Seth * nih hitin a chim: “Ka nupi he, keimah he caankhat te ah rian phuah kan si. Kumhnih chung sifak bawmhnak in khua kan sa i kan hmuhmi zei rian paoh kan ṭuan. Mah ruangah ka nupi Prisilla cu a lung a hung dong i keimah zong man a ngei lomi bantukin kaa ruat.

Kan sining kha zeitindah kan tawnghtham? Priscilla nih Matthai 6:34 i Jesuh bia in amahle amah ralrin aa pe zungzal. Jesuh nih thaizing kongah lungrethei in um hlah u, thaizing nih cun lungretheihnak cu a za in aa ngeih ve ko tiah a ti. Cun lungtak tein thla a cammi zong nih thazaang ngeih awkah a bawmh. Kei tu cu Salm 55:22 bia nih hnemhnak a ka pek. Salm caṭialtu bantukin ka thilrit kha Jehovah sinah ka ṭhumh tikah Jehovah nih a ka bawmh taktakmi kha ka hmuh. Atu cu rian ka ngei cang ko nain Matthai 6:20-22 i Jesuh ruahnak cheuhnak bantukin nunning sawhsawh tein kan nung. Mah ruangah Jehovah he kan i naih deuh i kanmah nuva zong kan i naih deuh.”

Jonathan zong nih hitin a chim: “Kan innchungkhar i chawlehnak rian kan sungh lioah hmailei kong he aa tlaiin ka lungre a thei tuk. Chawlehnak a ṭumchuk ruangah kum 20 chung kan ṭuanmi rian vialte cu pakpalawng ah an cang dih. Tangka kong ah ka nupi he bia kan hun i al. Thil cawknak card in thil kan cawk ahcun company nih a kan cohlang lai lo ti kan phan caah kan caw ngam lo.

Asinain Baibal le thiang thlarau nih a ṭhami biakhiahnak tuah khawh awkah a kan bawmh. Zei rian paoh cohlan awkah ka cawn i a herh loin tangka hman lo awkah kan i zuam. Jehovah Tehte kan si caah zumtukhat unau pawl sin zongin bawmhnak kan hmu. Mahle mah upatnak lungthin ngeih  ṭhan dingin an kan bawmh lengah kan har tuk lio caan ah an kan bawmh.”

Rakel nih hitin a chim: “Ruahlopi in ka vapa nih a ka kaltak tikah ka lung a fak tuk i ka thin zong a hung. Cun ka ngaih a chia tuk i ka lung a dong. Asinain Pathian he i naih deuh dingin kaa zuam tikah Pathian nih hnemhnak a ka pek. Nifate in thla ka cam caah Pathian pekmi daihnak nih ka lungthin kha a ka huhphenh. A kuaimi ka lungthin kha a damter ṭhan bantuk a si.

Thinhunnak le lungfahnak kha Baibal bawmhnak thawngin ka hloh khawh caah kaa lawm tuk. Lamkaltu Paul nih Rom 12:21 ah ‘ṭhatlonak kha i teiter hlah u, ṭhatnak tu in ṭhatlonak kha tei i zuam u’ tiah a timi bia kha kaa cinken zungzal.

Hawikom ṭha pakhat zong nih nunnak ah karhlan zungzal a herh kha hngalhthiam awkah a ka bawmh. Phungchimtu 3:6 kha a ka relpiak i ‘thlau caan a um’ ti kha nem tein a ka chimh. Mah cu cohlan awkah a har ko nain ka herhmi te bak a si. Atu cu ka nunnak ah hmuitinh thar ka ngei cang.”

Elizabeth zong nih hitin a chim: “Innchunghawi he i ṭhen tikah bawmhnak a herh taktak. Nifate in a ka bawmmi hawikom ṭha pakhat ka ngei. Ka ṭah tikah a ṭap ve i a ka hnemh. Cun hlawtmi ka si timi ruahnak ngeih loin dawtmi ka si timi ruahnak ngeih awkah a ka bawmh. Jehovah nih ka intuarnak damter awkah a hmanmi a si ti kha ka zumh.”

Capar a thawknak ah a kong chimmi Luis cu a zual ngaimi lungzawtnak a ngei i voihnih tiang a thi dengmang. Atu ahcun nikhat ah suimilam 16 chung oxygen pek a hau. Luis nih hitin a chim: “Jehovah sinah thla ka cam zungzal. Ka thlacam a dih tikah Pathian thiang thlarau nih thazaang a ka pek tiah ka ruah. Pathian nih a ka zohkhenh lai ti kha ka hngalh ca le ka zumh caah thlacamnak nih inkhawhnak ngeih awkah a herhmi ṭhawnnak a ka pek.”

