Baibal nih Goliath cu “a tung dongruk le khapkhat” a si tiah a ti. (1 Samuel 17:4) Dongkhat ah lehmah 17.5 a sau i khapkhat ah lehmah 8.75 a sau. Cucaah dongruk le khapkhat cu pekua le lehmah paruk hrawng a si. Mi cheukhat nih Goliath cu mah tlukin a sang lo tiah an ti, asinain mah hi ruathmanh: Tuchan ah a sang bik tiah cazin an khumhmi pa i a tung cu pe 8 le lehmah 11 leng a si. Goliath cu mah pa nakin lehmah 6 asiloah mah nakin a san deuhmi cu a si kho taktak hnga maw? Goliath cu an pumrua a ngan tuk tiah mi nih hngalhmi, Rephaim phun a si. BC kumzabu 13 lio i Izipt mi hna cazin ah Kanaan ram i ralkap cheukhat cu periat leng an sang tiah aa ṭial. Cucaah Goliath a tung cu a sang tuk ko nain a si khomi a si ko.

Mifim pawl nih Siangpahrang David cu tuanbia chung i a ummi men a si tiah langhter awkah an rak i zuam nain mah cu a har chinchin. Hlanlio thil kong hlathlaitu hna nih “David inn” tiah aa ṭialmi hlanlio lungtlap pakhat kha an hmuh. Mah lengah Jesuh Khrih zong nih David kha a um taktakmi in a rak langhter. (Matthai 12:3; 22:43-45) Jesuh Messiah a si ti a langhtermi a chuahkehnak kong ṭialmi pahnih zong nih Jesuh cu Siangpahrang David hringsor a si kha an langhter. (Matthai 1:6-16; Luka 3:23-31) Cucaah David cu a um taktakmi a si ti cu a fiang.

Ral an i dohnak cu Elah Nelrawn ah a si tiah Baibal nih a ti. Asinain mah nakin a dikthliar deuhin a langhtermi thil a um rih, mah cu Filistin mi nih Soko le Azekah khua kar i tlanghrawn ah riahhmun an khuar tiah a timi hi a si. Israel mi cu nelrawn i khattalei tlanghrawn ah riahhmun an khuar. Cu a si ah a hmun taktak cu khoika ah dah a si?

Nai ah cuka hmun ah a va tlawngmi pa pakhat nih hitin a chim: “Lam a kan hruaitu pa cu biaknaklei ah aa zuammi cu a si lo nain Elah Nelrawn ah a kan kalpi. Tlang cung leiah a kan kaipi. Cuka in nelrawnlei kha kan zoh i 1 Samuel 17:1-3 kha a kan relpiak. Mah hnuah nelrawn kha a sawh i ‘khika, nan kehlei hi Soko khuarawk a si. Nan orhlei hi Azekah khuarawk a si. Mah khua pahnih karah Filistin mi nih riahhmun an khuar, mah cu nan hmai i a ummi tlanghrawn kaakhatkhat ah hin a si. Cucaah atu kan dirnak hi Israel mi hna riahhmun a si’ tiah a kan chimh. Saul le David cu atu kan dirnak hmun ah hin an dir lai tiah ka zumh. Cun nelrawn lei ah kan ṭum, cuka cu a ro ti awk tluk a si i lung in a khat. David nih lungmil tete panga a char i mah lakah pakhat in Goliath a thahmi kha ka mitthlam ah ka cuanter.” Mah khualtlawngtu pa bantukin mi tampi zong Baibal i a kong a neknok tiang a hmaanmi nih an lung a suk tuk hna.

Mah tuanbia a hmaannak he aa tlaiin lunghrin awk zeihmanh a um lo. Mah ah aa telmi minung le hmun hna cu a um taktakmi an si. A biapi bikmi cu Pathian thawchuah hnawhmi ah aa tel i ‘lih a chim kho lomi Pathian,’ sinin a rami a si caah a si.—Titas 1:2, NW; 2 Timote 3:16.