“Laksawng ṭha le laksawng tlamtling paohpaoh hi vancung in a rami an si; vancung i a ceumi thil a sertu Pathian sinin a rami an si.” (Jeim 1:17) Mah Baibal caang nih vancung kan Pa, Jehovah Pathian i a siannak kha a langhtermi a si. Pathian nih minung a kan pekmi laksawng vialte lakah a ṭha bikmi pakhat a um. Mah cu zeidah a si? Johan 3:16 ah Jesuh nih hitin a ti: “Pathian nih vawlei hi a dawt hringhran caah a Fapa ngeihchunte kha a pek, cucaah amah a zummi paoh cu an thi lai lo, zungzal nunnak an ngei lai.”

Kan hmuh balmi laksawng lakah a ṭha bikmi cu Pathian nih a Fapa ngeihchunhte a kan pekmi hi a si. Mah laksawng thawngin sualnak, tarnak le thihnak sal sinak in kan luat kho. (Salm 51:5; Johan 8:34) A si khawh chung fakpi in kan i zuam hmanhah kanmah tein cun mah sal sinak in kan luat kho lo. Asinain kan luat khawh nakhnga a herhmi kha Pathian nih dawtnak in a kan timhpiak. Jehovah Pathian nih a Fapa ngeihchunh, Jesuh Khrih kha tlanhnak man caah a peknak thawngin nawlngaimi hna kha zungzal nunnak ruahchannak a pek hna. Tlanhnak man timi cu zeidah a si? Zeicah a herh? Mah in zeitindah ṭhatnak kan hmuh khawh?

Tlanhnak man timi cu sunghmi thil pakhat cawk ṭhannak caah asiloah sal sinak in luatnak caah pekmi a man kha a si. Hmasa bik kan nu le kan pa, Adam le Evi cu mitling in ser an si i an tefa hna he vawlei paradis ah zungzal nun dingin ruahchannak an ngei tiah Baibal nih a ti. (Genesis 1:26-28) Ngaihchiat awk ngai a simi cu Pathian nawl an ngaih lo caah misual an hung si. A phichuak cu zeidah a si? Baibal nih hitin a ti: “Sualnak cu mipa pakhat thawngin vawleicung ah hin a tlung i cu a sualnak nih cun thihnak kha a ratpi. Cun mi vialte cu an sual dih caah thihnak nih cun mi vialte cu a ciah dih hna.” (Rom 5:12) Adam nih a tefa pawl kha a tlingmi nunnak pek canah sualnak le thihnak ro tu a pek hna.

Tlanhnak man timi cu sunghmi thil he a man aa khatmi a si a hau. Adam nih hramhram in Pathian nawl a ngaih lo caah misual a hung si i a tlingmi minung nunnak, Adam nunnak kha a sung. Mah ruangah Adam nih a tefa pawl kha sualnak le thihnak sal ah a ser hna tiah Baibal nih a ti. Cucaah sal sinak in kan luat khawh nakhnga a dang a tlingmi minung nunnak, Jesuh nunnak kha tlanhnak man caah pek a hau. (Rom 5:19; Efesa 1:7) Pathian nih dawtnak in mah tlanhnak man a pek ruangah Adam le Evi nih an sunghmi, vawleicung paradis ah zungzal nunnak ruahchannak kha minung nih an ngei kho ṭhan.—Biathlam 21:3-5.

Tlanhnak man in kan hmuhmi ṭhatnak thawngin zungzal nunnak a kan pe khomi Pathian pekmi tlanhnak man laksawng cu a ṭha bikmi a si ti a fiang. A hmasa capar nih a langhter bantukin tlanhnak man cu zei a kong hna nih dah man an ngeihter ti kha zohhmanh hna u sih. Mah nih “laksawng tlamtling” a simi tlanhnak man kha sunsak awkah a kan bawmh lai.

Kan duhnak a tlinter. Minung nih zungzal in nun duhnak lungthin kha kan i chuahpi. (Phungchimtu 3:11, NW) Mah duhnak kha kanmah tein cun kan tlinter kho lo nain tlanhnak man nih a tlinter  khawh. Baibal nih hitin a ti: “Sualnak man cu thihnak a si, sihmanhsehlaw Pathian laksawng cu zungzal nunnak a si i cu nunnak cu kan Bawipa Jesuh Khrih he aa pehtlaimi nunnak a si.”—Rom 6:23.

Kan herhmi a tlinter. Minung nih tlanhnak man kan pe kho lo. Baibal nih hitin a ti: “Minung nih cun zeitikhmanh ah amahle amah aa tlan kho lo; a nunnak man kha Pathian a cham kho lo. Zeicatiah minung nunnak man cu a sung tuk.” (Salm 49:7, 8) Cucaah sualnak le thihnak sal sinak in luat khawh awkah Pathian bawmhnak kan herh tuk hringhran. Asinain “a kan tlantu Jesuh Khrih thawngin” Pathian nih kan herhmi kha a kan pek.—Rom 3:23, 24.

Aa tlakmi caan. “Kannih cu misual kan si ko rih lioah hin Khrih cu kan caah a thi” tiah Baibal nih a ti. (Rom 5:8) “Misual kan si ko rih lioah” tlanhnak man a kan pek caah Pathian nih zeitluk in dah a kan dawt ti kha a langhter. Sualnak ruangah a chuakmi thil cu kan tong ko nain tlanhnak man nih ruahchannak a kan pek.

Ziaza ṭha a ngei i mahzawn ruahnak lungput a ngei lomi. Pathian nih tlanhnak man caah a Fapa a peknak a ruang kha Baibal nih hitin a fianter: “Pathian nih a kan dawtnak a langhter ning cu hitihin a si: a Fapa ngeihchun kha vawlei ah hin a run thlah i amah thawngin nunnak kan ngei lai. Dawtnak cu Pathian kan rak dawt hi a si lo, amah nih a kan dawt . . . hi a si.”—1 Johan 4:9, 10.

Laksawng vialte lakah a ṭha bikmi laksawng na sunsak kha zeitindah na langhter khawh? Johan 3:16 ah amah “a zummi” lawng an nung lai tiah Jesuh nih a chimmi bia kha i cinken. Baibal nih zumhnak timi cu “kan i ruahchanmi kan hmuh ṭheu lai ti kan zumh . . . hi a si” tiah a ti. (Hebru 11:1) Cu bantuk zumhnak ngeih awkah a hmaanmi hngalhnak a hau. Cucaah “laksawng tlamtling” a kan Petu, Jehovah Pathian kong kha a caan pe in cawng. Cun Jesuh tlanhnak man thawngin zungzal nunnak na hmuh khawh nakhnga zeidah tuah awk a si ti zong hlathlai.

www.pr418.com/cnh ah taarmi Baibal kong hna na hlathlai ahcun mah kong hna kha na hngalh lai. Jehovah Tehte Hna nih bawmh an in duh. A ṭha bikmi laksawng kong hlathlainak in ṭhatnak na hmu lai i hitin chim na duh ko lai: “Kan Bawipa Jesuh Khrih thawngin a ka khamh lai. Pathian cu lawm ko u sih.”—Rom 7:25.