Kum 80 leng a simi Petra nih hitin a chim: “Tuah ka duhmi thil tampi a um ko nain ka tuah kho lo. Ka thazaang a ṭumchuk thluahmah cang ti hngalh cu a har tuk. Ka tha a dih caah sii lawng kha kaa bochan. A si khawh ahcun hi harnak hi ka ṭhialpiak ko tiah Jesuh nih a Pa a nawl bantukin a caan ah ka ruat tawn. Asinain Jehovah nih Jesuh kha thazaang a rak pek bantukin kei zong thazaang a ka pek ve. Thlacamnak cu  nifate kaa thlopnak sii phunkhat a si. Pathian sin bia ka chim hnuah ka hun ṭha deuh.”—Matthai 26:39.

Kum 30 chung hrawng thather zawtnak a ingmi Julian zong cutin a intuar ve. “Tlangtlatu ṭhutdan in kekual bunhmi ṭhutdan cungah kaa ṭhial. Asinain ka nunnak kha midang bawmhnak ah ka hman caah man a ngei ko. Midang bawmhnak nih ka inmi fahnak kha a zorter deuh. Jehovah zong nih nan herh caan ah thazaang kaan pek hna lai timi a biakam ningin a tuah. Lamkaltu Paul bantukin kei zong “ṭhawnnak a ka pekmi thawngin zeithil hmanh hung chuak hna sehlaw ka ton khawh ko hna” tiah ka chim khawh ve.”—Filipi 4:13.

Antonio nih hitin a chim: “Ka pa cu mawṭaw nih a pah i a thih tikah a hmasa ahcun ka zum kho lo. Minung kalnak lam cungah a ke in a kal ko buin cu bantuk thil a tonmi cu a ding lo tiah ka ruah. Asinain ka tuah khawhmi zeihmanh a um lo. Ninga chung zeihmanh i hngal loin a um hnuah a thi. Ka nu hmaiah cun ṭah lo awkah kaa sum chih ko nain keimah lawng ka um tikah ka ṭap chih. Cun ‘zeicah hi thil hi kan ton? tiah keimahle keimah kaa hal lengmang.

Mah lio caan ah ka ngaih a chia tuk i ka intuarnak kaa uk khawh nakhnga le ka lung a daih khawh nakhnga ka bawm tiah Jehovah sinah thla ka cam peng. A hnuah duhsah duhsah in ka lung a hung dai. Ahopaoh nih ‘hmuh chung khawh lomi thil’ ton khawh a si timi Baibal bia kha ka hun i cinken. Pathian cu lih a chim kho lomi Pathian a si caah mithi pawl an thawhṭhan tikah ka pa he kan i tong ṭhan lai ti kha ka zumh.”—Phungchimtu 9:11, NW; Johan 11:25; Titas 1:2.

A hramthawknak capar ah langhtermi Robert zong cu bantuk ruahnak a ngei ve. Hitin a chim: “Filipi 4:6, 7 ah a chimmi lungdaihnak kha ka nupi Maribel he kan hmu. Mah cu Jehovah sin thla kan camnak thawngin a si. Mah lungdaihnak nih thawnglatu pawl sinah thawhṭhannak ruahchannak kong chim awkah a kan bawmh. Vanlawng accident ruangah kan fapa cu thi ko hmanh sehlaw amah he hmunkhat ah nuam tein caan kan rak hmanṭimi hmuhtonnak tampi kan ngei rih ko. Mah hmuhtonnak hna kha i cinken peng awkah kan i zuam.

Zumtukhat unau pawl nih nan zumhnak kong lungdai tein nan chimmi kha TV ah kan hmuh tiah an kan ti tikah unau tampi nih kan caah thla nan kan campiak caah a si tiah kan ti hna. Mah lengah hnemhnak ca tampi kan hmuhmi zong hi Jehovah nih a kan bawmhmi a si ti kha kan hngalh.”

Buaibainak le zuamcawhnak a phunphun a tongmi hna kha Pathian nih a hnemh khawh hna ti kha a cunglei hmuhtonnak hna nih an langhter. Nangtah zeitin? Na nunnak ah zei bantuk buaibainak na ton hmanhah inkhawhnak aan pe khomi hnemhnak na hmu kho. * Cucaah bawmhnak hmuh awkah Jehovah sinah hal. Zeicahtiah anih cu ‘zeizong vialte ah a kan hnemtu Pathian’ a si.—2 Korin 1:3, NW.