṭhan. Mah tikah ka thin a hung tuk i lehrulh ka duh tuk. Asinain keimahle keimah kaa sum khawh nakhnga Jehovah sinah dai tein thla ka cam. Ka khuaruah a har ngaimi cu mah pa cu ka sinah a ra i hitin a ka ti: “Nizan kongah khan rak ka ngaithiam ko. Biatak tein chim ahcun nangmah bantuk si ka duh. Kei zong Baibal cawn ka duh ve.” Ka thinhunnak ka rak i sum khawh caah hi bantuk bia hi ka theihmi a si. Cucaah kaa lawm tuk. Cuticun hmunkhat ah Baibal kan cawngṭi.

Ngaihchiat awk ngai a simi cu mah lio caan ah ka chungkhar pawl cu Baibal an hlathlai ti lo. Asinain kei cu Baibal hlathlai peng awkah fek tein bia ka khiak i aho ruang asiloah zeithil ruang hmanhah ngol ka duh lo. Pathian miphun he hmaan tein i hawikomhnak nih lungthinlei ka intuarnak kha a damh lai, cun annih cu ka herhmi chungkhar an si ti zong ka hngalh. Cuticun ka ṭhangcho thluahmah i 1991 ah Jehovah Tehte pakhat in tipil ka ing.

Atu ahcun Baibal chung i thawngṭha ngaih a duhmi paoh kha phung ka chimh hna. A luancia kum 23 in midang sin thawngṭha chimnak rian ah caantling in i telnak caanṭha ka hmu.

Mah lengah Mexico ram i Jehovah Tehte Hna zung ṭengnge ah mah lungtho tein aa pemi pakhat in caan saunawn rian ka ṭuan. Cuka ah aa zuam ngaimi unaunu Claudia he kan i hmu i 1999 ah kan i um. Hi bantuk zumhawktlakmi hawikom a ka pek caah Jehovah cungah kaa lawm tuk.

A hna a chet i a holh kho lomi hna nih Jehovah kong an hngalh khawh nakhnga bawmh awkah Mexico Kut Holh a hmangmi Khrihfabu pakhat ah rian kan ṭuan. A hnuah Belize khua ah an kan ṭhial i cuka mi hna kha Baibal kong kan cawnpiak hna. Cuka i kan nunning cu a sawhsawh te a si ko nain kan herhmi vialte kan ngei dih i kan i nuam tuk. Mah cu zeithil he hmanh kan thleng kho lo.

A hnuah ka nu cu Baibal a cawng ṭhan i tipil a hung ing. Mah lengah ka upa, a nupi le an fale zong atu cu Jehovah Tehte an si ve cang. A hlanlio i ka hawile cheukhat zong biatak ka chimh hna i atu cu Jehovah an bia ve cang.

Ngaihchiat awk ngai a simi cu ka chungkharmi cheukhat cu an ziaza an i thlen lo ruangah an thi cang. Kei zong ka ziaza rak i thleng ve hlah ninglaw anmah bantukin ka thi ve cang hnga. Asinain Jehovah nih amah kong hngalh awk, biak awk le ka nunnak ah Baibal phunglam zulh awkah lungsaunak le dawtnak he a ka bawmh caah kaa lawm tuk.