Maria Isabel timi nu cu Thlanglei American, Chile ram, San Bernardo khua ah a ummi aa zuam ngaimi mino thawngthanhtu a si. Anih cu Mapuche miphun a si. Mapudungun ti zong in auhmi Mapuche holh in Khrihfabu thar dirh khawh awkah an innchungkhar dihlak in lungtho tein an i tel.

Khrih a thih Philhlonak kha Mapudungun holh zong in tuah a si lai i mah holh in sawmnak ca 2,000 chuah a si lai ti a theih tikah Maria Isabel cu khua a ruat. Anih tah zeidah a tuah khawh ve lai? An sianginn kai hawi le an sayate sin phung an chimnak in ṭhatnak a hmumi mino unau pawl kong kha a lung ah a chuak. Mah kong kha a nu le a pa a chimh hna i sianginn ah sawmnak ca pek ding aa timhtuahnak kha an zapi in an hna a tla. Zeitindah a tuah?

A hmasa bik ah, Maria Isabel nih sianginn luhnak kutkapi pawng ah sawmnak ca taarnak nawl hmuh awkah sianginn nawlngeitu pawl kha a hal hna. A halmi kha an cohlan i mah ruangah an thangṭhat. Nikhat cu min an auh hna lioah an sayaci nih mah sawmnak kong kha loudspeaker in a thanh.

Mah hnuah Maria Isabel nih khaan kip ah kalnak nawl a hal hna. Nawl a hmuh hnuah khaan khat hnu khaan khat ah a lut i Mapuche miphun nan um maw tiah a hal hna. Hitin a chim: “Sianginn dihlak ah Mapuche miphun 10 asiloah 15 hrawng lawng an um lai tiah ka ruah nain tampi an rak um i sawmnak ca 150 ka pek hna.”

Sianginn kutka pawng ah taarmi sawmnak ca a hmumi nu upa pakhat nih mah kong hi aho nih dah a ka chimh khawh lai tiah a hal hna. Kum hra a simi nute an hmuhsak tikah a khuaruah a har lai ning khi ruathmanh! “Upa a si lai tiah a rak ruah” tiah Maria Isabel nih, a nih buin a chim. Maria Isabel nih sawmnak ca kha a pek i a tawinak in a chimh, cun Pathian Pennak kong tamdeuh in chimh awkah a nu le a pa he an va len khawh nakhnga a umnak a hal. Mah minu le Mapuche miphun a dang 26, Ruahnolhnak ah an rak i pumhmi an hmuh tikah Mapudungun holh a hmangmi sang ah a ṭuanmi thawngthanhtu 20 cu an i nuam tuk. Atu ah annih cu a ṭhangchomi Khrihfabu an si cang.

Na kum cu zeizat a si hmanhah Ruahnolhnak, vantlang phungchimnak asiloah pengkomh civui ah na sianginn kai hawi asiloah na rian ṭuanṭi hawi pawl sawm awkah cutin na tuah kho ve lai maw? Cutin tuah khawh awkah bupi chuahmi cauk chung i hmuhtonnak pawl kha rel. Cun ralṭha tein na kong ka chim khawh nakhnga na thiang thlarau in ka bawm tiah Jehovah kha hal. (Luka 11:13) Cutin na tuah ahcun ṭha tein naa timhtuahnak thawng in a chuakmi ṭhatnak nih na khuaruah aan harter lai i thazaang na hmu lai.